Ao, Biblia mefia nu be anyigba la le gbadzaa o. a Menye dzɔdzɔmeŋutinunyagbalẽe Biblia nye o. Ke hã, Biblia me nya aɖeke metsi tre ɖe dzɔdzɔmeŋutinunya si ŋu kakaɖedzi le ŋu o. Míate ŋu “aɖo ŋu ɖe” nya siwo Biblia gblɔ la “ŋu ɖaa tegbee.”—Psalmo 111:8.

•  Nya si Biblia gblɔ be “anyigba ƒe go eneawo” gɔme ɖe?

•  Ke tetekpɔ si Abosam he va Yesu dzi ya ɖe?

 Mele be míase nyagbɔgblɔ “anyigba ƒe go eneawo” kple “anyigba ƒe mlɔenuwo” si Biblia zã la gɔme ɖe nyagbeawo ŋutɔŋutɔ nu abe ɖe dzogoe ene le anyigba si alo abe ɖe seƒe le anyigba si ene o. (Yesaya 11:12; Hiob 37:3) Ke boŋ, edze ƒãa be wonye kpɔɖeŋunyagbɔgblɔ siwo fia anyigba bliboa katã dzi. Gɔmesese ma ke nue Biblia zãa nyagbɔgblɔ si nye “ɣedzeƒe, ɣetoɖoƒe, dziehe kple anyiehe” le.—Luka 13:29.

 Anɔ eme be Hebrigbe me nya si gɔme woɖe be ‘dzogoe’ alo ‘mlɔenu’ la nye adagana si wotu ɖe nya si wozãna na “aʋala” la dzi. Numekugbalẽ aɖe gblɔ be, “esi xewo tsɔa woƒe aʋala tsyɔa wo viwo dzi ta la, [Hebrigbe me nya sia] fia nu sia nu si me wohe la ƒe mlɔenuwo.” Agbalẽ sia ke gagblɔ be nya siwo wozã le Hiob 37:3 kple Yesaya 11:12 la fia “anyigba ƒe liƒowo, mlɔenuwo, alo eƒe yɔyrɔenuwo.” b—The International Standard Bible Encyclopedia.

 Esi Abosam be yeate Yesu kpɔ la, ekplɔe “yi to aɖe si kɔkɔ ŋutɔ la dzi, eye wòɖe xexemefiaɖuƒewo katã kple woƒe ŋutikɔkɔe fiae.” (Mateo 4:8) Ame aɖewo gblɔna be Biblia me ŋutinya sia ɖee fia be ame ate ŋu akpɔ xexe bliboa ne etɔ ɖe teƒe ɖeka le anyigba la si le gbadzaa dzi. Ke hã, edze abe “to aɖe si kɔkɔ ŋutɔ” si dze le nuŋlɔɖi sia me la nye kpɔɖeŋunyagbɔgblɔ ene, ke menye teƒe ŋutɔŋutɔ o. Kpɔ nu si tae susu le nyataƒoƒo sia me la ɖa.

•   To aɖeke mele anyigba dzi si dzi woatsi tsitre ɖo akpɔ xexemefiaɖuƒewo katã o.

•   Menye fiaɖuƒewo katã koe Abosam ɖe fia Yesu o, ke woƒe “ŋutikɔkɔe” hã. Ame mate ŋu anɔ teƒe didi aɖe akpɔ nu mawo gbegbe o, eya ta edze abe Abosam ɖe nu mawo fia Yesu to ŋutega ƒomevi aɖe dzi ene. Míate ŋu atsɔ esia asɔ kple ale si woɖea xexea ƒe akpa bubuwo fiana le filmwo me egbea.

•   Nudzɔdzɔ sia ke ŋuti nuŋlɔɖi si dze le Luka 4:5 gblɔ be Abosam ɖe “anyigbadzifiaɖuƒewo katã [fia Yesu] le ɣeyiɣi kpui aɖe ko me,” evɔ manya wɔ be ame natsɔ ŋku dzro ko awɔ esia o. Esia fia be Abosam to mɔ aɖe dzi ɖe nu mawo fia Yesu tsɔ tee kpɔ, ke menye be ena wòkpɔ wo kple ŋku ŋutɔŋutɔ o.