NYA SIWO AME AÐEWO GBLƆNA

Israel-viwo subɔ “aʋawɔwɔ mawu” si ʋukɔkɔɖi dzɔa dzi na.

NYA SI BIBLIA GBLƆ

Dukɔ siwo Israel-viwo tsrɔ̃ la wɔa ŋutasẽnu vɔ̃ɖiwo kple ŋunyɔnuwo. Esia ƒe ɖewoe nye lãwo gbɔ dɔdɔ, ƒometɔwo gbɔ dɔdɔ kple ɖeviwo tsɔtsɔ sa vɔe. Esi Mawu na mɔnukpɔkpɔ wo ƒe geɖe be woatrɔ megbe la, egblɔ be: “Nu siawo katãe dukɔ siwo nyam mele ɖa le mia ŋgɔ la tsɔ ƒo ɖi wo ɖokuiwoe.”—3 Mose 18:21-25; Yeremiya 7:31.

“Dukɔ siawo ƒe vɔɖivɔ̃ɖi tae Yehowa wò Mawu le wo nyam le ŋgɔwò ɖo.”—5 Mose 9:5.

ÐEWOHĨ ÈDE DZESII BE

Le aʋa geɖe siwo wowɔ va yi me la, subɔsubɔhakplɔla siwo le akpa evea siaa gblɔna be Mawu le megbe na yewo. Agbalẽ aɖe gblɔ be: “Subɔsubɔhawo de nu aʋa siwo katã kloe wowɔ va yi la me.”—The Causes of War.

NYA SI BIBLIA GBLƆ

Womede se na Kristotɔwo be woawɔ aʋa kple woƒe futɔwo o. Apostolo Paulo ŋlɔ agbalẽ na ehati Kristotɔwo be: “Ne anya wɔ, eye wòanye nu si atso mia gbɔ la, minɔ anyi kple amewo katã le ŋutifafa me. Lɔlɔ̃tɔwo, migabia hlɔ̃ na mia ɖokuiwo o.”—Romatɔwo 12:18, 19.

Yesu megblɔ na eƒe nusrɔ̃lawo be woayi aʋa o, ke boŋ egblɔ na wo be: “Miyi edzi mialɔ̃ miaƒe futɔwo, eye minɔ gbe dom ɖa ɖe ame siwo tia mia yome la ta, ne miazu mia Fofo si le dziƒowo la ƒe viwo.” (Mateo 5:44, 45) Ne aʋa dzɔ le dukɔ si me wole me gɔ̃ hã la, mele be Kristotɔwo nanye “xexea ƒe akpa aɖeke o.” (Yohanes 15:19) Ne Mawu di be ye subɔla siwo le dukɔwo katã me nalɔ̃ woƒe futɔwo eye woaganye xexea ƒe akpa aɖeke oa, ke aleke wòate ŋu adzɔe be wòade akpa aɖe dzi le aʋa si wɔm wole la me?

“Nye Fiaɖuƒe menye xexe sia ƒe akpa aɖeke o. Ne ɖe nye Fiaɖuƒe nye xexe sia ƒe akpa aɖe la, anye ne nye dɔlawo wɔ avu be woagatsɔm ade asi na Yudatɔwo o. Ke abe ale si wòle ene la, nye Fiaɖuƒe metso afi sia o.”—Yohanes 18:36.

NYA SIWO AME AÐEWO GBLƆNA

Aʋawɔwɔwo mate ŋu atɔ o. Agbalẽ aɖe gblɔ be: “Aʋawɔwɔ ayi edzi ɖaa, naneke mefia be ŋutifafa mavɔ ava xɔ anyigba katã dzi le xexe sia me o.”—War and Power in the 21st Century.

NYA SI BIBLIA GBLƆ

Aʋawɔwɔ awu enu ne megadzroa ame aɖeke be woaho aʋa o. Ke hã, Mawu Fiaɖuƒea si nye dziɖuɖu ŋutɔŋutɔ si aɖu dzi tso dziƒo la agblẽ aʋawɔnuwo dome le anyigba dzi, eye wòafia amegbetɔwo ale si woawɔ ŋutifafa. Biblia ka ɖe edzi na mí be Mawu atso “nya me na dukɔ sesẽwo va se ɖe didiƒe ke. Woatsɔ woƒe yiwo atu agblenuwoe, eye woatsɔ woƒe akplɔwo atu hɛ gobɛwoe. Dukɔ magatsɔ yi ɖe dukɔ ŋu azɔ o, eye womagasrɔ̃ aʋawɔwɔ azɔ o.”—Mika 4:3.

Biblia gblɔ be ne Mawu Fiaɖuƒea le dzi ɖum la, amegbetɔwo ƒe dziɖuɖuwo maganɔ anyi anɔ woawo ŋutɔ ƒe viɖewo yome tim o, eye woƒe ɖoɖo siwo nana wo teviwo dzea aglã maganɔ anyi o, eye nazãbubu si hea masɔmasɔ dea gbe vovovo dolawo dome hã nu ayi. Esia atsi aʋawɔwɔ nu. Mawu do ŋugbe be: “Womawɔ vɔ̃ aɖeke o, eye womahe gbegblẽ [avɛ] o, elabena sidzedze Yehowa axɔ anyigba la dzi, abe ale si tsi yɔ atsiaƒu mee ene.”—Yesaya 11:9.

“Etsia aʋawɔwɔwo nu le anyigba bliboa dzi. Eŋea dati, eflia akplɔ kakɛkakɛe, eye wòtɔa dzo aʋatasiaɖamwo.”—Psalmo 46:9.