2 Timothy 2;1-26
2 Ke ntre, afo eyen mi,+ ka iso kop odudu+ ebe ke mfọnido oro owo mîdotke+ emi odude ke Christ Jesus,
2 nyụn̄ yak mme ikọ oro okokopde mi ke inua, emi ediwak ntiense ẹkenyụn̄ ẹsọn̄ọde,+ sịn ke ubọk mbon akpanikọ, emi, n̄ko, ẹditịmde ẹdot ndikpep mbon en̄wen.+
3 Tiene biom ukụt+ nte eti owoekọn̄+ Christ Jesus.
4 Baba owo kiet eke anamde utom nte owoekọn̄+ isịnke idem ke mme mbubehe uwem emi,+ man enye ekpenyene unyịme owo oro esịnde enye enyịn̄ nte owoekọn̄.
5 Akan oro, edieke owo odomode ndikan ke mbre mbuba,+ owo idiyarake enye anyanya ibọhọke enye asan̄a nte ekemde ye ibet.
6 Ọtọin̄wan̄ oro anamde utom ọkpọsọn̄ edibem iso adia mfri.+
7 Tịm kere ban̄a se ndọhọde oro; Ọbọn̄ ọyọnọ fi mbufiọk+ ke kpukpru n̄kpọ.
8 Ti ete ẹma ẹnam Jesus Christ eset ke n̄kpa+ ndien enye ekedi mfri David,+ nte ekemde ye eti mbụk oro ami n̄kwọrọde;+
9 emi edide ntak eke ami n̄kụtde ndutụhọ tutu ẹsịn mi ke ufọk-n̄kpọkọbi+ nte anamidiọk. Edi, owo ikọbike ikọ Abasi.+
10 Ke ntak emi ami n̄ka iso nyọ kpukpru n̄kpọ ke ntak ndimek owo,+ man mmọ n̄ko ẹkpebọ edinyan̄a ebe ke Christ Jesus ọkọrọ ye nsinsi ubọn̄.+
11 Ikọ emi edi akpanikọ+ ete: Edieke ikpade ye enye, nnyịn iyodu uwem n̄ko ye enye.+
12 Edieke nnyịn ikade iso iyọ, nnyịn iyakara n̄ko ye enye nte ndidem;+ edieke ikan̄de+ enye, enye n̄ko ayakan̄ nnyịn;
13 edieke nnyịn mînamke akpanikọ, enye osụk ededi anam-akpanikọ,+ koro enye ikemeke ndikan̄ idemesie.
14 Ka iso ti+ mmọ mme n̄kpọ emi, owụkde+ mmọ ke iso Abasi nte ntiense,+ ete ẹkûn̄wana ẹban̄a ikọ,+ kpa n̄kpọ oro mînyeneke ufọn ndomokiet, koro enye adada nsobo ọsọk mbon oro ẹkopde.
15 Sịn ofụri ukeme fo ndiwụt idemfo nte owo emi Abasi enyịmede,+ anamutom+ emi mînyeneke ntak ndikop bụt,+ edi etịmde asiak ikọ akpanikọ.+
16 Edi fep idem ke mme ikpîkpu ndutịn̄ oro ẹsabarede se isanade;+ koro mmọ ẹyedọdiọn̄ ẹnana uten̄e Abasi,+
17 ndien ikọ mmọ ayatara nte ndọk.+ Hymenaeus ye Philetus ẹdu ke otu oro.+
18 Mmọ emi ẹma ẹwọn̄ọde ẹkpọn̄ akpanikọ,+ ẹdọhọde ẹte ediset ke n̄kpa ama etetịbe;+ ndien mmọ ke ẹbiat mbuọtidem ndusụk owo.+
19 Kpa ye kpukpru emi, ọkpọsọn̄ itiat idakisọn̄ Abasi ke ọsọn̄ọ ada,+ onyụn̄ enyene ufịkn̄kpọ emi: “Jehovah ọmọfiọk mmọ eke ẹnyenede enye,”+ ye: “Yak owo ekededi emi okotde enyịn̄ Jehovah+ ọwọn̄ọde ọkpọn̄ ukwan̄ido.”+
20 Edi ke akwa ufọk idịghe n̄kpoduoho gold ye n̄kpoduoho silver kpọt ẹdu, edi se ẹdade eto ye mbat ẹnam ẹdu n̄ko, ndien ẹnịm ndusụk ẹnọ itie ukpono edi ẹnịm mmọ eken ẹnọ itie eke mînyeneke ukpono.+
21 Ke ntre, edieke owo adian̄arede ọkpọn̄ mmọ eke mînyeneke ukpono, enye eyedi n̄kpọ oro ẹnịmde ẹnọ itie ukpono, ẹnamde asana,* enyenede ufọn ọnọ andinyene enye, emi ẹben̄ede ẹnịm ẹnọ kpukpru nti utom.+
22 Ntre, fehe kpọn̄ mme udọn̄ ini uyen,+ edi bịne edinen ido,+ mbuọtidem, ima, ye emem,+ nyụn̄ sọn̄ọ yịre ye mmọ eke ẹkotde Ọbọn̄ ke edisana esịt.+
23 N̄ko-n̄ko, fep idem ke ndisịme mbụme+ emi mîsịneke ifiọk, sia ọfiọkde ete mmọ ẹsidemede en̄wan.+
24 Edi ofụn Ọbọn̄ inyeneke ndin̄wana en̄wan,+ edi enyene nditie sụn̄sụn̄ ye kpukpru owo,+ odot ndikpep owo n̄kpọ,+ omụm idem akama ke ini ẹnamde enye idiọk,+
25 ada ifụre ifụre ido eteme mbon oro ẹbiọn̄ọde-biọn̄ọ;+ m̀mê oyoto do Abasi ayak mmọ ẹkabade esịt+ ẹdinyene nnennen ifiọk akpanikọ,+
26 man mmọ ẹkpefiak ẹkere n̄kpọ nte odotde ẹnyụn̄ ẹwọrọ ke ekpọ+ Devil, ke ẹkụtde ẹte enye ama omụm mmimọ ye uwem+ ete inam uduak esie.
Mme Ikọ Idakisọn̄
^ M̀mê, “ẹdian̄arede ẹnịm ẹnọ Abasi.”
