Lododowo 16:1-33
16 Amegbetɔ ɖoa nuwo ɖe eƒe dzi me,*Ke Yehowa gbɔe ŋuɖoɖo si dona le enu* tsona.+
2 Ame ƒe mɔwo katã dzɔ* le eya ŋutɔ ŋkume,+Ke Yehowae dzroa dzimesusuwo* me kpɔna.+
3 Tsɔ wò dɔ ɖe sia ɖe de asi na Yehowa,*+Ekema wò ɖoɖowo adze edzi.
4 Yehowa wɔ nu sia nu hena eƒe tameɖoɖo me vava,Ale be ame vɔ̃ɖi gɔ̃ hã natsrɔ̃ le vɔ̃dzɔgbe.+
5 Ame sia ame si dana le eƒe dzi me la nye ŋunyɔ na Yehowa.+
Ka ɖe edzi be, womagbe tohehe na ame sia o.
6 Lɔlɔ̃ si nu metsina o kple nuteƒewɔwɔ ye wotsɔna léa avu ɖe vodada ta,+Eye Yehowa vɔvɔ̃e nana ame trɔna ɖa le vɔ̃ ŋu.+
7 Ne ame aɖe ƒe zɔzɔme dze Yehowa ŋu la,Enana eƒe futɔwo ke hã nɔa ŋutifafa me kplii.+
8 Nu ʋɛ si ŋu dzɔdzɔenyenye kpe ɖo la+Nyo wu nunɔamesi geɖe si ŋu madzɔmadzɔnyenye kpe ɖo.+
9 Amegbetɔ wɔa ɖoɖo ɖe ale si wòazɔe ŋu le eƒe dzi me,Ke Yehowae fiaa mɔ eƒe afɔɖeɖewo.+
10 Mawu ƒe afiatsotsoe wòle be wòanɔ fia ƒe nuyiwo dzi;+Mele be eƒe nu natrɔ gbo nya dzɔdzɔe o.+
11 Nudzidzenu kple nudanu nyui tso Yehowa gbɔ;Nudakpe siwo katã le akplo me hã nye eƒe nuwɔwɔ.+
12 Nu vɔ̃ɖi wɔwɔ nanye ŋunyɔnu na fiawo,+Elabena dzɔdzɔenyenyee wotsɔna lia ke fiazikpui.+
13 Nuyi siwo dzi nya dzɔdzɔewo le lae dzea fiawo ŋu.
Ame si gblɔa nya siwo le eteƒe lae wolɔ̃na.+
14 Fia ƒe dziku le abe ku ƒe dɔla ene;+Ke nunyalae tsia enu.*+
15 Ne fia kɔ mo ɖe ame ŋu la, agbee wònye;Eye eƒe ŋudzedzekpɔkpɔ ɖe ame ŋu le abe adametsiɖoɖo ene.+
16 Ne nunya su ame si la, aleke mehenyo wu sikae o!+
Enyo be ame natia gɔmesese wu klosalo.+
17 Nuteƒewɔlawo ƒe mɔ tata ƒoa asa na vɔ̃.
Ame si léa ŋku ɖe eƒe zɔzɔme ŋu la kpɔa eƒe agbe* ta.+
18 Dada doa ŋgɔ na gbegblẽ,Eye ɖokuidodoɖedzi doa ŋgɔ na anyidzedze.+
19 Enyo be ame nabɔbɔ eɖokui* le ame fafawo dome,+Wu be woama aboyonu kple dadalawo.
20 Ame si ɖea nugɔmesese deto fiana le nyawo me la, nu adze edzi nɛ,*Eye dzidzɔtɔe nye ame si ɖoa dzi ɖe Yehowa ŋu.
21 Ame si si dzi nyanu le la, woayɔe be nugɔmesela,+Eye ame si ƒe numenyawo dzea to* la nana woxɔa eƒe nyawo dzi sena.+
22 Gɔmesese deto la, agbevudo wònye na ame siwo si wòle,Ke bometsilawo ŋutɔwo ƒe bometsitsie nye woƒe tohehe.
23 Nunyala ƒe dzi nana eƒe nu dzea nunya,+Eye wònana woxɔa eƒe nyawo dzi sena.
24 Nya dzeto la, anyixe wònye,Evivina na luʋɔ,* eye wòdaa gbe le ƒuwo ŋu.+
25 Ame aɖewo ƒe mɔ dzɔ le woawo ŋutɔ ŋkume,Ke eƒe nuwuwu nye ku ƒe mɔ.+
26 Nu si le dɔwɔla dzrom* lae nana wòwɔa dɔ sesẽElabena eƒe dɔwuamee* ƒoa du ɖe ete.+
27 Yakame hea nu vɔ̃ɖi ɖe go;+Eye eƒe nuƒo le abe dzo binu ene.+
28 Gedila* dea dzre aƒe,+Eye ameŋugblẽla maa xɔlɔ̃wo dome.+
29 Ŋutasẽla blea ehavi nu,Eye wòkplɔnɛ toa mɔ manyomanyo dzi.
30 Emiaa ŋku ɖe ame ne ele vɔ̃ ɖom ɖe tame.
Edaa nuyi ɖe nuyi dzi ta, ke hã ewɔa vɔ̃ dea goe pɛpɛpɛ.
31 Ta ƒowɔ nye atsyɔ̃fiakuku,*+Ne wokpɔe le dzɔdzɔenyenye ƒe mɔ dzi.+
32 Ame si gbɔa dzi ɖi blewu+ la nyo wu kalẽtɔ,Eye ame si léa eƒe dziku nu* la nyo wu duwo xɔla.+
33 Wodzidzea nu ɖe nu dzi le akɔ,+Ke Yehowa gbɔe nyametsotso ɖe sia ɖe tsona.+
Etenuŋɔŋlɔ
^ Alo, “ŋuɖoɖo nyuitɔ.” Egɔmeɖeɖe tẽe, “aɖe ƒe nyaŋuɖoɖo.”
^ Egɔmeɖeɖe tẽe, “Amegbetɔ tɔe nye dzi ƒe nuɖoɖowo.”
^ Egɔmeɖeɖe tẽe, “dza.”
^ Egɔmeɖeɖe tẽe, “dzroa gbɔgbɔwo.”
^ Egɔmeɖeɖe tẽe, “Mli wò dɔwo ɖe Yehowa dzi.”
^ Alo, “xea mɔ ɖe enu.”
^ Alo, “luʋɔ.”
^ Egɔmeɖeɖe tẽe, “Enyo be gbɔgbɔ fatu nanɔ ame si.”
^ Alo, “eme anyo nɛ.”
^ Egɔmeɖeɖe tẽe, “vivina.”
^ Kpɔ Nya Tɔxɛwo Gɔmeɖeƒea.
^ Alo, “le dɔwɔla ƒe luʋɔ dzrom.”
^ Egɔmeɖeɖe tẽe, “eƒe nue.”
^ Alo, “Nugbeɖola.”
^ Alo, “bubu.”
^ Egɔmeɖeɖe tẽe, “Ame si ɖua eƒe gbɔgbɔ dzi.”
