Le gbedadaƒo nɔnɔ ŋkeke 40 megbe la, Yesu trɔ va Yohanes, ame si nyrɔe la gbɔ hafi trɔ yi Galilea. Esi Yesu gogoe la, Yohanes fia asii eye wòdo ɣli gblɔ na ame siwo le afi ma be: “Kpɔ ɖa, Mawu ƒe Alẽvi si le xexea ƒe nu vɔ̃ ɖem ɖa lae nye esi! Ame sia ŋue megblɔ le be: ‘Ame aɖe le megbenye gbɔna, si nye gã wum, elabena eli hafi meva dzɔ.’” (Yohanes 1:29, 30) Togbɔ be Yohanes nye xoxo na Yesu hã la, Yohanes nya be Yesu nɔ agbe abe gbɔgbɔmeme ene le dziƒo hafi wodzi ye.

Kwasiɖa ʋɛ aɖewo do ŋgɔ, esi Yesu va be woanyrɔ ye la, edze abe ɖe Yohanes meka ɖe edzi tututu be Yesue nye Mesia la o ene. Yohanes lɔ̃ ɖe edzi be: “Nyemenyae tsã o, ke susu si ta mele amewo nyrɔm ɖe tsi mee nye be, woaɖe eya amea afia Israel.”—Yohanes 1:31.

Yohanes yi edzi ɖe nu si dzɔ esime wònyrɔ Yesu la me na eƒe nyaselawo be: “Mekpɔ gbɔgbɔ la wògbɔna abe ahɔnɛ ene tso dziƒo, eye wònɔ edzi. Nye ŋutɔ hã nyemenyae tsã o, ke Ame si dɔm be matsɔ tsi anyrɔ amewo lae gblɔ nam be: ‘Ame si dzi nèkpɔ be gbɔgbɔ la le ɖiɖim ɖo, eye wònɔ edzi la, eyae tsɔa gbɔgbɔ kɔkɔe nyrɔa amewo.’ Mekpɔe, eye meɖi ɖase be ame siae nye Mawu ƒe Vi la.”—Yohanes 1:32-34.

Esi ŋu ke la, Yohanes kple eƒe nusrɔ̃la eve le tsitre ɖe afi ɖeka esi wòkpɔ be Yesu gbɔna. Yohanes gblɔ be: “Kpɔ ɖa, Mawu ƒe Alẽvi lae nye ekem!” (Yohanes 1:36) Enumake Yohanes Amenyrɔɖetsimelaa ƒe nusrɔ̃la eve siawo dze Yesu yome. Wo dometɔ ɖeka ŋkɔe nye Andrea. Edze ƒãa be ame eveliae nye ame si tututu ŋlɔ nu siawo ɖi, ame si hã woyɔna be Yohanes. Yohanes sia nye Salome ƒe vi, eya ta edze abe eya kple Yesu wonye nɔgãnɔɖiviwo ene. Anye be Salome, ame si srɔ̃e nye Zebedeo la, nye Maria nɔvinyɔnu.

Esi Yesu trɔ eye wòkpɔ Andrea kple Yohanes le eyome la, ebia wo be: “Nu ka dim miele?”

Wobiae be: “Rabi, afi kae nènɔna?”

Yesu ɖo eŋu na wo be: “Miva kpɔe ɖa.”—Yohanes 1:37-39.

Anɔ abe ɣetrɔ ga ene ene, eye Andrea kple Yohanes nɔ Yesu ŋu tso gaƒoƒo ma dzi. Dzi dzɔ Andrea ale gbegbe be wòyi ɖadi nɔvia Simon si wogayɔna be Petro, eye wògblɔ nɛ be: “Míekpɔ Mesia la.” (Yohanes 1:41) Andrea kplɔ Petro yi Yesu gbɔ. Nu siwo dzɔ emegbe la ɖee fia be Yohanes hã kpɔ nɔvia Yakobo eye wòkplɔe va Yesu gbɔ; gake Yohanes meŋlɔ nya siawo siwo ku ɖe eya ŋutɔ ŋu la kpe ɖe eƒe nuŋlɔɖiawo ŋu o.

Esi ŋu ke la, Yesu kpɔ Filipo, ame si tso Betsaida. Betsaida nye du si te ɖe Galilea-ƒua ŋu le dziehe gome, eye afi mae Andrea kple Petro  tso. Yesu kpe Filipo be: “Dze yonyeme.”—Yohanes 1:43.

Filipo yi ɖadi Nataniel, ame si wogayɔna be Bartolomeo, eye wògblɔ nɛ be: “Míekpɔ ame si ŋuti woƒo nu tsoe le Mose ƒe Se la kple Nyagblɔɖilawo ƒe nuŋlɔɖiwo me, si nye Yesu, Yosef vi tso Nazaret.” Nataniel ke ɖi eye wòbia Filipo be: “Ðe nu nyui aɖe ate ŋu ado tso Nazaret mahã?”

Filipo ɖo eŋu nɛ be: “Va kpɔ.” Esi Yesu kpɔ Nataniel wògbɔna la, egblɔ be: “Kpɔ ɖa, Israel-vi akuakua, si me alakpa aɖeke mele o ye nye esi.”

Nataniel biae be: “Aleke nèwɔ nyam?”

Yesu ɖo eŋu nɛ be: “Hafi Filipo nayɔ wò, esi nèle gbotia te la, mekpɔ wò.”

Ewɔ nuku na Nataniel wògblɔ nɛ be: “Rabi, wòe nye Mawu ƒe Vi la, wòe nye Israel ƒe Fia.”

Yesu biae be: “Esi megblɔ na wò be mekpɔ wò le gbotia te tae nèxɔe se ɖoa? Èle nu siwo lolo wu esiawo la kpɔ ge.” Yesu gblɔ be: “Vavã, vavã mele egblɔm na mi be: Miakpɔ dziƒo nu wòaʋu, eye mawudɔlawo anɔ dzi liam ahanɔ ɖiɖim ava Amegbetɔvi la gbɔ.”—Yohanes 1:45-51.

Ɣeyiɣi kpui aɖe ko le esia megbe la, Yesu kple nusrɔ̃la yeye siwo su esi la dzo le Yordan Balia me hezɔ mɔ yi Galilea.