Gbã la, na nyateƒenya sia nafa akɔ na wò: Mawu le fu siwo katã kpem amewo le le xexea me egbea la kpɔm, eye eɖoe be yeawɔ nane tso eŋu. (Psalmo 72:13, 14) Mawu do ŋugbe le eƒe Nya, Biblia, me be ‘ame siwo le xaxa me tom la, akpɔ gbɔdzɔe.’ Ɣekaɣie woakpɔ gbɔdzɔe sia? “Le Aƒetɔ Yesu kple eƒe dɔla sẽŋuwo ƒe ɖeɖefia tso dziƒo . . . la me, esime wòabia hlɔ̃ ame siwo menya Mawu o kple ame siwo meɖoa to mía Aƒetɔ Yesu ŋuti nya nyui la o.” (2 Tesalonikatɔwo 1:7, 8) Yesu ƒe ɖeɖefia sia ava eme le etsɔme, le ɣeyiɣi si Biblia yɔ be “Mawu Ŋusẽkatãtɔ la ƒe ŋkeke gã la ƒe aʋawɔwɔ,” alo Armagedon me.—Nyaɖeɖefia 16:14, 16.

Menye amegbetɔwo dzie Mawu ato awɔ aʋa sia o, ke boŋ Via, Yesu Kristo, kple mawudɔla sẽŋuwo dzie wòato awɔ aʋa kple ame vɔ̃ɖiwo. Dziƒoʋakɔ ma ana ameteteɖeanyi ƒomevi ɖe sia ɖe nu nayi keŋkeŋ.—Yesaya 11:4; Nyaɖeɖefia 19:11-16.

Tso blema ke va de asi na egbea la, ale si Mawu bua aʋawɔwɔe la metrɔ o. Egakpɔtɔ bua aʋawɔwɔ be enye mɔ si sɔ, si dzi yeato aɖe ameteteɖeanyi kple ŋutasesẽ ɖa kokoko. Gake Mawu ɖeɖe ko sie ŋusẽ le be wòatso nya me le ɣeyiɣi si wòle be woawɔ aʋa kple ame si awɔ aʋa la ŋu, abe ale si ko wònye nyateƒe le ŋutinya katã me ene. Eye abe ale si míekpɔe ene la, Mawu ɖoe ɖi xoxo be yeato aʋa si woawɔ le etsɔme la dzi  aɖe ŋutasesẽ ɖa ahabia hlɔ̃ na ame siwo wote ɖe anyi la, eye Via, Yesu Kristo, ye awɔ aʋa sia. Esia fia be Mawu meda asi ɖe aʋa siwo wɔm wole le anyigba dzi egbea la dzi o, ne edze abe susu nyui aɖewo tae wole aʋa wɔm ɖo gɔ̃ hã.

Le kpɔɖeŋu me: Tsɔe be ame aɖe kple nɔvia wole kɔ dam esime wo fofo mele aƒe me o. Wova dzudzɔ kɔa dada sẽe heƒo ka na wo fofo. Ðevi gbãtɔ gblɔ be ye nɔvia ye di ge le ye ŋu, eye evelia hã gblɔ be ye nɔvia ye le fu wɔm ye. Wo dometɔ ɖe sia ɖe ɖe eƒe nyaa dzi na wo fofoa hele mɔ kpɔm be wòade ye dzi. Gake esi wo fofoa ɖo to se wo ame evea siaa ƒe nyawo vɔ la, egblɔ na wo be woadzudzɔ kɔdada eye woalala yeagbɔ ava kpɔ nyaa gbɔ. Ale ɖeviawo kpɔ wo fofo sinu sẽe. Gake kasia, wogadze kɔdada gɔme ake. Esi wo fofo gbɔ va aƒe me la, mekpɔ ŋudzedze ɖe ɖeviawo dometɔ aɖeke ŋu o, eye wòhe to na wo ame evea siaa le esi womese eƒe gbe o ta.

Egbea la, dukɔ siwo kpe aʋa kple wo nɔewo la biaa Mawu ƒe kpekpeɖeŋu. Gake Mawu medea akpa aɖeke dzi le aʋa siwo wɔm wole egbea me o. Ke boŋ egblɔ le eƒe Nya, Biblia, me eme kɔ nyuie be: “Migaɖo vɔ̃ vɔ̃ teƒe na ame aɖeke o,” eye wògblɔ hã be: “Migabia hlɔ̃ na mia ɖokuiwo o.” (Romatɔwo 12:17, 19) Gakpe ɖe eŋu la, ena ameƒomea nya be ele be woalala ‘akpɔ ye sinu dzigbɔɖitɔe’ va se ɖe esime yeakpɔ nyawo gbɔ, eye ele esia wɔ ge le Armagedon me. (Psalmo 37:7, etenuŋɔŋlɔ) Esi dukɔwo gbe be yewomakpɔ Mawu sinu o eye wole aʋa wɔm kple wo nɔewo la, Mawu bua aʋawɔwɔ mawo be wonye tomaɖomaɖo kple aglãdzedze kpakple ŋutasẽnuwɔna si medzea ye ŋu kura o. Eya ta le Armagedon me la, Mawu ado dɔmedzoe ɖe dukɔwo ŋu eye wòatso nya me na dukɔwo katã zi ɖeka ɖe ɣeyiɣiawo katã nu ne “[eva tsi] aʋawɔwɔwo nu le anyigba bliboa dzi.” (Psalmo 46:9; Yesaya 34:2) Vavãe, Armagedon-ʋa la dzie Mawu ato atsi aʋawɔwɔwo katã nu.

Yayra siwo Mawu Fiaɖuƒea ahe vɛ la dometɔ ɖekae nye be atsi aʋawɔwɔwo nu. Yesu ƒo nu tso dziɖuɖu ma ŋu le eƒe gbedodoɖa si amewo nya nyuie la me esi wògblɔ be: “Wò Fiaɖuƒe nava. Wò lɔlɔ̃nu nava eme le anyigba dzi abe ale si wòle le dziƒo ene.” (Mateo 6:10) Menye ɖeko Mawu Fiaɖuƒea atsi aʋawɔwɔwo katã nu ko evɔ o, ke aɖe nu si koŋ gbɔ aʋawɔwɔ tsona, si nye vɔ̃ɖinyenye la ɖa. * (Psalmo 37:9, 10, 14, 15) Eya ta mewɔ nuku o be Yesu yomedzelawo le mɔ kpɔm na yayra siwo Mawu Fiaɖuƒea ahe vɛ la vevie.—2 Petro 3:13.

Gake ɣekaɣie míalala ase ɖo hafi Mawu Fiaɖuƒea nava ɖe fukpekpe, ameteteɖeanyi kple vɔ̃ɖinyenye ɖa? Biblia ƒe nyagblɔɖi siwo le eme vam la ɖee fia be nuɖoanyi sia ƒe “ŋkeke mamlɛawo” mee míele. (2 Timoteo 3:1-5) * Eteƒe madidi o, Mawu Fiaɖuƒea ato Armagedon-ʋa la dzi ahe ŋkeke mamlɛ siawo ava nuwuwui.

Abe ale si míekpɔe va yi ene la, ame siwo “meɖoa to mía Aƒetɔ Yesu ŋuti nya nyui la o” lae woatsrɔ̃ le aʋawɔwɔ sia me. (2 Tesalonikatɔwo 1:8) Gake ɖo ŋku edzi be, ame aɖeke ƒe ku mevivia Mawu nu o, ame vɔ̃ɖiwo ke hã. (Ezekiel 33:11) Esi “medi be ame aɖeke natsrɔ̃” le aʋa mamlɛ sia me o ta la, ena wole gbeƒã ɖem mía Aƒetɔ Yesu ŋuti nya nyui la “le anyigba blibo la katã dzi be wòanye ɖaseɖiɖi na dukɔwo katã” hafi nuwuwua nava. (2 Petro 3:8, 9; Mateo 24:14; 1 Timoteo 2:3, 4) Ɛ̃, gbeƒãɖeɖedɔ si wɔm Yehowa Ðasefowo le le anyigba dzi godoo la nana mɔnukpɔkpɔ sua amewo si be woasrɔ̃ nu tso Mawu ŋu, woaɖo to Yesu ŋuti nya nyui la, eye woawo ŋutɔwo woava kpɔ ɣeyiɣi si me Mawu aɖe aʋawɔwɔ ɖa tegbee la teƒe.