Wode dzesii le numekuku aɖe si wowɔ me be ame siwo tsoa ʋumɔ me la dometɔ 1 le 3 me ƒe susu nɔa nu bubu ŋu hafi wonɔa mɔ gãwo me tsom. Nu siwo hea woƒe susu ne wole mɔ me tsom la dometɔ aɖewoe nye hasese kple dzeɖoɖo le asitelefon dzi. Nu si gahea woƒe susu wue nye nuŋɔŋlɔ na amewo to asitelefon dzi. Ɣeyiɣi si ame siwo nɔa nu ŋlɔm na amewo tsɔ tsoa mɔ me la didina wu esi ame siwo naneke mehe susu na o la tɔ teƒe 18 le alafa me. Eye enɔa bɔbɔe na ame siawo zi ene kloe wu be woada mɔmetsosewo dzi, atso mɔ me le afi si mesɔ le o alo be womakpɔ mɔ me hafi atsoe o.

Ame siwo kplɔa nyɔnuwo tso Nigeria yia Europa hewɔa wo kluviwoe la kplɔa wo yia voduƒe gbã ale be woaka atam be yewomaʋu go nya aɖeke o. Esi ame siwo wɔa nyɔnuwo kluviwoe la nyae be amewo vɔ̃a gbɔgbɔwo vevie ta la, wodoa vɔvɔ̃ na wo henana wolɔ̃na faa nɔa gbolo wɔm na wo eye wonɔa ga xɔm ɖe wo ta.

Ame siwo le dɔ dim la dometɔ 5 va ɖo 10 le alafa me metsɔa yunivɛsiti-ɖaseɖigbalẽwo kple ɖaseɖigbalẽ siwo woxɔ le dɔ bubu siwo wowɔ kpɔ me la kpena ɖe woƒe dɔdigbalẽwo ŋu o, elabena dɔtɔwo bua ɖaseɖigbalẽ siawo be wokɔkɔ akpa.

Wobunɛ be nu siwo wua ame wu le dukɔ madeŋgɔwo me la dometɔ ɖekae nye dzudzɔ si dona le mlekpuimedzo siwo wodona le dzodoƒe siwo ya meƒona le nyuie o la me. Le dukɔ siawo me la, gbɔgbɔmasuamedɔ wua ame miliɔn ene ƒe sia ƒe eye mlekpuimedzudzɔ gbɔe dɔléle siawo tso. Numekulawo gblɔ be aɖi vɔ̃ɖi siwo dona le mlekpui si me wodoa nakedzo alo akadzo ɖo me la nu sẽna ko abe aɖi si nɔa sigaret ƒe dzudzɔ me ene.