Gake kuxi bubue Nicolas kple Céline ya do goe. France alɔdzedɔwɔƒea bia tso wo si be woaʋu ayi hame yeye aɖe me eye wolɔ̃ faa yi. Wogblɔ be: “Le gɔmedzedze mea, dzi dzɔ mí ŋutɔ. Gake medidi o, míeva nɔ mía xɔlɔ̃wo susum elabe mía kple nɔvi siwo le hame yeyea me dome mekpɔ nɔ kplikplikpli o.” a Esi wònye be ʋuʋu yi hame yeye me menɔa bɔbɔe o ta, nu kae nàwɔ be nàkpɔ dzidzɔ kple dzidzeme? Nu kae ame bubuwo ate ŋu awɔ atsɔ akpe ɖe ŋuwò? Nu kae nàte ŋu awɔ atsɔ ade dzi ƒo na nɔvi siwo le hame ma me? Eye aleke woawo hã woate ŋu ade dzi ƒo na wòe?

MƆFIAME ENE SIWO AKPE ÐE ŊUWÒ NÀNƆ TE ÐE NƆNƆMEAWO NU

1. Ðo ŋu ɖe Yehowa ŋu. (Ps. 37:5) Esi woɖe Kazumi, si le Japan la srɔ̃ yi du bubu mea, eva hiã be wòaʋu le hame si me wònɔ ƒe 20 sɔŋ la me. Mɔ ka dzie wòto “tsɔ [eƒe] mɔwo gblẽ ɖe Yehowa si me”? Egblɔ be: “Medoa gbe ɖa na Yehowa gblɔa nye dzimaɖitsitsiwo, nu siwo nana mevɔ̃na kple ale si metsia akogo ɣeaɖewoɣi la nɛ. Ɣesiaɣi si mewɔe alea, edoa ŋusẽm ale si dze.”

Nu kae nàwɔ atsɔ aɖee afia be yeɖoa ŋu ɖe Yehowa ŋu geɖe wu? Ale si ko tsi kple anyigba me nunyiamewo hiã be numiemiewo natsi nyuie la, nenema kee wòle be míanɔ míaƒe xɔse tum ɖo ale be wòasẽ ɖe edzi. Nicolas, si ŋu nya míegblɔ va yi la, kpɔe be esi yede ŋugble le ame siwo tsɔ nanewo sa vɔe hafi te ŋu wɔ Mawu ƒe lɔlɔ̃nu, abe Abraham, Yesu, kple Paulo ene ƒe kpɔɖeŋuwo  ŋua, edo ŋusẽ ye yegaka ɖe edzi geɖe wu be Yehowa akpe ɖe ye ŋu. Ne èsrɔ̃a Biblia le ɖokuiwò si edziedzia, menye ɖeko wòakpe ɖe ŋuwò nànɔ te sesĩe ne nuwo trɔ le wò agbe me o, ke àsrɔ̃ nu nyui geɖe siwo nàte ŋu atsɔ ade dzi ƒo na hame yeyea me tɔwo hã.

2. Mègatsɔ hame yeyea nɔ sɔsɔm kple hame si me nèʋu le o. (Nyagb. 7:10) Esi Jules ʋu tso Amerika yi Benin la, ekpɔe be Benintɔwo ƒe dekɔnuwo to vovo kura. Egblɔ be: “Ewɔna nam be ame sia ame si medo goe la kpɔa mɔ be magblɔ nye agbemeŋutinya na ye.” Esi esia wɔwɔ mema Jules o ta, eva nɔ eɖokui ɖem ɖe aga tso nɔviawo gbɔ. Gake esi wòdze agbagba va dze si nɔviawo nyuie wua, eƒe susu trɔ. Egblɔ be: “Mexɔe se be, anyigbaa ƒe afi ka kee míeɖale o, amegbetɔwo koe mí katã míenye. Míaƒe nuƒoƒo kple nuwɔnawo koe to vovo. Eya ta ele vevie be míaɖe mɔ na amewo woawɔ nu le dzɔdzɔme nu.” Eya ta, mègatsɔ wò hame yeyea nɔ sɔsɔm kple xoxoa o. Nɔvinyɔnu mɔɖela aɖe si ŋkɔe nye Anne-Lise gblɔ be: “Ðe meʋu be mavae kpɔ nu yeyewo, ke menye esiwo gbɔ medzo le o.”

Ele be hamemetsitsiwo hã nakpɔ nyuie be woagatsɔ woƒe hame yeyea anɔ sɔsɔm kple xoxoa o. Ne ale si nɔviawo wɔa nu le hame yeyea me to vovo na ale si wowɔnɛ le afi si nètso la, mefia kokoko be egblẽ o. Eya ta dze agbagba nànya ale si nuwo le le hame yeyea me hafi nàdo wò susu ɖa. (Nyagb. 3:​1, 7b) Anyo be nànɔ nu si nye nyuitɔa wɔm wòanye kpɔɖeŋu na nɔviawo tsɔ wu be nàzi wò susu ɖe wo dzi.—2 Kor. 1:24.

3. Ƒo ɖokuiwò ɖe hamea ƒe dɔwo me. (Flp. 1:27) Nyateƒee, ʋuʋu xɔa ɣeyiɣi hebiaa dɔ geɖe, gake ele vevie ŋutɔ be tso gɔmedzedzea koa, nànɔ kpekpeawo dem le Fiaɖuƒe Akpata me, ne anya wɔ, ale be nànya nɔviawo. Nya lae nye be, ne ƒãa hafi hame yeyea me tɔwo kpɔa wò alo womekpɔa wò kura oa, aleke woawɔ akpe ɖe ŋuwò? Lucinda, kple vianyɔnu eve ʋu yi dugã aɖe me le South Africa. Egblɔ be: “Xɔ̃nye aɖewo ɖo aɖaŋu nam be madze agbagba adze xɔlɔ̃ nɔviawo, ade gbeadzi kpli wo eye maɖo nya ŋu le kpekpeawo me. Míegblɔe na nɔviawo gɔ̃ hã be woate ŋu ava awɔ kpekpe hena gbeadziyiyi le míaƒe aƒe me.”

Teokrasidɔwo wɔwɔ “aduadu” kple nɔviwo le hame yeyea me nye mɔ nyui aɖe si dzi míato akpe asi ɖe “nya nyui la ƒe xɔse la” ŋu. Hamemetsitsiwo de dzi ƒo na Anne-Lise, si ŋu nya míegblɔ va yi be wòadze agbagba ade gbeadzi kple ame sia ame. Aleke esia ɖe vi nɛ? Egblɔ be: “Eteƒe medidi o, mekpɔe be esia nye nu vevi aɖe si akpe ɖe ame ŋu wòaɖe dzi ɖi ne eʋu yi hame yeye me.” Azɔ hã, ne ètsɔa ɖokuiwò nana kpea asi ɖe Fiaɖuƒe Akpata me dzadzraɖodɔwo ŋua, esia  aɖee afia be èva zu hame yeyea me tɔ; mèganye amedzro o. Ne ewɔe alea, nɔviawo axɔ wò alɔ eve, eye wò hã àse le ɖokuiwò me be wozu yeƒe ƒometɔwo.

4. Dze xɔlɔ̃ yeyewo. (2 Kor. 6:​11-13) Mɔ nyuitɔ si dzi nàto adze xɔlɔ̃ amewoe nye be nàtsɔ ɖe le eme na wo. Eya ta dze agbagba nàva ɖo kpekpeawo hafi woadze egɔme, eye nàlala vie le kpakpa megbe ale be nàte ŋu aɖo dze kple nɔviawo ahadze si wo. Dze agbagba nànya nɔviawo ƒe ŋkɔwo. Ne èɖoa ŋku nɔviawo ƒe ŋkɔ dzi, èdoa vivi ɖe wo ŋu, eye wotea ŋu tena ɖe ŋuwò bɔbɔe la, wò nu anyo wo ŋu eye esia ana nàdze xɔlɔ̃ yeyewo bɔbɔe.

Mègawɔ nu be yeadze ame ŋu kple susu be woalɔ̃ yeƒe nya gbɔ o, ke boŋ na nɔviawo nanya wò nyuie. Srɔ̃ Lucinda ƒe kpɔɖeŋua. Egblɔ be: “Xɔlɔ̃ nyuiwo le mía si fifia, elabe míeɖe afɔ gbã kpe nɔviawo va míaƒe aƒe me.”

“MIXƆ MIA NƆEWO”

Ate ŋu asesẽ na ame aɖewo be woayi kpekpe le hame si me womedze si ame aɖeke le o me. Eya ta, nu kae nàte ŋu awɔ atsɔ akpe ɖe ame yeye siwo ʋu va mia gbɔ ŋu? Eyae nye be nàwɔ ɖe aɖaŋu si Apostolo Paulo ɖo dzi be: “Mixɔ mia nɔewo, abe ale si ko Kristo la hã xɔ mii ene.” (Rom. 15:7) Hamemetsitsiwo ate ŋu asrɔ̃ Kristo ƒe kpɔɖeŋua ana ame yeyewo naɖe dzi ɖi. (Kpɔ aɖaka si nye “ Nu Si Nàwɔ Be Nuwo Nayi Nyuie Ne Èle Ʋuʋum Yi Hame Yeye Me.”) Hamea me tɔwo katã, ɖeviwo hã, ate ŋu akpe asi ɖe eŋu be ame yeyewo naɖe dzi ɖi.

Be míaxɔ mía nɔewo bia hã be míawɔ amedzro na wo eye míawɔ nu ŋutɔŋutɔ aɖewo atsɔ akpe ɖe wo ŋu. Le kpɔɖeŋu me, nɔvinyɔnu aɖe lɔ̃ faa zã ɣeyiɣi kplɔ nɔvinyɔnu aɖe si ʋu va wo gbɔ yi dua me hefiae ale si wòawɔ aɖo ʋu ayi teƒeteƒewo. Esia wɔ dɔ ɖe ame yeyea dzi eye wòɖe dzi ɖi.

 WƆ MƆNUKPƆKPƆA ŊU DƆ NÀTSI LE XƆSE ME

Ne ʋetsuvi le tsitsim la, eɖɔa lia tsro zi geɖe hafi eƒe aʋalawo tea ŋu nana wòdzona. Nenema kee ne èʋu yi hame yeye mea, ele be nàɖe nu sia nu si ana wòasesẽ na wò be nàkeke ɖokuiwò me ahakpɔ dzidzɔ le Yehowa subɔsubɔ me la ɖa. Nicolas kple Céline gblɔ be: “Ʋuʋu nana wosrɔ̃a nu yeye geɖe. Esi míeʋu la, eva hiã be míatu nɔnɔme aɖewo ɖo hafi te ŋu trɔ ɖe teƒe yeyea kple amewo ƒe nɔnɔmewo ŋu.” Jean-Charles, si ŋu míeƒo nu tsoe va yi gblɔ ale si esia wɔwɔ ɖe vi na eƒe ƒomea. Egblɔ be: “Esi míeʋu yi hame yeyea me la, mía viwo yi ŋgɔ kabakaba. Le ɣleti ʋɛ aɖewo ko mea, mía vinyɔnua te dɔdeasiwo wɔwɔ le kwasiɖa dome kpekpea me, eye mía viŋutsua hã zu gbeƒãɖela maxɔnyɔnyrɔ.”

Ke nu kae nàwɔ ne wò nɔnɔmea meɖe mɔ na wò be nàʋu, ɖewohĩ ava subɔ le afi si hiahiã geɖe le o? Àte ŋu awɔ ɖe aɖaŋuɖoɖo siwo le nyati sia me dometɔ aɖewo dzi le hame si me nèlea me, abe ɖe nèʋu yi hame yeye me ene. Ðo ŋu ɖe Yehowa ŋu, ƒo ɖokuiwò ɖe hamea ƒe dɔwo me, wɔ ɖoɖo nàyi gbeadzi kple nɔviawo eye nàdze xɔlɔ̃ yeyewo alo nàna wò kple xɔ̃wòwo dome naganyo ɖe edzi. Àte ŋu ate ɖe ame yeyewo alo ame siwo dzi nu mede o ŋu eye nàwɔ nu ŋutɔŋutɔwo atsɔ akpe ɖe wo ŋu. Esi lɔlɔ̃e dea dzesi Kristotɔ vavãwo ta, esia wɔwɔ ana wò ŋutɔ hã nàgate ɖe Yehowa ŋu geɖe wu. (Yoh. 13:35) Àte ŋu aka ɖe edzi be “nenem vɔsa siawo dzea Mawu ŋu ŋutɔ.”—Heb. 13:16.

Nyateƒee, togbɔ be ʋuʋu yi hame yeye me mele bɔbɔe o hã, Kristotɔ geɖe te ŋu kpɔ dzidzedze, eye wò hã àte ŋui! Anne-Lise gblɔ be: “Ʋuʋu yi hame bubuwo me kpe ɖe ŋunye meʋu nye dzi me gbadzaa.” Kazumi lɔ̃ ɖe edzi be “Yehowa kpena ɖe ame siwo ʋu yi hame yeye me ŋu le mɔ siwo womesusu kpɔ o nu.” Ke Jules ya ɖe? Eya hã gblɔ be: “Xɔlɔ̃ siwo medze le hame yeyea me kpe ɖe ŋunye nye dzi dze eme. Fifia hame yeyea me tɔwo zu nye ƒometɔwo eye asesẽ nam ŋutɔ be madzo le wo gbɔ.”