Tsãa, dzɔdzɔmeŋutinunyalawo susu be ale si ko tsi tea ŋu yia dzi le aŋeto xaxɛ me le dzɔdzɔme nui la, nenemae aɖitsiwo hã tsɔa woƒe aɖe yɔa seƒoƒometsi ɖe nu mee. Gake numekuku siwo wogava wɔ nyitsɔ laa na wokpɔe be mɔnu bubu aɖe si nyo sãsãsã wu la ŋu dɔe wowɔna.

 Bu eŋu kpɔ: Ne aɖitsi ƒo eƒe aɖe ɖe seƒoƒometsi mea, aɖea ƒe nugbɔ mana ɖe eve. Tò lɔbɔe aɖe nɔa aɖea ƒe nugbɔ fefeeawo dometɔ ɖe sia ɖe ŋu. Ne aɖitsi ƒe aɖe tɔ seƒoƒometsia mea, tò lɔbɔeawo kena, eye aɖea ƒe nugbɔ hã xana gobaa si wɔnɛ be wòte ŋu tsɔnɛ lɔa tsia, ke menye be eyɔnɛ abe ale si woyɔa tsi toa aŋeto me ene o. Ne aɖitsia gahe eƒe aɖe de nu mea, eƒe nugbɔ fefeea gatena kpena eye tò si le aɖea ƒe nugbɔ hã tuna ɖe tsia dzi ale be wòagado o.

 Numekula siwo ƒe ŋkɔwoe nye Alejandro Rico-Guevara, Tai-Hsi Fan, kple Margaret Rubega gblɔ be ɣeyiɣi si esia katã xɔna la “mede sekɛnd ɖeka ƒe memama ewo o.” Wogagblɔ hã be: ‘Ale si aɖea ƒe nɔnɔme trɔna kabakaba ne ege ɖe seƒoƒometsia me alo do le emea wɔ moyaa ŋutɔ.’

 Tsɔ kpe ɖe eŋua, mehiã be xevi sue sia nazã eya ŋutɔ ƒe ŋusẽ atsɔ alɔ seƒoƒometsia o. Ne aɖea ƒe nugbɔ nya tɔ tsia me ko la, dzɔdzɔmeŋusẽ deŋgɔ aɖewo ƒe dɔwɔwɔ ɖe aɖea dzi nana eƒe nɔnɔme trɔna ale be wòtea ŋu lɔa tsia.

 Esi wònye be aɖitsi ƒe aɖe tea ŋu lɔa tsi nyuie nenema gbegbe taa, numekulawo xɔe se be yewoate ŋu awɔ nu siwo yewosrɔ̃ tso eŋua ŋu dɔ le atikewɔnyawo, robɔt-wo wɔwɔ, kple nu bubuwo me. Ðewohĩ ate ŋu akpe ɖe wo ŋu gɔ̃ hã be woawɔ dɔwɔnu siwo woatsɔ alɔ tsi alo tomemi si ƒu gbe ɖe atsiaƒu me.

 Nu kae nèsusu? Ðe aɖitsi ƒe aɖe deŋgɔ la dzɔ le eɖokui sia? Alo ɖe wowɔea?