NYATEƑENYA

Dzimaɖitsitsi nana ame tsia dzodzodzoe, vɔ̃na alo tɔtɔna. Esi wònye nɔnɔmewo tea ŋu trɔna kpata ta la, mía dometɔ ɖe sia ɖe ate ŋu atsi dzimaɖi ɣeaɖewoɣi.

NYA SI BIBLIA GBLƆ

Fia David ŋlɔ bena: “Va se ɖe ɣekaɣi matsi dzimaɖi eye nuxaxa nanɔ nye dzi me gbe sia gbe?” (Psalmo 13:2) Nu kae kpe ɖe David ŋu wònɔ te ɖe nɔnɔmea nu? Egblɔ eƒe dzimenyawo na Mawu le gbedodoɖa me, eye wòka ɖe Mawu ƒe lɔlɔ̃ si nu metsina o la dzi. (Psalmo 13:5; 62:8) Le nyateƒe me la, Mawu le mía kpem be míadro míaƒe agbawo ɖe ye dzi. Biblia gblɔ le 1 Petro 5:7 be, ‘midro miaƒe dzimaɖitsitsiwo katã ɖe [Mawu] dzi, elabena eléa be na mi.’

Zi geɖe la, nanewo li míate ŋu awɔ atsɔ aɖe dzimaɖitsitsiwo dzi akpɔtɔ. Le kpɔɖeŋu me, esi Biblia ŋlɔla Paulo ‘tsi dzimaɖi ɖe hameawo katã ŋu’ la, edze agbagba vevie fa akɔ na ame siwo ŋu wòtsi dzia ɖo, eye wòde dzi ƒo na wo. (2 Korintotɔwo 11:28) Le go sia me la eƒe dzimaɖitsitsia ɖe vi, elabena eʋãe wòkpe ɖe wo ŋu ale si dze. Ate ŋu anɔ alea le míawo hã gome. Gake ne míetsi dzimaɖi ɖe nane ŋu evɔ míewɔ naneke tso eŋu o la, afia be míetsɔ ɖeke le eme o.—Lododowo 17:17.

‘Miganɔ miawo ŋutɔ miaƒe nyonyo ko dim o, ke midi ame bubuwo hã ƒe nyonyo.’—Filipitɔwo 2:4.

NYATEƑENYA

Amewo tea ŋu tsia dzi ɖe vodada siwo wowɔ va yi, woƒe etsɔme alo ganyawo ŋu. *

NYA SI BIBLIA GBLƆ

Dzitsitsi ɖe vodada siwo ame wɔ va yi ŋu: Hafi ame aɖewo nava zu Kristotɔwo le ƒe alafa gbãtɔ me la, wo dometɔ aɖewo nye ahamulawo, adzodalawo, gbɔdɔdɔ ƒe agbe gbegblẽ nɔlawo kple fiafitɔwo. (1 Korintotɔwo 6:9-11) Le esi woatsi dzi ɖe agbe siwo wonɔ va yi ŋu teƒe la, wotrɔ woƒe agbenɔnɔ eye woka ɖe edzi be Mawu atsɔe ake yewo, elabena etsɔna kena faa. Psalmo 130:4 gblɔ be, “Gbɔwòe tsɔtsɔke vavãtɔ le, ne woavɔ̃ wò.”

Dzimaɖitsitsi ɖe etsɔme ŋu: Yesu Kristo gblɔ be, “migatsi dzimaɖi gbeɖe le etsɔ si gbɔna ŋu o, elabena etsɔ si gbɔna la kple eya ŋutɔ ƒe dzimaɖitsitsiwoe.” (Mateo 6:25, 34) Eƒe nya siawo gɔme ɖe? Efia be ele be míatsi dzi ɖe egbe ƒe kuxiwo ko ŋu. Mele be míatsɔ etsɔ si gbɔna ƒe kuxiwo ava kpe ɖe egbetɔwo ŋu o, elabena esia ate ŋu ana míatsɔ dzitsitsi awɔ nyametsotso gbegblẽwo. Azɔ hã, nenɔ susu me na wò be nu siwo ŋu nètsia dzi ɖo la dometɔ aɖewo mava dzɔ gɔ̃ hã o.

Dzitsitsi ɖe ga ŋu: Nunyala Salomo do gbe ɖa kpɔ be: “Mègana mada ahe alo anye kesinɔtɔ o.” (Lododowo 30:8) Ke boŋ nu siwo nɔ esi la dze eŋu, elabena esia ŋue Mawu kpɔa ŋudzedze ɖo. Hebritɔwo 13:5 gblɔ be, “Mina miaƒe agbenɔnɔ navo tso galɔlɔ̃ me, eye nu siwo le mia si fifia la nadze mia ŋu. Elabena [Mawu] gblɔ be: ‘Nyemaɖe asi le ŋuwò akpɔ o, eye nyemagblẽ wò ɖi hã akpɔ o.’” To vovo na ga si dome ate ŋu agblẽ, eye wòdzɔna nenema hã la, Mawu ya magblẽ ame siwo ɖoa ŋu ɖe eŋu eye wonɔa agbe tsɛ la ɖi gbeɖe o.

“Nyemekpɔ wogblẽ ame dzɔdzɔe ɖi loo, alo be viawo ɖo abologbe kpɔ o.”—Psalmo 37:25.

NYA SIWO AMEWO GBLƆNA

Nyadzɔdzɔŋlɔla aɖe si ŋkɔe nye Harriet Green ŋlɔ le ƒe 2008 me ɖe nyadzɔdzɔgbalẽ aɖe (The Guardian) me be: “Nu siwo ana amewo natsi dzi la le dzidzim ɖe edzi.” Le ƒe 2014 me la, aƒetɔ Patrick O’Connor ŋlɔ ɖe nyadzɔdzɔgbalẽ aɖe (The Wall Street Journal) me be, “Amerikatɔwo va le dzimaɖi tsim fifia wu ɣeyiɣi ɖe sia ɖe.”

NYA SI BIBLIA GBLƆ

“Nuxaxa le dzi me ɖe wòtea ame ƒe dzi ɖe anyi, ke nya nyui nana dzi kpɔa dzidzɔ.” (Lododowo 12:25) ‘Nya nyuitɔ’ kekeake si li lae nye ‘Mawu Fiaɖuƒe ŋuti nya nyuia.’ (Mateo 24:14) Fiaɖuƒe ma, si nye Mawu ƒe dziɖuɖu, awɔ nu si míawo míate ŋu awɔ gbeɖe o—aɖe nu siwo katã gbɔ dzimaɖitsitsiwo tsona la ɖa, eye wòaɖe dɔléle kple ku hã ɖa! “[Mawu] atutu aɖatsi sia aɖatsi ɖa le [míaƒe] ŋkume, eye ku maganɔ anyi akpɔ o, konyifafa kple ɣlidodo kpakple vevesese hã maganɔ anyi o.”—Nyaɖeɖefia 21:4.

“Mawu si naa mɔkpɔkpɔ la natsɔ dzidzɔ kple ŋutifafa katã ayɔ mi fũu le esi miexɔ edzi se ta.”—Romatɔwo 15:13.