Ɛ̃. Esime Yesu nɔ anyigba dzia, nya siwo wogblɔ ɖi le “Mesia Kplɔla,” si anye “xexea ɖela” ŋu la dometɔ gbogbo aɖewo va eme ɖe eya amea dzi. (Daniel 9:25; 1 Yohanes 4:14) Eye esi Yesu ku megbe gɔ̃ hã, nyagblɔɖi siwo ku ɖe Mesia ŋu gava eme ɖe eya amea dzi.—Psalmo 110:1; Dɔwɔwɔwo 2:34-36.

•  Nya “Mesia” gɔme ɖe?

•  Ðe Mesia ŋuti nyagblɔɖiwo ate ŋu ava eme ɖe ame siwo wu ɖeka dzia?

•  Etsɔmee Mesia la adoa?

•  Mesia ŋuti nyagblɔɖi nenie le Biblia me?

•  Mesia ŋuti nyagblɔɖi siwo va eme ɖe Yesu dzi dometɔ aɖewo

 Hebrigbe me nya Ma·shiʹach (Mesia) kple Helagbe me nya si sɔ kplii, si nye Khri·stos (Kristo) la siaa gɔmee nye “Amesiamina.” Eya ta “Yesu Kristo” gɔmee nye “Yesu Amesiamina,” alo “Yesu Mesia.”

 Le Biblia ŋlɔɣiwoa, ale si wosia ami na ame aɖe si wotsɔ ɖo ɖoƒe tɔxɛ aɖe ye nye be wokɔa ami ŋutɔŋutɔ ɖe tame nɛ. (3 Mose 8:12; 1 Samuel 16:13) Mawu ɖo Yesu be wòanye Mesia la, si fia be ena ŋusẽ gã aɖee. (Dɔwɔwɔwo 2:36) Gake menye ami ŋutɔŋutɔe Mawu si na Yesu ya o, ke boŋ gbɔgbɔ kɔkɔe ye wòtsɔ si ami nɛ.—Mateo 3:16.

 Ao. Abe ale si ko amegbetɔwo ƒe asibidɛnudzesiwo mesɔ o enea, nenema kee ame ɖeka dzi koe Biblia me nyagblɔɖi siwo ku ɖe Mesia alo Kristo la ŋu ava eme ɖo. Gake Biblia xlɔ̃ nu be “aʋatsokristowo kple aʋatsonyagblɔɖilawo ado, eye woawɔ dzesi gãwo kple nukunuwo bena, ne woate ŋui la, woaflu ame tiatiawo gɔ̃ hã.”—Mateo 24:24.

 Ao. Biblia gblɔe ɖi be Mesia la anye Israel Fia David ƒe dzidzimevi. (Psalmo 89:3, 4) Gake Yudatɔwo ƒe dzidzimegbalẽ siwo li va ɖo David dzi la bu, ɖewohĩ Romatɔwo anya gblẽ wo dome esime wotsrɔ̃ Yerusalem le ƒe 70 K.Ŋ. a Tso ɣemaɣi dzia, naneke meli ame aɖe atsɔ aɖo kpe edzi be yetso David ƒe fiaƒome me o. Gake esi dzidzimegbalẽ mawo nɔ anyi le Yesu ŋɔli ya ta, esi Yesu gblɔ be yenye David ƒe dzidzimevia, eƒe futɔwo gɔ̃ hã mete ŋu ke ɖii o.—Mateo 22:41-46.

 Míate ŋu ayɔ Mesia ŋuti nyagblɔɖiwo ƒe xexlẽme aɖeke koŋ o. Le kpɔɖeŋu me, nyagblɔɖi siwo ku ɖe Mesia ŋu tẽe gɔ̃ hã ƒe xexlẽme ate ŋu anɔ vovovo le ale si ame xlẽ woe nu. Yesaya 53:2-7 gblɔ nu vovovo siwo adzɔ ɖe Mesia dzi la ɖi. Ame aɖewo abui be kpukpui siawo katã nye nyagblɔɖi ɖeka, gake ame bubuwo abu nu vovovo siwo woyɔ la dometɔ ɖe sia ɖe be enye nyagblɔɖi le eɖokui si.