ƑE SIA ƑE la, ame miliɔn ade kple edzivɔ yia ave tsoabo aɖe si me sedertiwo bɔ ɖo la me, le Shima Ƒukpo Afã la dzi, le Japan. Woyia Gbedoxɔ Gã si le Ise, afi si amewo subɔa Shintotɔwo ƒe ɣemawunɔ, Amaterasu Omikami, le ƒe akpe eve aɖewoe nye esia, la me. Ne woyi afi ma la, nu si wowɔna gbãe nye be woklɔa woƒe asiwo kple nu me tsɔ kɔa wo ɖokuiwo ŋu. Eyome wonɔa tsitre ɖe gbedoxɔa ƒe akpata gã si woyɔna be haiden la nu, eye le woƒe kɔa nu la, wodea ta agu, ƒoa asikpe hedoa gbe ɖa na mawunɔ la. * Mɔɖeɖe li na Shintotɔwo be woakpɔ gome le subɔsubɔha bubuwo ƒe kɔnuwo me, eye Buddhatɔwo kple ame siwo gblɔna be Kristotɔwoe yewonye kpakple ha bubuwo me tɔwo hã tea ŋu kpɔa gome le Shintotɔwo ƒe kɔnuawo me le gbedoɖaƒe sia.

Gbedoɖaƒewo alo teƒe kɔkɔewo * le subɔsubɔha siwo xɔ ŋkɔ le xexea me la dometɔ geɖe si, eye ame akpe teƒe akpe geɖewo yia teƒe mawo. Le dukɔ siwo gblɔna be Kristotɔwo yewonye me la, wotu gbedoxɔ kple gbedoɖaƒe geɖe na Yesu, Maria kple ame kɔkɔewo. Gbedoɖaƒe aɖewo nye teƒe siwo wobe nanewo dzɔ le le Biblia-ŋlɔɣiwo alo afi si wobe “nukunuwo” dzɔ le le egbeŋkekeawo me alo teƒe siwo wodzra subɔsubɔhawo ƒe ŋkuɖodzinuwo ɖo. Le ame geɖe gome la, nu si tae woyia gbedoɖaƒewo ye nye be woxɔe se be Mawu ase yewoƒe gbedodoɖawo kaba wu ne yewoyi ɖado gbe ɖa le teƒe kɔkɔewo. Ame bubuwo hã zɔa mɔ legbeewo yia teƒe mawo be yewoatsɔ aɖe yewoƒe ɖokuitsɔtsɔ na Mawu afia.

Ðe wònye nyateƒe be Mawu sea gbe siwo wodona ɖa le gbedoɖaƒewo alo teƒe kɔkɔewo la kaba wua? Ðe agbagba siwo amewo dzena zɔa mɔ yia teƒe kɔkɔewo la dzea Mawu ŋua? Be míayi nyaa gbɔ tẽe la, ɖe wòle be Kristotɔwo nasubɔ Mawu le teƒe mawoa? Menye ɖeko nyabiase siawo ƒe ŋuɖoɖowo akpe ɖe mía ŋu míanya ale si wòle be míabu gbedodoɖa le teƒe kɔkɔewo alo gbedoɖaƒewo o, ke woakpe ɖe mía ŋu hã be míanya subɔsubɔ si ƒomevi dzea Mawu ŋu.

Dzeɖoɖo aɖe si yi edzi le Yesu kple Samaria nyɔnu aɖe dome la ɖe ale si Mawu bua subɔsubɔnuwɔna siwo yia edzi le teƒe kɔkɔewo alo gbedoɖaƒewo la fia. Ɣemaɣi la, Yesu nɔ mɔ zɔm to Samaria eye wòva bɔbɔ nɔ vudo aɖe to le Sixar dua me be yeagbɔ ɖe eme vie. Edze dzeɖoɖo gɔme kple nyɔnu aɖe si va tsi du ge. Esi wonɔ dzea ɖom la, nyɔnua ƒo nu tso vovototo gã aɖe si le Yudatɔwo kple Samariatɔwo ƒe mawusubɔsubɔ dome ŋu. Egblɔ be: “Mía tɔgbuiwo de ta agu le to sia dzi, ke miawo ya miebe Yerusalem ye nye teƒe si wòle be amewo nade ta agu le.”—Yohanes 4:5-9, 20.

 To si ŋu nyɔnua ƒo nu tsoe lae nye Gerizim To, si le Yerusalem ƒe dziehe gome abe kilometa 50 ene. Tsã la, Samariatɔwo ƒe gbedoxɔ nɔ afi ma si me woɖua ŋkekenyuiwo abe Ŋutitotoŋkekenyuia ene le. Ke hã Yesu meƒo nu tso vovototo sia si dea masɔmasɔ Yudatɔwo kple Samariatɔwo dome ŋu o, ke boŋ egblɔ na nyɔnua be: “Nyɔnu, xɔ dzinye se, gaƒoƒo la gbɔna, esime menye to sia dzi alo Yerusalem ye miade ta agu na Fofo la le o.” (Yohanes 4:21) Nya wɔmoyaa aɖee nye esia, elabena Yudatɔe Yesu nye. Nu ka tae woava dzudzɔ tadedeagu na Mawu le Yerusalem gbedoxɔa me?

Yesu yi edzi gblɔ be: “Gaƒoƒo la gbɔna, eye wòde azɔ, esime nyateƒetadeagulawo ade ta agu na Fofo la le gbɔgbɔ kple nyateƒe me, elabena le nyateƒe me la, ame siawo tɔgbi dimee Fofo la le be woade ta agu na ye.” (Yohanes 4:23) Ƒe alafa geɖe ye nye ema Yudatɔwo bua Yerusalem gbedoxɔ gã dzeani la be eyae nye yewoƒe tadeaguƒe vevitɔ. Wozɔa mɔ yia gbedoxɔa me zi etɔ̃ le ƒea me ɖasaa vɔwo na woƒe Mawu, Yehowa. (2 Mose 23:14-17) Gake Yesu gblɔ be esiawo katã nu ayi eye “nyateƒetadeagulawo” asubɔ Mawu “le gbɔgbɔ kple nyateƒe me.”

Yudatɔwo ƒe gbedoxɔa nye xɔ aɖe si nɔ teƒe aɖe koŋ si woate ŋu akpɔ kple ŋku. Gake gbɔgbɔ kple nyateƒe ya menye nu siwo woate ŋu akpɔ kple ŋku o, eye womele teƒe aɖe koŋ hã o. Eya ta Yesu ƒe nyaa fia be menye teƒe aɖe alo xɔ aɖe koŋue anye nu vevitɔ le Kristotɔ vavãwo ƒe mawusubɔsubɔ me o, manye Gerizim Toa dzi alo Yerusalem gbedoxɔa me loo, alo teƒe kɔkɔe aɖeke o.

Esi Yesu nɔ dzea ɖom kple Samaria nyɔnua la, Yesu gblɔ hã be “gaƒoƒo” si me tɔtrɔ siawo ava mawusubɔsubɔ me la “gbɔna.” Ɣekaɣie wòanye? Gaƒoƒo la va esime Yesu to eƒe vɔsakua dzi na Yudatɔwo ƒe mawusubɔsubɔ si wotu ɖe Mose ƒe Sea dzi la wu enu. (Romatɔwo 10:4) Gake Yesu gblɔ hã be: “Gaƒoƒo la . . . [de] azɔ.” Susu ka tae? Nu si tae nye be Yesu, ame si nye Mesia la, nɔ nusrɔ̃la siwo awɔ se si wòde le esia yome dzi la nu ƒom ƒu xoxo; egblɔ be: “Mawu nye Gbɔgbɔ, eye ele be ame siwo le ta dem agu nɛ la nade ta agu le gbɔgbɔ kple nyateƒe me.” (Yohanes 4:24) Ekema nu kae wòfia be woasubɔ Mawu le gbɔgbɔ kple nyateƒe me?

Esi Yesu gblɔ be woade ta agu na Mawu le gbɔgbɔ me la, menye ɣlidodo, kpotiti, alo hoowɔwɔ siwo yia edzi le subɔsubɔnuwɔnawo mee wòwɔnɛ o. Ke boŋ nu si wòwɔnɛ ye nye Mawu ƒe gbɔgbɔ kɔkɔea ƒe mɔfiafia, si hã nye nu si kpena ɖe mía ŋu míesea Ŋɔŋlɔawo gɔme. (1 Korintotɔwo 2:9-12) Eye nyateƒe si Yesu wɔnɛ ye nye Biblia ƒe nufiafiawo ŋuti sidzedze vavãtɔ. Eya ta mehiã be míasubɔ Mawu le teƒe tɔxɛ aɖe hafi míaƒe subɔsubɔ nadze eŋu o, ke boŋ ele be wòawɔ  ɖeka kple nu si Biblia fia kpakple gbɔgbɔ kɔkɔea ƒe mɔfiafia.

Ke aleke wòle be Kristotɔwo nabu mɔ didi siwo amewo zɔna ɖasubɔna le teƒe kɔkɔewo lae? Esi Yesu de se be nyateƒetadeagulawo nade ta agu na Mawu le gbɔgbɔ kple nyateƒe me ta la, eme kɔ ƒãa be subɔsubɔ si yia edzi le gbedoɖaƒe alo teƒe kɔkɔe ƒomevi ɖe sia ɖe la medzea mía Fofo si le dziƒo la ŋu le mɔ aɖeke nu o. Gakpe ɖe eŋu la, Biblia na míenya ale si Mawu bua bubu tɔxɛ dede nɔnɔmewɔwɔwo alo legbawo ŋu le mawusubɔsubɔ mee. Egblɔ be, “Misi le trɔ̃subɔsubɔ nu,” eye wògblɔ hã be, “mikpɔ mia ɖokui dzi le trɔ̃wo ŋu.” (1 Korintotɔwo 10:14; 1 Yohanes 5:21) Le esia ta, Kristotɔ vavãwo mayi aɖasubɔ le teƒe aɖe si amewo buna be ele kɔkɔe alo esi doa trɔ̃subɔsubɔ ɖe ŋgɔ la o. Eya ta le nya siwo katã ku ɖe teƒe kɔkɔewo alo gbedoɖaƒewo ŋu ta la, Kristotɔ vavãwo ƒoa asa na teƒe mawo yiyi be yewoaɖasubɔ Mawu.

Gake esia mefia be nu gbegblẽe wònye le Ŋɔŋlɔawo nu be woatia teƒe aɖe si sɔ na nusɔsrɔ̃, gbedodoɖa, alo ŋugbledede o. Takpeƒe si dea bubu Mawu ŋu, afi si nuwo le ɖoɖo nu le, la asɔ nyuie na nusɔsrɔ̃ kple Mawu ƒe Nyaa me dzodzro. Eye menye nu gbegblẽe wònye hã be woawɔ ŋkuɖodzinu, abe yɔdokpe ene, na ame vevi aɖe si ku o. Nu si esia ate ŋu afia koe nye be wole ŋku ɖom amea dzi alo wolɔ̃e vevie. Gake ne wobua teƒe mawo be wole kɔkɔe alo wodea bubu tɔxɛ nɔnɔmewɔwɔwo alo ŋkuɖodzinuwo ŋu le afi ma la, mawɔ ɖeka kple Yesu ƒe nyawo kura o.

Eya ta mahiã be nàyi teƒe kɔkɔe alo gbedoɖaƒe aɖe kple susu be Mawu ase wò gbedodoɖawo kaba wu le teƒe ma o. Eye mɔzɔzɔ ayi teƒe kɔkɔe aɖe mana Mawu nakpɔ ŋudzedze ɖe ŋuwò alo wòayra wò le mɔ tɔxɛ aɖe nu o. Biblia na míenya be Yehowa Mawu, “si nye dziƒo kple anyigba ƒe Aƒetɔ la, menɔa gbedoxɔ siwo wotsɔ asi wɔe la me o.” Gake esia mefia be Mawu le adzɔge tso mía gbɔ o. Míate ŋu ado gbe ɖa nɛ le afi sia afi wòasee, elabena ‘mele adzɔge tso mía dometɔ aɖeke gbɔ o.’—Dɔwɔwɔwo 17:24-27.