“NU SI WOMAŊLƆ BE GBEÐE O!” Nenemae ame geɖe yɔ “Xexemewɔwɔ Ƒe Drama” lae. Eva ɖe ɣeyiɣi nyuitɔ dzi, eye ame siwo kpɔe la maŋlɔe be akpɔ gbeɖe o. Nyateƒee, “Xexemewɔwɔ Ƒe Drama” la ɖi ɖase gã aɖe tso Yehowa ŋu, eye esia he kafukafu vae nɛ. Eteƒe medidi kura hafi Hitler ƒe dziɖuɖua ti Yehowa ƒe ame siwo le Europa la yome kutɔkutɔe o. Gake nu kae nye “Xexemewɔwɔ Ƒe Drama” la?

Le ƒe 1914 me la, Yehowa ƒe amewo ƒe dɔwɔƒegã si le Brooklyn, New York, U.S.A. la ɖe “Xexemewɔwɔ Ƒe Fotoɖeɖefia” ɖe go le Eŋlisigbe me. Enye gaƒoƒo enyi ƒe fotoɖeɖefia kple sinima si me amadede kple gbeɖiɖiwo le. Ame miliɔn geɖe ye kpɔ “Fotoɖeɖefia” sia le xexea me godoo. Woɖe fotoɖeɖefia sia ƒe totoɖeme hã ɖe go le ƒe 1914 me eye woyɔe be “Eureka Drama.” Gake kaka ƒe 1920 ƒeawo naɖo la, fotoawo, sinimaawo kple mɔ̃ siwo wozãna tsɔ ɖea ɖeɖefia la va do xoxo ŋutɔ. Ke hã ame gbogbo aɖewo gadi be yewoakpɔ “Fotoɖeɖefia” la. Le kpɔɖeŋu me, ame siwo le Germany ƒe du si nye Ludwigsburg la bia be, “Ɣekaɣie woagaɖe ‘Fotoɖeɖefia’ la na mí ake?” Nu ka wɔ ge míala?

Be woagate ŋu aɖe Fotoɖeɖefia sia afia amewo ake la, Betel ƒome si le Magdeburg, Germany, la teƒenɔlawo ƒle filmwo tso nyadzɔdzɔdɔwɔƒe aɖe si le Paris, France, la si, eye woƒle fotowo le fotodɔwɔƒe siwo le Leipzig kple Dresden si le ƒe 1920 ƒeawo me. Wotrɔ asi le nu siawo kple “Fotoɖeɖefia” ƒe foto xoxo siwo gakpɔtɔ li, siwo woagate ŋu azã la ŋu.

Nɔviŋutsu Erich Frost, si nye haƒola bibi aɖe la, kpa ha siwo anɔ ɖiɖim le ɖeɖefiaawo me. Woɖe nuƒo siwo woƒo de eme la ƒe akpa aɖewo tso míaƒe agbalẽ si nye Creation (Xexemewɔwɔ) me. Eya tae wona ŋkɔ “Xexemewɔwɔ Ƒe Fotoɖeɖefia” yeye la be “Xexemewɔwɔ Ƒe Drama” ɖo.

Didime ɖekae le Drama yeyea kple “Fotoɖeɖefia” la si—gaƒoƒo enyi—eye amewo nɔa ekpɔm vivivi fiẽ sia fiẽ. Woɖe nu siwo dzɔ le xexemewɔwɔ ƒe ŋkeke adeawo me la fia tsitotsito, wodzro Biblia kple ŋutinya bubuwo me, eye wona wòdze ƒãa be alakpasubɔsubɔ kplɔ ameƒomea trae. Woɖe “Drama” yeye la fia le Austria, Germany, Luxemburg, kple Switzerland, eye woɖee fia Germanygbedola siwo ƒo ƒu ɖe teƒe bubuwo hã.

Erich Frost gblɔ be: “Le Dramaa ɖeƒea la, mede dzi ƒo na nɔviawo, vevietɔ haƒolawo, be woatsa le nukpɔlawo dzi ama míaƒe  agbalẽ kple agbalẽvi dodzidzɔnameawo na wo le ɖiɖiɖemeɣia. Agbalẽ siwo míema to mɔnu sia dzi la sɔ gbɔ kura wu esiwo míemana tso aƒe me yi aƒe me.” Johannes Rauthe, ame si kpɔa ɖeɖefiaawo dzi le Poland kple egbegbe Czech Republic la, ɖo ŋku edzi be nukpɔla geɖe tsɔa woƒe adrɛs naa yewo be yewoava srã wo kpɔ. Wozãa adrɛs mawo trɔna yia ameawo gbɔ ɖaɖoa dze tuameɖowo kpli wo.

Le ƒe 1930 ƒeawo me la, teƒe siwo míeɖea “Xexemewɔwɔ Ƒe Drama” le la yɔna tititi, eye amewo ƒoa nu nyui tso Yehowa Ðasefowo ŋu le afi sia afi. Kaka ƒe 1933 naɖo la, ame siwo kpɔ dramaa le Germany ade ame miliɔn ɖeka kloe. Käthe Krauss gblɔ be, “Míezɔa afɔ kilometa ewo toa avewo, togbɛwo, kple baliwo me yina ɖakpɔa Drama la gazɔnɛ nenema ke gbɔna le ŋkeke atɔ̃ siwo katã dzi woɖee fia la me.” Else Billharz hã gblɔ be: “‘Xexemewɔwɔ Ƒe Drama’ lae na meva lɔ̃ nyateƒea.”

Alfred Almendinger gblɔ be, esi ye dada yi ɖakpɔ Dramaa hetrɔ gbɔ la, “dzi dzɔe ale gbegbe be wòyi ɖaƒle Biblia eye wònɔ nya ‘ŋutiklɔdzo’ dim le eme.” Esi mekpɔ nya ma le Biblia me o ta la, edzudzɔ sɔlemedede eye wòva xɔ nyɔnyrɔ. Erich Frost gblɔ be: “To ‘Xexemewɔwɔ Ƒe Drama’ dzi la, ame gbogbo aɖewo va nyateƒea me.”—3 Yoh. 1-3.

Ɣeyiɣi si me tututu ame gbogbowo nɔ vivi dom ɖe “Drama” la ŋue Nazitɔwo va kpɔ ŋusẽ ɖe Europa ƒe akpa gãtɔ dzi. Tso ƒe 1933 ƒe gɔmedzedze la, woɖo asi Ðasefowo ƒe dɔa dzi le Germany. Tso ɣemaɣi va se ɖe xexemeʋa evelia ƒe nuwuwu le ƒe 1945 me la, woti Yehowa subɔla siwo nɔ Europa la yome vevie ŋutɔ. Wode Erich Frost gaxɔ me abe ƒe enyi sɔŋ ene. Gake etsi agbe eye emegbe wòva subɔ le Betel le Wiesbaden, Germany. Enyo ŋutɔ be “Xexemewɔwɔ Ƒe Drama” si womaŋlɔ be gbeɖe o la va ɖe ɣeyiɣi si sɔ dzi hekpe ɖe Kristotɔ geɖe ŋu dzi ɖo wo ƒo be woate ŋu ado dzi le xɔse ƒe dodokpɔ siwo va wo dzi le Xexemeʋa II me la me!—Nu nyui siwo le míaƒe nudzraɖoƒe le Germany.