Nyaɖeɖefia 9:1-21
9 Mawudɔla atɔ̃lia ku eƒe kpẽ la.+ Eye mekpɔ ɣletivi aɖe ge tso dziƒo va dze anyigba, eye wotsɔ aʋlimesafui+ la nɛ.
2 Eye wòʋu aʋli* la nu, eye dzudzɔ tu tso eme abe kpodzo gã aɖe me dzudzɔ ene, eye dzudzɔ la na ɣe do viviti,+ yame hã do viviti.
3 Eye ʋetsuviwo do tso dzudzɔ la me va anyigba la dzi,+ eye wona ŋusẽ wo, abe ŋusẽ si tɔgbi le dziɖegbe* siwo le anyigba dzi la si ene.
4 Eye wogblɔ na wo be woagawɔ vɔ̃ anyigbadzinu miemie, gbe mumu, alo ati aɖeke o, negbe ame siwo Mawu ƒe nutrenu mele ŋgonu na o la ko.+
5 Womeɖe mɔ na ʋetsuviawo be woawu wo o, ke boŋ be woawɔ fu wo vevie ɣleti atɔ̃, eye fu si wowɔ wo la le abe veve si ame sena ne dziɖegbe+ tee ene.
6 Eye le ŋkeke mawo me la, amewo adi ku, ke womakpɔe akpɔ o, eye adzro wo vevie be yewoaku, gake ku asi le wo gbɔ.
7 Ʋetsuviawo ƒe dzedzeme le abe sɔ siwo wobla akpa na hena aʋawɔwɔ ene;+ eye nane le ta na wo abe sikafiakukuwo ene, eye woƒe mo le abe amegbetɔwo ƒe mo ene,
8 ke woƒe ɖa le abe nyɔnuwo ƒe ɖa ene. Woƒe aɖuwo le abe dzatawo tɔ ene,+
9 eye woƒe akɔtakpoxɔnuwo le abe gayibɔkɔtakpoxɔnuwo ene. Eye woƒe aʋalawo le ɖiɖim abe tasiaɖam siwo sɔwo le hehem yina aʋa la ƒe ɖiɖi ene.+
10 Eye asike kple ti* le wo si abe dziɖegbewo tɔ ene, eye woƒe asikewo mee woƒe ŋusẽ le be woawɔ nu vevi ameawo ɣleti atɔ̃.+
11 Fia le wo nu, eyae nye mawudɔla si le aʋli+ la nu. Woyɔnɛ le Hebrigbe me be Abadon,* ke woyɔnɛ le Helagbe me be Apolion.*
12 Fuwɔame ɖeka nu va yi. Kpɔ ɖa! Fuwɔame eve+ bubu ava ɖe nu siawo yome.
13 Mawudɔla+ adelia ku eƒe kpẽ+ la. Eye mese gbe aɖe tso sikavɔsamlekpui+ si le Mawu ŋkume la ƒe dzowo me,
14 wògblɔ na mawudɔla adelia si si kpẽ le la be: “Tu ka mawudɔla ene siwo wobla ɖe Frat-tɔsisi gã la to.”+
15 Eye wotu ka mawudɔla eneawo, siwo le dzadzraɖoɖi na gaƒoƒo la, ŋkeke la, ɣleti la kple ƒe la, be woawu amewo ƒe akpa etɔ̃lia.
16 Eye sɔdolawo ƒe aʋakɔ la ƒe xexlẽme le akpe blaeve teƒe akpe ewo:* Mese woƒe xexlẽme.
17 Ale si mekpɔ sɔawo kple ame siwo bɔbɔ nɔ wo dzi le ŋutega me lae nye esi: Akɔtakpoxɔnu siwo biã abe dzo ene, siwo le blɔ, eye wole abe dzokpe ene la, le wo si, eye sɔawo ƒe ta le abe dzatawo+ ƒe ta ene, eye dzo, dzudzɔ kple dzokpe do tso woƒe nu me.
18 Wotsɔ fuwɔame etɔ̃ siawo siwo nye dzo kple dzudzɔ kpakple dzokpe si do tso woƒe nu me la wu amewo ƒe akpa etɔ̃lia.
19 Elabena sɔawo ƒe ŋusẽ le woƒe nuwo kple woƒe asikewo me, elabena woƒe asikewo le abe dawo ene, eye ta li na wo, eye esiawoe wotsɔna wɔa vɔ̃ amewoe.
20 Ke ame susɔe siwo fuwɔame siawo mewu o la metrɔ dzi me tso woƒe asinudɔwɔwɔwo me o; womedzudzɔ tadede agu na gbɔgbɔ vɔ̃wo, kple legba siwo wotsɔ sika, klosalo, akɔbli, kpe kple ati wɔ, siwo metea ŋu kpɔa nu alo sea nu alo zɔa azɔli o la o.+
21 Eye wometrɔ dzi me tso woƒe amewuwu, woƒe gbɔgbɔyɔyɔ, woƒe gbɔdɔdɔ manɔsenu* kple woƒe fififi me o.
Etenuŋɔŋlɔ
^ Alo, “ʋe globo.”
^ Alo, “akekle; aganɛ.”
^ Alo, “até.”
^ Egɔmee nye “Tsɔtsrɔ̃.”
^ Egɔmee nye “Nutsrɔ̃la.”
^ Alo, “200,000,000.”
^ Kpɔ Nya Tɔxɛwo Gɔmeɖeƒea.
