Ao, Biblia mefia nu be ne wonya ɖe ame aɖe ko la, ekpɔ ɖeɖe tegbee o. Woate ŋu aɖe ame si xɔ Yesu Kristo dzi se, gake ne megava xɔ edzi se o la, ɖeɖekpɔkpɔ ma age le esi. Biblia gblɔ be ele be ‘míaʋli sesiẽ’ hafi míate ŋu alé xɔse me ɖe asi. (Yuda 3, 5) Wogblɔ na Kristotɔ gbãtɔ siwo xɔ Kristo xoxo la be: “Miyi edzi miatsɔ vɔvɔ̃ kple dzodzo nyanyanya anɔ miaƒe ɖeɖekpɔkpɔ ŋuti dɔ la wɔm.”—Filipitɔwo 2:12.

Mawunyakpukpui siwo ɖee fia be nya si amewo gblɔna be ne wonya ɖe ame ko la, woɖee tegbee la, nye alakpa

•   Biblia xlɔ̃ nu mí ku ɖe nu vɔ̃ gã siwo ne ame wɔ la mayi Mawu ƒe Fiaɖuƒea me o la ŋu. (1 Korintotɔwo 6:9-11; Galatiatɔwo 5:19-21) Nenye be ɖe ɖeɖekpɔkpɔ mate ŋu age le ame si o la, anye ne nuxlɔ̃ame ma mahiã kura o. Ke boŋ Biblia ɖee fia be ame si woɖe la agate ŋu atrɔ ava nɔ nu vɔ̃ gãwo wɔm. Le kpɔɖeŋu me, Hebritɔwo 10:26 gblɔ be: “Ne nyateƒe la ƒe sidzedze vavãtɔ su mía si hafi míegaɖoe le nu vɔ̃ wɔm la, ekema vɔsasa ɖe nu vɔ̃wo ta aɖeke megali o.”—Hebritɔwo 10:26; 6:4-6; 2 Petro 2:20-22.

•   Yesu wɔ kpɔɖeŋu aɖe tsɔ te gbe ɖe ale si wòle vevie be míalé xɔse me ɖe asi la dzi; le kpɔɖeŋua me, etsɔ eɖokui sɔ kple wainti eye wògblɔ be ye yomedzelawo le tsitre ɖi na atilɔwo. Wo dometɔ aɖewo aɖee fia be yewoxɔ edzi se to woƒe kutsetsewo alo nuwɔnawo me, gake emegbe la, woava do kpo esia wɔwɔ eye woatsɔ wo aƒu gbe “abe atilɔ” matsekuwo ene. (Yohanes 15:1-6) Apostolo Paulo hã zã kpɔɖeŋu ma tɔgbi eye wògblɔ be “woalã” Kristotɔ siwo melé xɔse me ɖe asi o la ɖa.—Romatɔwo 11:17-22.

•   Wode se na Kristotɔwo be woanɔ ŋudzɔ. (Mateo 24:42; 25:13) Ame siwo mele ŋudzɔ le mawusubɔsubɔ gome o, eɖanye ɖe woƒo wo ɖokuiwo ɖe “viviti me dɔwɔwɔwo” me loo alo womele dɔ si Yesu de wo si la wɔm bliboe o la, abu woƒe ɖeɖekpɔkpɔa.​—Romatɔwo 13:11-13; Nyaɖeɖefia 3:1-3.

•   Mawunyakpukpui geɖewo ɖee fia be ele be ame siwo woɖe la nado dzi va se ɖe nuwuwu. (Mateo 24:13; Hebritɔwo 10:36; 12:2, 3; Nyaɖeɖefia 2:10) Ƒe alafa gbãtɔ me Kristotɔwo kpɔ dzidzɔ esi wose be woƒe haxɔsetɔwo le dzi dom le xɔse me. (1 Tesalonikatɔwo 1:2, 3; 3 Yohanes 3, 4) Ðe susu anɔ eme be Biblia nate gbe ɖe dzidodo kple nuteƒewɔwɔ dzi nenema gbegbe nenye be woaɖe ame siwo medo dzi o hã?

•   Esi apostolo Paulo kpɔe be eteƒe madidi o yeaku ko hafi wòka ɖe edzi be yekpɔ ɖeɖe. (2 Timoteo 4:6-8) Ɣeyiɣi siwo do ŋgɔ na ema la, ede dzesii be ɖeɖekpɔkpɔa ate ŋu abɔ ye nenye be yeɖe mɔ ŋutilãmenudzodzrowo kplɔ ye trae. Eŋlɔ bena: “Meƒoa nye ŋutilã vevie hewɔnɛ kluvii, ale be esi meɖe gbeƒã na ame bubuwo vɔ la, nye ŋutɔ nyemagazu ame madzemadze le mɔ aɖeke nu o.”—1 Korintotɔwo 9:27; Filipitɔwo 3:12-14.