Nya siawoe ame siwo susumedɔlélewo le fu ɖem na gblɔ. Ðe wò ŋutɔ alo wò ame vevi aɖe le nɔnɔme sia me toma?

Ne nenema yea, ka ɖe edzi be menye wò ɖeka koe o. Susumedɔléle le nu gblẽm le ame geɖe ŋu egbea, eɖanye woawo ŋutɔ ŋu loo alo woƒe ame veviwo ŋu.

Ðikeke mele eme o be míele ‘ɣeyiɣi sesẽ siwo me nɔnɔ sesẽa’ me, eye esia nana nu tena ɖe ame geɖe dzi. (2 Timoteo 3:1) Numekuku aɖe ɖee fia be le xexea me godooa, ame ɖeka le enyi me le susumedɔ aɖe lém. Le ƒe 2020 mea, corona dɔvɔ̃a wɔe be ame siwo le dzimaɖitsitsidɔ lém ƒe xexlẽme dzi ɖe edzi abe miliɔn 78 ene, eye ame siwo le blanuiléledɔ sesẽwo lém ƒe xexlẽme hã dzi ɖe edzi nenema.

Ele vevie be míanya ame siwo le dɔ siawo lém ƒe xexlẽme ya. Gake nu si gale vevie wue nye be míanya nu si ate ŋu akpe ɖe wò kple wò ame veviwo ŋu be miaƒe dzi nadze eme ale si wòanya wɔ.

Ame si ƒe susu me dze akɔ anyia sena le eɖokui me be yeli nyuie eye naneke mele fu ɖem na yeƒe susu o. Etea ŋu nɔa te ɖe gbe sia gbe hloloetsotsowo nu, ewɔa dɔ nyuie eye wòkpɔnɛ be yeƒe dzi dze eme le agbe me.

• MENYE ame ŋutɔ gbɔe wòtso o.

• ENYE lãmegbegblẽ si nana nu tena ɖe ame dzi vevie eye wòkpɔa ŋusẽ ɖe ame ƒe nuŋububu, seselelãme kple nuwɔna dzi.

• Ate ŋu ana wòasesẽ na ame be ƒomedodo nyui nanɔ eya kple ame bubuwo dome, eye eƒe gbe sia gbe dɔwo wɔwɔ hã nazu avu kple kɔ nɛ.

• Ate ŋu aɖe fu na ame sia ame, metsɔ le ƒe si wòxɔ, eƒe dekɔnu, ŋutigbalẽ ƒe amadede, to alo subɔsubɔha si me tɔ wònye, afi si wòde suku se ɖo, alo ga ale si nu le esi me o.

Etea ŋu dzɔna ɣeaɖewoɣi be zi ɖeka koa, ame nava nɔ alɔ̃tsu dɔm alo magate ŋu anɔ alɔ̃ dɔm nyuie o; wòava nɔ nutsu ɖum alo nu manya nɔ ɖuɖum nɛ o; wòatsi dzimaɖi alo alé blanui vevie. Ne edzɔ alea, ahiã be amea nayi kɔdzi ale be woakpe ɖe eŋu wòanya nu si gbɔ wòtso kple ale si woate ŋu akpɔ kuxia gbɔ. Nu ka tae?

Yesu Kristo si nye nunyala gãtɔ kekeake si nɔ anyi kpɔ gblɔ be: “Ame siwo le lãmesẽ me la mehiã gbedala o, ke boŋ dɔnɔwoe hiãe.” (Mateo 9:12) Dɔnɔ siwo lɔ̃na ɖɔktawo toa dɔdamɔnuwo kple atikewo dzi kpena ɖe wo ŋua kpɔe be yewoƒe lãme kana ɖe eme na yewo wu, yewogatea ŋu trɔna ɖe yewoƒe dɔwo ŋu eye esia nana yewokpɔa dzidzɔ. Eya ta ne susumedɔléle aɖe le fu ɖem na ame aɖe vevie alo le eŋu eteƒe didia, anyo be wòayi kɔdzi kaba. a

Togbɔ be menye dɔdada ŋuti mɔfiagbalẽe Biblia nye o hãa, emenyawo ate ŋu akpe ɖe mía ŋu míaƒe susu me nadze akɔ anyi. Le nyati siwo gbɔna mea, woƒo nu tso ale si Biblia ate ŋu akpe ɖe mía ŋu ne susumedɔléle aɖe le fu ɖem na mí ŋu. Aɖe vi na wò ŋutɔ ne èxlẽ wo.