Yehowa Ðasefowo wu dɔ si wowɔ ƒe ade tsɔ keke woƒe dɔwɔƒe si nye Watchtower Farms si le Wallkill, New York nu nyitsɔ laa. Esi wòkpɔtɔ ƒe eve woawu dɔa nu eye dɔa va biã ŋku vevie la, wova hiã xɔdɔmewo na ame siwo tsɔ wo ɖokui na faa nɔ dɔa wɔm. Le esia ta wohaya aƒe 25 le nutoa me.

Aleke xɔtɔawo se le wò ɖokui me esi wohaya woƒe xɔwo na Yehowa Ðasefowo?

• Aƒea ɖeka tɔ gblɔ be: “Míekpɔ dzidzɔ ɖe xɔhayalaawo ŋu ŋutɔ. Míaƒe aƒe te ɖe xɔhayalawo tɔ ŋu eye míede dzesii be wowɔa nu aduadu kple mí eye wodzea xɔlɔ̃ ame hã.”

• Aƒenɔ bubu aɖe si ƒe aƒe te ɖe esi wòhaya na Ðasefoawo ŋu la gblɔ tso wo ŋu be: “Woƒe nuwɔna dea dzi ƒo ɣesiaɣi. Tsiƒuƒe nyui aɖe le míaƒe xɔ godo eye ne míekpe ɖekakpuiawo be woava ƒu tsi le eme faa la wovana. Wobua ame ŋu ɣesiaɣi si wova, eye wodea bubu ame ŋu hã. Anyinɔnɔ kple wo dzɔ dzi na mí ale gbegbe eye míasusu wo ŋutɔ ne womegali anɔ du ƒum le gbeawo dzi míanɔ kpɔkpɔm o.” Egblɔ kpee be: “Woawoe nye xɔhayala nyuitɔ siwo míekpɔ kpɔ.”

• Aƒetɔ aɖe gblɔ be: “Edzɔ dzi na mí ŋutɔ be menye xɔhayalawo koe ame siawo nye na mí o, wova zu míaƒe aƒelikawo hã.”

Nya kawoe xɔtɔwo gblɔ tso xɔawo ƒe nɔnɔme ŋu esi xɔhayalawo dzo megbe?

• “Woxea xɔfetuawo ɖe game dzi, eye wolé be na aƒea nyuie wònɔ nɔnɔme nyui me hafi wodzo.”

• Aƒetɔawo dometɔ aɖe si ŋu nya míegblɔ va yi la gblɔ be: “Akpe na mi kple Gbetakpɔxɔhabɔbɔ bliboa ɖe beléle tɔxɛ si mietsɔ na míaƒe aƒea ta,” eye wògblɔ kpee be yemekpɔ mɔ be Ðasefoawo “nadzra teƒea ɖo nenema gbegbe o.”

• Nyɔnu ɖeka gblɔ be: “Esi míenya miaƒe habɔbɔa ƒe nuteƒewɔwɔ ta la, míebia be woaxe nugblẽfe aɖeke daɖi hafi axɔ xɔawo o. Naneke megblẽ le xɔ siwo katã wohayaa ŋu hafi wotrɔ wo na mí o.”

• Esi Ðasefoawo dzra nu suesue aɖe siwo gblẽ le aƒetɔ ɖeka aɖe ƒe xɔ ŋu ɖo vɔ la, aƒetɔa bia be, “Aleke mawɔ hafi miatɔ aɖewo nava wɔ dɔ nam? Ne miedo ŋugbe be yewoawɔ dɔ aɖe le ŋkeke aɖe dzi la, mienɔa game dzi ɣesiaɣi. Ame siwo dzraa nu siwo gblẽ le nye aƒea ŋu ɖo la mewɔa woƒe nyawo dzi alea o.”

• Hafi xɔ aɖe si Ðasefoawo haya ƒe ƒe nade la, aƒeatɔ ŋlɔ agbalẽ na wo be ne woagahaya xɔa ake la, yeaɖe xɔfetua dzi atsɔ anyo dɔme na wo.

• Aƒetɔ bubu gblɔ be: “Ne mɔnukpɔkpɔ agasu mía si ake la, adzɔ dzi na mí ŋutɔ be míagahaya xɔ na Gbetakpɔxɔhabɔbɔa ake.”