Numekulawo gblɔ be avu tea ŋu wɔa ŋutete si le esi be wòase nu ƒe ʋeʋẽ ŋu dɔ nyana ne avu bubu aɖe nye atsu alo nɔe, ƒe si wòxɔ kple eƒe seselelãme. Amewo tea ŋu naa hehe avuwo be woade dzesi bɔmbwo kple atike vɔ̃ɖiwo gɔ̃ hã. Ŋku koŋue amegbetɔwo zãna tsɔ dea dzesi nu siwo ƒo xlã wo, gake avuwo ya zãa woƒe ŋɔti. Woƒe ŋɔtie wotsɔ dea dzesi nui.

Bu nya sia ŋu kpɔ: Ale si avu ƒe ŋɔti tea ŋu ʋẽa nu sena la de ŋgɔ wu amegbetɔwo tɔ zi gbɔ zi akpe geɖe. Le numekuhabɔbɔ aɖe ƒe nya nu la, “ne woate ŋu ama nane ƒe ʋeʋẽ ɖe akpa miliɔn teƒe miliɔn me la, avu ate ŋu ase ʋeʋẽa ƒe akpa suetɔ kekeake gɔ̃ hã. Ðeko wòle abe woama sukli gativi ɖeka ɖe akpa ene me ahakɔ akpa ɖeka ɖe ta gã si ƒe lolome sɔ kple esi me Olimpik hoʋlilawo ƒua tsi le me eye ame naɖɔ tsia kpɔ ase suklia ŋkɔ ene.”—U.S. National Institute of Standards and Technology.

Nu ka gbɔe wòtso be avu ƒe nuʋeʋẽse de ŋgɔ sãsãsã wu amegbetɔwo tɔ?

• Avu ƒe ŋɔti nu fa, eya ta enɔa bɔbɔe be wòase nuwo ƒe ʋeʋẽ.

• Yatoƒe eve ye le avu ƒe ŋɔti me—egbɔa ya toa ɖeka me, eye wòzãa evelia tsɔ sea nuwo ƒe ʋeʋẽ. Ne avu ʋẽ nu se la, ya gena ɖe eƒe ŋɔtia ƒe akpa si nana wòsea nuwo ƒe ʋeʋẽ la me.

• Avu ƒe ŋɔti ƒe akpa si nana wòsea nu ƒe ʋeʋẽ la ƒe lolome tea ŋu nyea sentimeta 130 le dzogoe ene me, gake amegbetɔwo tɔ ya nye sentimeta 5 pɛ ko le dzogoe ene me.

• Lãmenugbagbevi siwo nana avuwo sea nu ƒe ʋeʋẽ la sɔ gbɔ wu esiwo nana amegbetɔwo sea nu ƒe ʋeʋẽ la zi gbɔ zi 50.

Esiawo katã wɔnɛ be avu tea ŋu sea nu vovovo siwo le nane me la ƒe ʋeʋẽ. Le kpɔɖeŋu me, le numekula aɖewo ƒe nya nu la, amegbetɔwo ate ŋu ase detsi ƒe ʋeʋẽ, gake avu ya ate ŋu ase nu vovovo siwo wozã tsɔ ƒo detsia la ƒe ʋeʋẽ.

Numekula siwo le habɔbɔ aɖe (Pine Street Foundation) si kua nu me tso kansa ŋu me la gblɔ be, ale si avu ƒe ahɔhɔ̃ kple eƒe ŋɔti wɔa dɔ aduadu la wɔe be wònye “ŋudɔwɔnu deŋgɔ siwo dea dzesi nu ƒe ʋeʋẽ wu ɖe sia ɖe le anyigba dzi la dometɔ ɖeka.” Dzɔdzɔmeŋutinunyalawo le agbagba dzem be yewoawɔ elektrɔnikmɔ̃ siwo awɔ dɔ abe avu ƒe ŋɔti ene siwo ade dzesi bɔmbwo, dɔlélewo abe kansa ene, kple nu siwo amewo tsɔ gbãa de.

Nu kae nèsusu? Ðe avu ƒe nuʋeʋẽse la dzɔ le eɖokui sia? Alo Wɔla lae wɔea?