Bible ọdọhọ, Ih. Bible etịn̄ ediwak n̄kpọ emi owụtde ke Abasi odu. Bible idọhọke nnyịn inịm ke Abasi odu ke ntak n̄kpọ emi nsio nsio ufọkabasi ẹsikpepde, edi ọdọhọ yak ida ibuot nnyịn, m̀mê ukeme ukere n̄kpọ nnyịn, ikere n̄kpọ man ikụt ke Abasi odu. (Rome 12:1; 1 John 5:20) Yak ise ndusụk se mme owo ẹdide ẹdidiọn̄ọ ke ntak n̄kpọ emi Bible etịn̄de:

•   Mme odu-uwem-n̄kpọ ye nte n̄kpọ asan̄ade ke nde ke nde ke ofụri ekondo owụt ke enyene Owo emi okobotde mme n̄kpọ. Bible ọdọhọ ete: “Kpukpru ufọk ẹnyene andibọp, edi enye emi ọkọbọpde kpukpru n̄kpọ edi Abasi.” (Mme Hebrew 3:4) Kpa ye oro se Bible etịn̄de emi etiede nte ekpri n̄kpọ, ediwak mme aka-n̄wed-owo ẹdọhọ ke idịghe ekpri ikọ edi oro. a

•   Esinen̄ede ọdọn̄ nnyịn mme owo ndidiọn̄ọ m̀mê nso idi ufọn uwem. Idem mbon emi ẹnyenede kpukpru se mmọ ẹyomde ẹsụk ẹyoyom ndidiọn̄ọ m̀mê nso idi ufọn uwem. N̄kpọ emi Bible okotde ‘unana ke n̄kan̄ eke spirit’ esinam nnyịn iyom ndidiọn̄ọ utọ n̄kpọ oro, esịnede ndiyom ndidiọn̄ọ Abasi nnyụn̄ n̄kpono enye. (Matthew 5:3; Ediyarade 4:11) Mme owo ndiyom ndidiọn̄ọ Abasi nnyụn̄ n̄kpono enye owụt n̄ko ke Abasi odu, ke enye edi edima Abasi emi okobotde nnyịn onyụn̄ oyomde nnyịn idiọn̄ọ imọ.—Matthew 4:4.

•   Bible ọdọn̄ọ nsio nsio prọfesi emi ẹketịn̄de ediwak isua ke edem mbemiso mmọ ẹsude. Edi kpa ye oro, kpukpru ama osu ata ukem ukem nte ẹketịn̄de ye ke ata nnennen ini. Emi n̄ko enen̄ede owụt ke prọfesi oro ikotoho owo.—2 Peter 1:21.

•   Mbon emi ẹkewetde Bible ẹma ẹwet mme n̄kpọ emi mbon eyo mmọ ẹkekerede ke edi nsu, edi emi ntaifiọk ẹkedide ẹdikụt ke ata ediwak isua ama ekebe ke edi akpanikọ. Ke uwụtn̄kpọ, ke eset ediwak owo ẹkedọhọ ke isọn̄ emi odoro ke edem nsio nsio unam, utọ nte enen, ayara edi, m̀mê ayara enan̄. Edi ẹma ẹwet ke Bible ẹte ke Abasi “ọkọn̄ isọn̄ ke ikpîkpu.” (Job 26:7) Ẹma ẹwet n̄ko ke Bible ke isọn̄ etie ekara ekara, m̀mê iboro iboro. (Isaiah 40:22) Ediwak owo ẹdọhọ ke mbon emi ẹkewetde Bible ikpekemeke-keme ndidiọn̄ọ utọ n̄kpọ oro ekpedi idịghe Abasi ọkọdọhọ mmọ.

•   Bible ọbọrọ ediwak mbụme emi edide edieke owo mîbọrọke ọfọn, ekeme ndinam ndusụk owo ẹtọn̄ọ ẹkere ke Abasi idụhe. Ke uwụtn̄kpọ, Bible ọbọrọ utọ mbume nte: Edieke Abasi amade mme owo onyụn̄ enyenede ofụri odudu, nso inam ndien enye ayak ufen ye ibak okpon ntem ke ererimbot? Ntak emi ediwak mme aka ufọkabasi ẹsinamde ndiọi n̄kpọ utu ke nti n̄kpọ?—Titus 1:16.