2 Corinth 6;1-18
6 Sia inamde utom ọtọkiet ye enye,+ nnyịn n̄ko imekpe mbufo ubọk ite ẹkûbọ mfọnido Abasi oro owo mîdotke edi ẹtaba uduak esie.+
2 Koro enye ọdọhọde ete: “Ke ini eke odotde mma nyere fi, mma nnyụn̄ n̄n̄wam fi ke usen edinyan̄a.”+ Sese! Akpan ini eke odotde edi emi.+ Sese! Usen edinyan̄a edi emi.+
3 Nnyịn inịmke baba n̄kpọ iduọ kiet,+ mbak ẹdikụt ndudue ẹnọ utom nnyịn;+
4 edi ke kpukpru usụn̄ nnyịn imowụt+ ke idi mme asan̄autom Abasi, ke ediyọ ekese, ke ukụt, ke unana, ke afanikọn̄,+
5 ke umia, ke n̄kpọkọbi,+ ke ndutịme, ke utom, ke ataba idap, ke ini ọbiọn̄,+
6 ke edisana ido, ke ifiọk, ke anyanime,+ ke mfọnido,+ ke edisana spirit, ke ima eke mîsan̄ake ye mbubịk,+
7 ke ikọ akpanikọ, ke odudu Abasi;+ ebe ke n̄kpọekọn̄+ edinen ido ke ubọk nnasia ye ke ufien,
8 ebe ke ubọn̄ ye esuene, ebe ke idiọk etop ye eti etop; nte mbon abian̄a+ edi kpa ye oro itịn̄ akpanikọ,
9 nte mmọ eke owo mîdiọn̄ọke edi kpa ye oro ẹdiọn̄ọ nnyịn,+ nte mmọ eke ẹkperede ndikpa, edi sese! nnyịn ke idu uwem,+ nte mmọ eke ẹtụnọde+ edi owo iwotke-wot nnyịn,+
10 nte mmọ eke ẹfụhọde edi idadara kpukpru ini, nte mme ubuene edi inam ediwak owo ẹdi imọ, nte mmọ eke mînyeneke n̄kpọ ndomokiet edi inyene kpukpru n̄kpọ.+
11 Nnyịn imatat inua nnyịn itịn̄ ikọ inọ mbufo, mbon Corinth, imonyụn̄ itat esịt+ nnyịn.
12 Ufan̄ odu ke esịt nnyịn ọnọ mbufo,+ edi ufan̄ idụhe ke esịt mbufo inọ ima.+
13 Ntre, nte usiene eke ekemde—ntịn̄ nte ntịn̄ nnọ nditọwọn̄+—mbufo, n̄ko, ẹtat esịt mbufo.
14 Ẹkûdian idem utịn̄e utịn̄e ye mmọ eke mînịmke ke akpanikọ.+ Koro nso ebuana ke edinen ido enyene ye ukwan̄ido?+ Mîdịghe nso ebuana ke un̄wana enyene ye ekịm?+
15 N̄ko-n̄ko, nso ebuana idu ke ufọt Christ ye Belial?+ Nso udeme+ ke owo eke enịmde ke akpanikọ enyene ye owo eke mînịmke ke akpanikọ?
16 Ndien nso ediomi ke temple Abasi odiomi ye ndem?+ Koro nnyịn idi temple+ odu-uwem Abasi; kpa nte Abasi ọkọdọhọde ete: “Nyodụn̄ ke otu mmọ+ nnyụn̄ nsan̄a ke otu mmọ, ndien nyedi Abasi mmọ, mmọ ẹyenyụn̄ ẹdi ikọt mi.”+
17 “‘Ke ntre ẹwọn̄ọ ke otu mmọ, ẹnyụn̄ ẹdian̄ade ẹda,’ Jehovah ọdọhọ, ‘ẹkûnyụn̄ ẹtụk n̄kpọ ndek’”;+ “‘ndien nyadara mbufo.’”+
18 “‘Ndien ami nyedi ete mbufo,+ mbufo ẹyenyụn̄ ẹdi nditọ mi iren ye nditọ mi iban,’+ Jehovah Ata Ọkpọsọn̄ ọdọhọ.”+
