1, 2. Nu kae na amegbetɔwo to vovo tso lãwo gbɔ?

AMEGBETƆWO ƒe ahɔhɔ̃ le etɔxɛ. Le kpɔɖeŋu me, ŋutete le mía si be míasrɔ̃ gbe. Gbesese kpena ɖe mía ŋu míexlẽa nu, ŋlɔa nu, ƒoa nu hesea nya siwo amewo gblɔna la gɔme. Míezãa gbegbɔgblɔ tsɔ doa gbe ɖa hedzia kafukafuhawo na Yehowa. Esia wɔe be míeto vovo tso lãwo gbɔ. Va se ɖe fifia la, nuwɔwɔwo ŋuti nunyalawo mete ŋu se ale si míaƒe ahɔhɔ̃a tea ŋu wɔa nukunu siawoe la gɔme bliboe o.

² Yehowa ye na gbegbɔgblɔ ƒe ŋutetea mí. (Psalmo 139:14; Nyaɖeɖefia 4:11) Egana nu bubu aɖe hã mí si na míeto vovo tso lãwo gbɔ. Eyae nye be, ‘Ewɔ mí ɖe eƒe nɔnɔme nu.’ Tiatiawɔwɔ ƒe ablɔɖe le mía si. Eya ta míate ŋu atiae be míazã gbegbɔgblɔ ƒe nunana la atsɔ asubɔ Yehowa ahakafui.—1 Mose 1:27.

3. Nu kae Yehowa tsɔ na mí si nana míedzea nunya?

³ Yehowa fia ale si míasubɔe ahakafui la mí to Biblia si  wòtsɔ na mí la dzi. Biblia bliboa alo eƒe akpa aɖe le gbegbɔgblɔ siwo wu 2,800 me fifia. Ne míedea ŋugble le Biblia me nyawo ŋu la, ana míanya Mawu ƒe susu ale be míava nɔ nuwo ŋu bum abe ale si wòbua woe ene. (Psalmo 40:5; 92:5; 139:17) Yehowa ƒe susu nyanya nana míedzea nunya eye wòkplɔa mí yia agbe mavɔ me.—Xlẽ 2 Timoteo 3:14-17.

4. Ŋugbledede gɔme ɖe, eye nyabiase kawo mee míadzro?

⁴ Ŋugbledede fia be míatsɔ míaƒe susu katã aɖo nane ŋu, eye míabu tame le eŋu vevie ŋuɖɔɖotɔe. (Psalmo 77:12; Lododowo 24:1, 2) Eɖea vi gbogbotɔ na mí ne míedea ŋugble le nu siwo míesrɔ̃na tso Yehowa kple Yesu ŋu la ŋu. (Yohanes 17:3) Míakpɔ nyabiase siwo gbɔna ƒe ŋuɖoɖowo le nyati sia me: Aleke míaxlẽ nu be wòanɔ bɔbɔe na mí be míade ŋugble? Nu kawo ŋue míate ŋu ade ŋugble le? Eye nu kae akpe ɖe mía ŋu be míanɔ ŋugble dem edziedzi ahana wòavivi mía nu?

5, 6. Nu kae akpe ɖe ŋuwò be wò susu nanɔ nu si xlẽm nèle ŋu eye nàse egɔme nyuie wu?

⁵ Ède dzesii be nanewo li siwo mehiã be nàde ŋugble hafi awɔ wo o, abe yagbɔgbɔ, azɔlizɔzɔ, alo gasɔdodo enea? Nublanuitɔe la, ate ŋu adzɔ ɣeaɖewoɣi be nànɔ nu xlẽm evɔ wò susu manɔ eŋu o. Ðewomahĩ ànɔ nu bubuwo ŋu bum gɔ̃ hã esime nèle nua xlẽm. Nu kae nàwɔ atsɔ axe mɔ na esia? Ele vevie be nàtsɔ wò susu katã aɖo nu si xlẽm nèle ŋu, eye nànɔ tame bum le gɔmesese si le eŋu la ŋu vevie. Ne èxlẽ agbalẽ aɖe ƒe memama ɖeka wu enu alo èɖo tanya sue aɖe dzi la, tɔ nàde ŋugble le nu si nèxlẽ ŋu. Bu nufiame si le eme la ŋu, eye nàdze agbagba ase egɔme nyuie.

⁶ Nuwɔwɔwo ŋuti nunyalawo de dzesii be míeɖoa ŋku nu si míexlẽ la dzi bɔbɔe wu ne míeke nu xlẽe. Mía Wɔlaa nya esia nyuie, eya tae wògblɔ na Yosua be wòaxlẽ Segbalẽ la “kple gbe blewu,” si fia be wòaxlẽe wòaɖi eya ŋutɔ nase. (Xlẽ Yosua 1:8.) Ne èkɔa gbe dzi xlẽa Biblia la, akpe ɖe ŋuwò be wò susu nanɔ eŋu eye nàte ŋu aɖo ŋku edzi bɔbɔe wu.

7. Ɣeyiɣi kae nye nyuitɔ si míade ŋugble le Biblia me nyawo ŋu? (Kpɔ nɔnɔmetata si le nyati sia ƒe gɔmedzedze.)

⁷ Ehiã agbagbadzedze be míade ŋugble eye míaƒe susu nanɔ nu siwo míesrɔ̃na ŋu. Esia tae mele be ɖeɖi nate mía ŋu hafi míanɔ ŋugble dem o, eye anyo wu be míanɔ teƒe si tomefafa le, si naneke mahe míaƒe susu o hafi ade ŋugble. Hakpala David dea ŋugble ne enyɔ le eƒe aba dzi le zã me. (Psalmo 63:6) Ame deblibo Yesu gɔ̃ hã yia teƒe si ɖoɖoezizi le ɖadea ŋugble hedoa gbe ɖa.—Luka 6:12.

8. (a) Nu kawo ŋue míate ŋu ade ŋugble le? (b) Nu kae Yehowa wɔna ne míele nu ƒom tso eyama ŋu na amewo?

⁸ Tsɔ kpe ɖe nu siwo míexlẽna le Biblia me ŋu la, nu bubu geɖewo li siwo ŋu míate ŋu ade ŋugble le. Le kpɔɖeŋu me, ne èkpɔ Yehowa ƒe nuwɔwɔ aɖe si wɔ nuku na wò la, tɔ nàbia ɖokuiwò be, ‘Nu kae esia fiam tso Yehowa ŋu?’ Nuwo ŋu bubu alea akpe ɖe ŋuwò be nàda akpe na Yehowa le gbedodoɖa me. Eye ne amewo domee nèle la, anyo be nàgblɔ ale si nèse le ɖokuiwò me la na wo. (Psalmo 104:24; Dɔwɔwɔwo 14:17) Yehowa ɖoa to senɛ eye wòdzea eŋu ne míedea ŋugble, doa gbe ɖa heɖoa dze tso eyama ŋu na mía nɔewo. Biblia ka ɖe edzi na mí be: “Woŋlɔ ŋkuɖodzigbalẽ le eŋkume tso evɔ̃lawo kple ame siwo dea ŋugble le eƒe ŋkɔ ŋu la ŋu.”—Malaki 3:16.

9. (a) Nu kawo ŋue Paulo gblɔ na Timoteo be wòade ŋugble le? (b) Nu kawo ŋue míade ŋugble le ne míele dzadzram ɖo ɖe subɔsubɔdɔa ŋu?

⁹ Apostolo Paulo gblɔ na Timoteo be wòade ŋugble le ale si eƒe nuƒoƒo, nuwɔna kple nufiafiawo awɔ dɔ ɖe amewo dzii ŋu. (Xlẽ 1 Timoteo 4:12-16.) Wò hã àte ŋu ade ŋugble le nu siawo ke ŋu. Le kpɔɖeŋu me, ele be nàdi ɣeyiɣi ade ŋugble ne èle dzadzram ɖo be yeava srɔ̃ nu kple Biblia nusrɔ̃vi aɖe. Bu wò  nusrɔ̃via ŋu, eye nàdze agbagba adi nyabiase alo kpɔɖeŋu aɖe si akpe ɖe eŋu wòase nyateƒea gɔme. Ne èdzra ɖo ɖe Biblia nusɔsrɔ̃a ŋu alea la, ado ŋusẽ wò ŋutɔ wò xɔse eye àzu Biblia fiala nyui si me dzo geɖe le. Aɖe vi na wò hã ne èdea ŋugble hafi yia gbeadzi. (Xlẽ Ezra 7:10.) Ðewohĩ àte ŋu axlẽ Dɔwɔwɔwo ƒe agbalẽa ƒe ta ɖeka be wòakpe ɖe ŋuwò nàde dzo wò subɔsubɔdɔa me. Àte ŋu ade ŋugble le mawunyakpukpui kple agbalẽ siwo nèdi be yeazã gbe ma gbe hã ŋu. (2 Timoteo 1:6) Eyome de ŋugble le ame siwo le wò anyigbamamaa me kple nya si nàgblɔ atsɔ anyɔ woƒe ɖetsɔleme la ŋu. Ne èdzra ɖo alea la, ana nàzã Biblia la nyuie atsɔ aɖi ɖase na amewo.—1 Korintotɔwo 2:4.

10. Nu nyui kawo hã ŋue míate ŋu ade ŋugble le?

¹⁰ Nu bubu kawo hã ŋue míate ŋu ade ŋugble le? Ne èŋlɔ nya veviwo ɖi le dutoƒonuƒo aɖe ƒoɣi, alo le takpekpe sue alo gãawo me la, di ɣeyiɣi nàto wo me. Ne èle esia wɔm la, bia ɖokuiwò be, ‘Nu kae mesrɔ̃ tso Mawu ƒe Nya la me kple eƒe habɔbɔa gbɔ.’ Àgate ŋu ade ŋugble le Gbetakpɔxɔ kple Nyɔ! kpakple agbalẽ yeye siwo woɖe ɖe go la me nyawo ŋu. Ne èle Ƒegbalẽa xlẽm eye nèxlẽ nuteƒekpɔkpɔ aɖe vɔ la, tɔ vie nàde ŋugble le eŋu ale be wòawɔ dɔ ɖe dziwò. Nenema kee ne èle míaƒe agbalẽwo xlẽm la, ɖewohĩ àdi be yeate fli ɖe susu veviawo te alo aŋlɔ nya kpui aɖewo ɖe axadzi. Esia akpe ɖe ŋuwò ne èle dzadzram ɖo ɖe tɔtrɔyi, alẽkpɔkplɔ ƒe sasrãkpɔ, alo dɔdeasi aɖe ŋu. Vevietɔ wu la, ŋugbledede le nu si xlẽm nèle ŋu aʋu mɔ be nufiamea nade dzi gbɔ na wò, eye ana nàkpɔ ɣeyiɣi ado gbe ɖa ada akpe na Yehowa ɖe nu nyui siwo srɔ̃m nèle la ta.

11. Agbalẽ kae nye vevitɔ si ŋu míade ŋugble le, eye aleke esia wɔwɔ akpe ɖe ŋuwò etsɔme? (Kpɔ etenuŋɔŋlɔa hã.)

¹¹ Le nyateƒe me la, Biblia ye nye agbalẽ vevitɔ si ŋu míade ŋugble le. Ke ne gbe ɖeka womeɖe mɔ be Biblia nanɔ asiwò o ɖe? * (Kpɔ etenuŋɔŋlɔa.) Ame aɖeke mate ŋu axe mɔ na wò be màgade ŋugble le nu siwo nèsrɔ̃ va yi, abe mawunyakpukpui siwo dzɔa dzi na wò alo Fiaɖuƒeha siwo nèlé ɖe susu me ene ŋu o. (Dɔwɔwɔwo 16:25) Mawu ƒe gbɔgbɔa akpe ɖe ŋuwò nàɖo ŋku nu siwo nèsrɔ̃ la dzi, eye esia akpe ɖe ŋuwò nàyi edzi awɔ nuteƒe.—Yohanes 14:26.

12. Gbe sia gbe Biblia xexlẽ ƒe ɖoɖo kae nàte ŋu awɔ?

¹² Ale si nàte ŋu awɔ ɖoɖo ɖe wò gbe sia gbe Biblia xexlẽ ŋu ƒe kpɔɖeŋu ɖekae nye be, nàtia ŋkeke aɖewo be nàxlẽ  Teokrasi Subɔsubɔ Suku ƒe kwasiɖa sia kwasiɖa ƒe Biblia xexlẽa ahade ŋugble le eŋu. Le ŋkeke bubuwo dzi la, àte ŋu axlẽ Mateo, Marko, Luka kple Yohanes ƒe Nya Nyuiawo be nàde ŋugble le nya siwo Yesu gblɔ kple nu siwo wòwɔ ŋu. (Romatɔwo 10:17; Hebritɔwo 12:2; 1 Petro 2:21) Agbalẽ aɖe hã le mía si si ƒo nu tso nu siwo dzɔ le Yesu ƒe agbenɔɣi ŋu ɖe ɖoɖo nu. Agbalẽ sia ate ŋu akpe ɖe ŋuwò be Nya Nyuiawo xexlẽ naɖe vi na wò geɖe wu.—Yohanes 14:6.

13, 14. Nu ka tae wòle vevie be míanɔ ŋugble dem le Yehowa kple Yesu ŋu, eye nu kae esia aʋã mí míawɔ?

¹³ Ŋugbledede le Yehowa kple Yesu ŋu akpe ɖe mía ŋu míazu Kristotɔ tsitsiwo eye míaƒe xɔse me nasẽ. (Hebritɔwo 5:14; 6:1) Ame si media ɣeyiɣi dea ŋugble le Mawu ŋu o ƒe ƒomedodo kple Yehowa me ate ŋu anɔ gbɔdzɔgbɔdzɔm vivivi eye wòava gbe Mawu mlɔeba. (Hebritɔwo 2:1; 3:12) Yesu xlɔ̃ nu mí be ne mímesea Mawu ƒe Nya la, alo xɔnɛ, “kple dzi nyui si nyo” o la, míate ŋu ‘alé eme ɖe asi’ o. Ke boŋ “agbe sia me dzimaɖitsitsiwo, kesinɔnuwo kple dzidzɔdonamenuwo” ahe mí.—Luka 8:14, 15.

¹⁴ Eya ta mina míayi edzi anɔ ŋugble dem le Biblia me nyawo ŋu be míanya Yehowa nyuie. Esia aʋã mí míasrɔ̃ eyama kple eƒe nɔnɔme nyuiawo geɖe wu. (2 Korintotɔwo 3:18) Míate ŋu anɔ nu srɔ̃m tso mía Fofo si le dziƒo ŋu ahanɔ eƒe kpɔɖeŋu srɔ̃m yi ɖe mavɔmavɔ me. Mɔnukpɔkpɔ gã kae nye esi!—Nyagblɔla 3:11.

15, 16. (a) Vi kae ŋugbledede le Yehowa kple Yesu ŋu ɖe na wò? (b) Nu ka tae wòsesẽna be míade ŋugble, gake nu ka tae wòle be míaku kutri awɔe?

¹⁵ Ŋugbledede le Yehowa kple Yesu ŋu ana hã be míatsɔ dzo ɖe nyateƒea ŋu. Dzo si le mewò ade dzi ƒo na nɔviwo kple ame siwo nèɖea gbeƒã na. Eye zi ale si nèle ŋugble dem le fe si Yehowa xe ɖe mía ta to Yesu dzi ŋu la, zi nenemae nàde asixɔxɔ ƒomedodo si le wò kpakple Mawu dome ŋu. (Romatɔwo 3:24; Yakobo 4:8) Esi nɔviŋutsu Mark si tso South Africa (Afrique du Sud) nɔ gaxɔ me ƒe etɔ̃ ɖe eƒe xɔse ta megbe la, egblɔ be: “Míate ŋu atsɔ ŋugbledede asɔ kple mɔzɔzɔ dodzidzɔname aɖe. Míeva kena ɖe nu yeyewo ŋu tso mía Mawu Yehowa ŋu ne míeyi ŋugblededea dzi. Ɣeaɖewoɣi ne dzi ɖe le ƒonye alo metsi dzimaɖi ɖe etsɔme ŋu la, metsɔa Biblia hedea ŋugble le Ŋɔŋlɔa ƒe akpa aɖe ŋu. Mekpɔe be esia nana nye dzi dzea eme.”

¹⁶ Míexaxa le egbexexea me ale gbegbe be esesẽna be míakpɔ ɣeyiɣi ade ŋugble le Biblia ŋu. Nɔviŋutsu Patrick  si le Afrika du aɖe me gblɔ be: “Nye susu le abe posuɖaka si me yɔ fũu kple nyatakaka vovovowo ene, esiwo mehiã kple esiwo nyemehiã o siaa, eye wòle vevie be matia wo me gbe sia gbe. Ne medzro nye susu me la, mekpɔnɛ be ‘nu geɖe le fu ɖem nam,’ eye ehiã be mado gbe ɖa na Yehowa tso wo ŋu hafi nye susu me navo made ŋugble. Togbɔ be esia wɔnɛ be ɣeyiɣi aɖe va yina hafi metea ŋu dea ŋugble le gbɔgbɔmenuwo ŋu hã la, enana metena ɖe Yehowa ŋu. Eye wòʋua nye susu ale be mesea nyateƒea gɔme ɖe edzi.” (Psalmo 94:19, etenuŋɔŋlɔa) Ɛ̃, ne míexlẽa Biblia hedea ŋugble le eŋu gbe sia gbe la, eɖea vi geɖe na mí.—Dɔwɔwɔwo 17:11.

17. Nu kae nàwɔ be nàkpɔ ɣeyiɣi ade ŋugble?

¹⁷ Ame aɖewo fɔna ŋdi kanyaa xlẽa nu, dea ŋugble hedoa gbe ɖa. Ame bubuwo hã wɔa esia le ŋdɔmeɖiɖiɖemeɣi. Ðewohĩ le gowòme la, ɣeyiɣi si asɔ be nàxlẽ Biblia ate ŋu anye fiẽ me alo hafi nàmlɔ anyi. Ame aɖewo hã xlẽa Biblia ŋdi kple anyimlɔɣi siaa. (Yosua 1:8) Nu vevitɔae nye be, ‘nàwɔ wò ɣeyiɣi ŋu dɔ le mɔ nyuitɔ nu,’ si fia be nàɖe asi le nu siwo mehiã o ŋu be nàkpɔ ɣeyiɣi atsɔ ade ŋugble le Mawu ƒe Nya la ŋu gbe sia gbe.—Efesotɔwo 5:15, 16.

18. Ŋugbe kae wodo le Biblia me na ame siwo katã dea ŋugble le Mawu ƒe Nya la ŋu hewɔna ɖe nu si wosrɔ̃ dzi?

¹⁸ Yehowa do ŋugbe le Biblia me be yeayra ame siwo katã dea ŋugble le yeƒe Nya la ŋu hekua kutri wɔna ɖe nu si wosrɔ̃ dzi. (Xlẽ Psalmo 1:1-3.) Yesu gblɔ be: “Dzidzɔtɔwoe nye ame siwo le Mawu ƒe nya la sem, eye wole edzi wɔm!” (Luka 11:28) Gake esi gale vevie kura wue nye be, ne míedea ŋugble le Yehowa ƒe Nyaa ŋu gbe sia gbe la, akpe ɖe mía ŋu míanɔ agbe si ahe kafukafu vɛ nɛ. Ne míewɔa esia la, Yehowa ayra mí fifia be míanɔ dzidzɔ kpɔm eye wòana agbe mavɔ mí le eƒe xexe yeyea me.—Yakobo 1:25; Nyaɖeɖefia 1:3.