Daniel 4;1-37
4 “Edidem Nebuchadnezzar ọkọm kpukpru owo ye idụt ye usem oro ẹdụn̄de ke ofụri isọn̄ ete:+ Emem mbufo akpakam okpon.+
2 Ọfọn mi ndibụk mme idiọn̄ọ ye mme utịben̄kpọ emi Ata Edikon̄ Abasi anamde ye ami.+
3 Mme idiọn̄ọ esie ẹkponi adan̄a didie, mme utịben̄kpọ esie ẹnyụn̄ ẹkop odudu adan̄a didie!+ Obio ubọn̄ esie edi obio ubọn̄ emi odude ke nsinsi,+ ukara esie onyụn̄ odu ke ofụri emana.+
4 “Ami, Nebuchadnezzar, n̄kodu ke ifụre+ ke ufọk mi nnyụn̄ mforo ke ufọk ubọn̄ mi.+
5 Mma ndaba ndap emi akanamde mi ndịk.+ Mme n̄kpọ oro n̄kanade ke bed mi n̄kere ye n̄kukụt emi n̄kokụtde ẹma ẹnam mi ndịk.+
6 Ndien mma nnọ uyo nte ẹda kpukpru mbon ọniọn̄ Babylon ẹdi ke iso mi, man mmọ ẹkpesian mi se ndap oro ọwọrọde.+
7 “Ndien mme oku mfọni ye mme ọkọk-ibọk ye mme Chaldean+ ye mme asiak ntantaọfiọn̄+ ẹdụk ẹdi; ndien ami ntịn̄ ndap oro nnọ mmọ, edi mmọ ikemeke ndisian mi se enye ọwọrọde.+
8 Ndien ke akpatre Daniel, emi ekerede Belteshazzar,+ nte enyịn̄ abasi+ mi asan̄ade, emi spirit ndisana abasi onyụn̄ odude enye ke idem,+ odụk edi ke iso mi; ndien ntịn̄ ndap oro nnọ enye nte:
9 “‘O Belteshazzar, etubom mme oku mfọni,+ sia ntịmde mfiọk nte ke spirit ndisana abasi odu fi ke idem+ ye nte ke idụhe baba ndịben̄kpọ kiet eke ọsọn̄de fi,+ sian mi se n̄kokụtde ke ndap ye se enye ọwọrọde.+
10 “‘Ekem n̄kụt n̄kukụt ke bed mi,+ ndien sese! eto+ kiet emi ọniọn̄de etieti odu ke ufọt isọn̄.+
11 Eto oro ọkọri onyụn̄ ọsọn̄ idem, onyụn̄ ọniọn̄ esịm ikpaenyọn̄, ẹnyụn̄ ẹkeme ndida ke utịt ofụri isọn̄ n̄kụt.+
12 Ikọn̄ esie eye, mfri esie onyụn̄ awak, udia onyụn̄ odu ke enye ọnọ kpukpru n̄kpọ. Unam+ ikọt ẹdụk ke mfụt esie,+ ndien inuen enyọn̄ ẹdụn̄ ke mme n̄kọk esie,+ kpukpru obụkidem ẹnyụn̄ ẹdia n̄kpọ ke esịt.
13 “‘Ekem n̄kụt ke n̄kukụt ke ini nnade ke bed mi, ndien, sese! andikpeme,+ kpa edisana owo,+ oto ke heaven osụhọde edi.
14 Enye ofiori ke ọkpọsọn̄ uyo, onyụn̄ ọdọhọ ntem ete: “Ẹkek eto oro ẹduọk,+ ẹnyụn̄ ẹkpok n̄kọk esie. Ẹken̄ ikọn̄ esie, ẹnyụn̄ ẹsuan mfri esie. Yak mme unam ikọt ẹwọrọ ke idak esie, inuen ẹnyụn̄ ẹkpọn̄ n̄kọk esie.+
15 Edi ẹyak etak esie osụk odu ke isọn̄, ẹnyụn̄ ẹda ubọpn̄kpọ ukwak ye okpoho ẹbọp enye ẹyak odu ke otu mbiet ikọt; yak mbara enyọn̄ ebịt enye, yak udeme esie onyụn̄ odu ye mme unam ikọt ke otu mbiet ke isọn̄.+
16 Yak ẹkpụhọ enye esịt owo ẹnọ eke unam,+ ndien yak ini itiaba+ ẹbe enye.
17 N̄kpọ emi etịbe ke ewụhọ mme andikpeme,+ ikọ emi onyụn̄ ọwọrọ ke ubiere ndisana owo, man mbon oro ẹdude uwem ẹkpefiọk ẹte ke Ata Edikon̄ edi Andikara ke obio ubọn̄ ubonowo+ ye nte ke owo ekededi eke enye amade ke enye emen ọnọ,+ onyụn̄ emen kpa ata usụhọde owo ke otu ubonowo odori.”+
18 “‘Ndap emi ke ami, Edidem Nebuchadnezzar, n̄kadaba; ndien afo, O Belteshazzar, tịn̄ se enye ọwọrọde, koro kpukpru mbon ọniọn̄ eken ke obio ubọn̄ mi mîkemeke ndinam mi mfiọk se enye ọwọrọde.+ Edi afo emekeme, koro spirit ndisana abasi odude fi ke idem.’+
19 “Ndien idem akpa Daniel, emi ekerede Belteshazzar,+ ke esisịt ini, se enye ekerede onyụn̄ anam enye ndịk.+
“Edidem ọbọrọ onyụn̄ ọdọhọ ete, ‘O Belteshazzar, kûyak ndap oro ye se enye ọwọrọde ẹnam fi ndịk.’+
“Belteshazzar ọbọrọ onyụn̄ ọdọhọ ete, ‘O ọbọn̄ mi, yak ndap emi ọwọrọ ọnọ mmọ eke ẹsuade fi, se enye ọwọrọde onyụn̄ osu ọnọ mme asua fo.+
20 “‘Eto oro afo okokụtde, emi ọkọkọride okpon onyụn̄ ọsọn̄de idem, onyụn̄ ọniọn̄de esịm ikpaenyọn̄, emi ẹnyụn̄ ẹdade ke ofụri isọn̄ ẹkụt,+
21 ikọn̄ esie onyụn̄ eyede, mfri esie onyụn̄ awakde, udia onyụn̄ odu ke enye ọnọ kpukpru n̄kpọ; mme unam ikọt ẹnyụn̄ ẹdụn̄de ke idak esie, inuen enyọn̄ ẹnyụn̄ ẹdụn̄de ke n̄kọk esie,+
22 edi afo, O edidem,+ koro afo omokpon onyụn̄ ọsọn̄ idem, uku fo omokpon esịm enyọn̄,+ ukara fo onyụn̄ esịm utịt isọn̄.+
23 “‘Ndien koro edidem okokụtde andikpeme, kpa edisana owo,+ nte otode heaven osụhọde edi, onyụn̄ ọdọhọde ete: “Ẹkek eto oro ẹduọk, ẹnyụn̄ ẹbiat enye. Edi ẹyak etak esie osụk odu ke isọn̄, ẹnyụn̄ ẹda ubọpn̄kpọ ukwak ye okpoho ẹbọp enye ẹyak odu ke otu mbiet ikọt, yak mbara enyọn̄ onyụn̄ ebịt enye, yak udeme esie onyụn̄ odu ye mme unam ikọt tutu ini itiaba ẹbe enye,”+
24 se enye ọwọrọde edi emi, O edidem, enye onyụn̄ edi ewụhọ+ Ata Edikon̄+ emi edisịmde ọbọn̄ mi edidem.+
25 Ndien mmọ ẹyebịn fi ẹfep ke otu owo, afo oyonyụn̄ odụn̄ ye mme unam ikọt,+ ẹyenyụn̄ ẹnọ fi mbiet ikọt ata nte enan̄;+ ndien mbara enyọn̄ eyebịt fi idem, ini itiaba+ ẹyenyụn̄ ẹbe fi, tutu afo ọfiọk ete ke Ata Edikon̄ edi Andikara ke obio ubọn̄ ubonowo,+ ye nte ke enye ada enye ọnọ owo eke enye amade.+
26 “‘Ndien sia mmọ ẹkedọhọde ẹyak etak eto oro osụk odu,+ obio ubọn̄ fo oyosụk ana ọnọ fi ke afo ama edifiọk ete ke Abasi akara ke heaven.+
27 Ntem, O edidem, yak item mi ọfọn ke iso fo,+ sio idiọkido fo fep ke ndinam edinen ido+ nyụn̄ men ukwan̄n̄kpọ fo fep ke nditua mme ubuene mbọm.+ M̀mê oyoto do uforo fo ebịghi.’”+
28 Kpukpru emi ọkọwọrọ Edidem Nebuchadnezzar.+
29 Ke utịt ọfiọn̄ enyọn̄ duopeba, enye asan̄a ke enyọn̄ ufọk ubọn̄ Babylon.
30 Edidem ọbọrọ onyụn̄ ọdọhọ ete:+ “Nte emi idịghe Akwa Babylon, emi ndade akwa odudu+ mi mbọp kaban̄a ufọk ubọn̄ ye kaban̄a uku ubọn̄ mi?”+
31 Ke adan̄aemi edidem osụk etịn̄de ikọ emi, uyo oto ke heaven ọdọhọ ete: “Ẹtịn̄ ẹban̄a fi, O Edidem Nebuchadnezzar, ẹte, ‘Obio ubọn̄ ọmọkpọn̄ fi,+
32 mmọ ẹmenyụn̄ ẹbịn fi ẹsio ke otu ubonowo, afo oyonyụn̄ odụn̄ ye mme unam ikọt.+ Mmọ ẹyenọ fi mbiet ata nte enan̄, ndien ini itiaba ẹyebe fi, tutu afo edifiọk ete ke Ata Edikon̄ edi Andikara ke obio ubọn̄ ubonowo, enye onyụn̄ ada enye ọnọ owo eke enye amade.’”+
33 Kpa idaha oro,+ ikọ oro osu Nebuchadnezzar ke idem, ndien ẹbịn enye ẹsio ke otu ubonowo, enye onyụn̄ ọtọn̄ọ ndita mbiet nte enan̄, mbara enyọn̄ onyụn̄ ebịt enye idem, tutu idet esie ọkọri ọniọn̄ nte ntan̄ ntrukpom, mbara esie ẹnyụn̄ ẹniọn̄ nte mbara inuen.+
34 “Ndien ke utịt mme usen oro,+ ami Nebuchadnezzar, mmenede enyịn nse enyọn̄,+ nnyụn̄ ntọn̄ọ ntak ndiọn̄ọ idem; ndien n̄kọm Ata Edikon̄,+ ntoro nnyụn̄ n̄kpono Enye emi odude ke nsinsi,+ koro ukara esie edi ukara emi odude ke nsinsi, obio ubọn̄ esie onyụn̄ odu ke ofụri emana.+
35 Ndien ẹbat kpukpru mme andidụn̄ isọn̄ ke ikpîkpu,+ ndien enye anam nte enye amade ke otu mme udịm enyọn̄ ye mme andidụn̄ isọn̄.+ Ndien idụhe baba owo kiet emi ekemede ndimụm enye ubọk+ m̀mê emi ekemede ndidọhọ enye ete, ‘Afo ananam nso?’+
36 “Kpa idaha oro, ntọn̄ọ ntak ndiọn̄ọ idem, ndien uku obio ubọn̄ mi esịn uten̄e mi ye uyama mi ẹfiak ẹtiene mi;+ ndien ikpọ owo ufọk ubọn̄ mi ye ikpọ owo ukara ẹtọn̄ọ ndisịn ifịk nyom mi, ndien ẹfiak ẹdori mi ke ebekpo ubọn̄ mi, ẹnyụn̄ ẹdian akwa ubọn̄ ẹnọ mi.+
37 “Ke emi, ami Nebuchadnezzar, mmotoro nnyụn̄ n̄kpono nnyụn̄ nnọ Edidem enyọn̄ ubọn̄,+ koro kpukpru utom esie ẹdide akpanikọ, mme usụn̄ esie ẹnyụn̄ ẹnende,+ koro enye ekeme ndisụhọde mmọ eke ẹtan̄de idem.”+
