Harold Corkern, si nye Dɔdzikpɔha Ƒe Agbalẽtata Kɔmitia Ƒe Kpeɖeŋutɔ le nuƒo si ƒe tanyae nye, “Wɔ Wò Ŋutete Katã” ƒom. Woɖoa nuƒolawo ɖe Warwick edziedzi be woade dzi ƒo na dɔwɔlawo.

Aŋekuntru titri ɣi siae kpɔa dɔwɔlawo ta be woayi dɔa dzi le vuvɔŋɔli, elabena sno dzana ɣemaɣi ŋutɔ. Xɔa ƒe akpa siae atikewɔƒe, nuɖaƒe, nuɖuƒe, kple nunyaƒe anɔ.

Elɛktrikdɔwɔlawo le dzadzram ɖo be yewoade elɛktrik-kawo. Wohe elɛktrik-ka meta 12,000 sɔŋ yi xɔdɔme vovovoawo xoxo. Esi woƒle anyigbaa le Warwick teti koe wodze elɛktrikdɔwo gɔme eye woayi edzi va se ɖe esime wowu xɔtudɔa nu.

Dɔwɔla aɖe le aŋe fam ɖe dziƒoxɔŋuyaxɔƒea ƒe gliwo ŋu hafi woava si aŋɔ siwo ana be tsi mato glia me o la nɛ. Wosia aŋɔ ƒomevi aɖe si ana be tsi mato glia me o la na dziƒoxɔŋuyaxɔƒe siwo le dzisasrã mamlɛtɔ dzi.

Nɔviŋutsu aɖe kple vianyɔnu siwo nye elɛktrikdɔwɔlawo le elɛktrik-ka siwo ahe elɛktrikŋusẽ ayi xɔdɔmeawo me la dem.

Dɔwɔla siwo dɔ le wuwum vevie la le ŋdɔnu ɖum le nuɖuƒe si wotu be woazã hena ɣeyiɣi kpui aɖe ko. Woɖaa ŋdɔnu si ade ame 2,000 kple edzivɔ nu gbe sia gbe.

Dɔwɔla aɖewo le gakpo siwo dzi woakɔ kɔnkreti ɖo hafi atu nuwo dzraɖoƒe ƒe xɔtexɔa la dem.

Lɛta siwo ɖeviwo ŋlɔ tsɔ da akpe na dɔwɔlawo ɖe dɔ nyui si wɔm wole ta. Lɔlɔ̃nu faa dɔwɔla geɖewo va wɔa dɔ hena ɣeyiɣi kpui aɖe. Dɔwɔla yeye siwo ade 500 sɔŋ ye vana kwasiɖa sia kwasiɖa. Le February me la, ame siwo ade 2,500 ye va wɔa dɔ le Warwick gbe sia gbe.

Wowu dɔa ƒe akpa eve le etɔ̃ me kloe nu xoxo. Tso January va se ɖe April 2015 me la, wowu xɔdɔmeawo ŋutɔ kpakple ɔfis kple dɔwɔƒe bubuawo ƒe akpa gãtɔ nu. Le ɣeyiɣi ma ke me la, wodze Nuwo Dzraɖoƒe xɔa ƒe gliwo ɖoɖo, woɖe afɔmɔ siwo ayi xɔdɔme vovovoawo gbɔ, eye wowɔ ɖɔɖɔɖo aɖewo le Sterling Forest Lake (Blue Lake) taa hã ŋu.

Afi si woava ɖo atrakpuiwo to ye nye esia woɖe fotoe tso ete. Habɔbɔa xe fe na dɔwɔla aɖewo wova wɔ dzisasrã atɔ̃ ƒe atrakpuitoƒe sia ƒe nɔnɔme, eye Ðasefo lɔlɔ̃nu faa dɔwɔlawo va kɔ kɔnkreti ɖe eme wòzu gli.

Dɔwɔlawo le gakpo siwo dzi woakɔ kɔnkreti ɖo le nuwo dzraɖoƒe ƒe xɔtexɔa tame la dem esime sno le dzadzam. Tso January va se ɖe March me la, sno si gbegbe dza ɖe Warwick xɔtuƒea ate ŋu akɔ ade sentimeta 127 sɔŋ. Dɔwɔla aɖewo tsɔa sofi nɔa snoa fom ɖa le anyigba be dɔa nanya wɔ, eye wotu dzoxɔxɔnaƒewo hã ɖe teƒe vovovowo be dɔwɔlawo nava nɔ afi ma sẽe ne vuvɔa nu sẽ akpa.

Wodze xɔa gbagba gɔme. Kaka April ƒe nuwuwu naɖo la, wogba xɔdɔmeawo akpa gãtɔ vɔ. Woagba Xɔdɔmewo B hã vɔ le June ƒe domedome lɔƒo, eye eyae anye mamlɛtɔ si woagba.

Xɔdɔmewo B ye nye ema le dzedzem ɖaa; woɖe fotoe tso mɔ̃ kɔkɔ aɖe si kɔa nu kpekpewo dzi.

Pɔmpidɔwɔlawo le ŋku lém ɖe xɔa ƒe akpa vovovowo ƒe tata aɖewo ŋu le Teƒea Nɔlawo Ƒe Ʋutɔɖoƒea. Nutata vovovo 3,400 siwo dzi woda asi ɖo ye hiã na xɔtudɔ bliboa wɔwɔ.

Nukɔmɔ̃ aɖe kɔ dɔwɔla siawo ɖe dzi wole aŋekuntru titri aɖe fam ɖe xɔa ŋu be wòanɔ nɔnɔme nyui me. Wonaa hehe ame siwo kua mɔ̃ gãgã siwo kɔa nu kpekpewo kple mɔ̃ bubuwo la edziedzi ale be woaɖɔ ŋu ɖo le dɔ siawo wɔwɔ me. Nu siwo wofiaa wo ku ɖe dedienɔnɔ ŋu dometɔ aɖewoe nye mɔ̃ vovovo siwo kɔa nu kpekpewo zazã, dzesi siwo woawɔ na mɔ̃ siawo zãlawo, ale si woabla ka ɖe wo ɖokui ŋu ne wole dzidɔwo wɔm, mɔ̃ si wotsɔ tsyɔa ŋɔti be woagagbɔ ya ƒoɖi o zazã, kple mɔfiame bubuwo.

Xɔdɔmeawo ƒe ɣetoɖoƒekpa dzie nye ema le dzedzem. Le April ƒe nuwuwu lɔƒo la, wowu elɛktrikdɔwo kple yafamɔ̃ alo dzoxɔxɔnamɔ̃wo dede ŋu dɔ akpa gãtɔ nu le Xɔdɔmewo A, B, kple D, siwo dze le foto sia me la me. Wodze plastawɔwɔ, kpe zɔzrɔ̃ewo ɖoɖo kple aŋɔsisi gɔme le Xɔdɔmewo Ð me xoxo (eya medze le foto sia me o).

Nukɔmɔ̃ aɖe kɔ dɔwɔla eve siawo ɖe dzi wole aŋɔ ƒomevi aɖe si ana ya mato glia me o la sim ɖe glia ŋu. Exɔa ɣleti eve lɔƒo hafi wosia aŋɔ sia na xɔdɔmewo A, B, D, kple Ð dometɔ ɖe sia ɖe wua enu.

Gliɖolawo le kpegli ɖom. Agbawo ɖeƒe kple dɔwɔƒe bubuwo anɔ xɔa ƒe akpa sia.

Woxe fe na tsigɔmeyila aɖe wòva ɖɔli tsitoƒe si woɖe ɖe Blue Lake taa ŋu la ƒe nutunu. Wowɔ nutunu yeye sia ʋuƒe ɖe teƒe aɖe ale be ne ahom tu la, woate ŋu ate asi ɖe nutunua ʋuƒe dzi be tsia ƒe ɖe nasi to tsitoƒea be taa nagaɖɔ agbagba o.