Isaiah 2;1-22
2 N̄kpọ emi ke Isaiah eyen Amoz okokụt aban̄a Judah ye Jerusalem:+
2 Ndien ama ekem ke mme akpatre usen,+ obot ufọk+ Jehovah ọyọsọn̄ọ owụhọ okon̄ akan enyọn̄ ikpọ obot,+ ẹyenyụn̄ ẹmenede enye okon̄ akan n̄kpri obot;+ ndien kpukpru mme idụt ẹyebụn̄ọ ẹka do.+
3 Ndien ediwak owo ẹyeka ẹkedọhọ ẹte: “Mbufo ẹdi,+ ẹyak nnyịn idọk ke obot Jehovah ye ke ufọk Abasi Jacob; ndien enye eyekpep nnyịn mme usụn̄ esie, nnyịn iyonyụn̄ isan̄a ke mme afan̄usụn̄ esie.”+ Koro ibet oyoto ke Zion ọwọrọ, uyo Jehovah oyonyụn̄ oto ke Jerusalem.+
4 Ndien enye eyekpe ikpe ke otu mme idụt+ onyụn̄ enen̄ede mme n̄kpọ+ ọnọ ediwak owo.+ Ndien mmọ ẹyeda akan̄kan̄ mmọ ẹdom n̄kpọ ufụn̄isọn̄ ẹnyụn̄ ẹda eduat mmọ ẹdom ikwa udiọn̄ eto.+ Idụt idimenke akan̄kan̄ itiene idụt, mmọ idinyụn̄ ikpepke aba ekọn̄.+
5 O mbufo mbon ufọk Jacob, ẹdi ẹnyụn̄ ẹyak nnyịn isan̄a ke un̄wana Jehovah.+
6 Koro afo ọmọkpọn̄ ikọt fo, ufọk Jacob.+ Koro se itode Edem Usiahautịn+ ẹyọhọde ke otu mmọ, ndien mmọ ẹdi mme ebre mfọni+ kpa nte mbon Philistia, mmọ ẹnyụn̄ ẹdian idem ye nditọ esenidụt.+
7 Silver ye gold ẹnyụn̄ ẹyọhọ isọn̄ mmọ, ndien n̄kpọuto mmọ inyeneke ibat.+ Ndien mme enan̄-mbakara ẹyọhọ isọn̄ mmọ, mme chariot mmọ inyụn̄ inyeneke ibat.+
8 Ndien mme abasi eke mînyeneke ufọn+ ẹyọhọ isọn̄ mmọ. Mmọ ẹnụhọ ẹnọ utom ubọk owo, emi nnuenubọk owo anamde.+
9 Ndien owo osụhọde idemesie itie, enye onyụn̄ akabade edi usụhọde n̄kpọ, ndien afo udahakedo unọ mmọ.+
10 Dụk ke akwa itiat nyụn̄ dịbe ke ntọn̄ ke ntak ndịk Jehovah, ye ke ntak uyama ubọn̄ esie.+
11 Enyịn iseri owo oyosụhọde, ntan̄idem mme owo oyonyụn̄ osụhọde;+ ndien Jehovah ikpọn̄-ikpọn̄ ke ẹnyene ndimenede ke enyọn̄ ke usen oro.+
12 Koro usen oro enyene Jehovah mme udịm.+ Enye eyesịm kpukpru mbon iseri ye mbon ntan̄idem, onyụn̄ esịm kpukpru mbon oro ẹmenerede idem ke enyọn̄ m̀mê mme usụhọde owo;+
13 eyesịm kpukpru mme cedar Lebanon+ emi ẹkon̄de ẹnyụn̄ ẹmenerede ke ẹnyọn̄ onyụn̄ esịm kpukpru ikpọ eto Bashan;+
14 eyesịm kpukpru n̄kokon̄ ikpọ obot ye n̄kpri obot emi ẹmenerede ke enyọn̄+;
15 eyesịm kpukpru edikon̄ tọwa ye kpukpru ibibene ukpeme;+
16 eyesịm kpukpru nsụn̄ikan̄ Tarshish+ ye kpukpru ndiye ubom.
17 Ndien iseri owo oyosụhọde, ntan̄idem mme owo oyonyụn̄ osụhọde;+ ndien Jehovah ikpọn̄-ikpọn̄ ke ẹnyene ndimenede ke enyọn̄ ke usen oro.+
18 Ndien mme abasi eke mînyeneke ufọn ẹyebe ẹfep ofụri ofụri.+
19 Ndien mme owo ẹyedụk mme aba ikpọ itiat ye ndudu isọn̄ ke ntak ndịk Jehovah ye ke ntak uyama ubọn̄ esie,+ ke ini enye adahade ke enyọn̄ ndinam isọn̄ enyek.+
20 Ke usen oro owo eyemen mbukpo abasi silver esie ye mme abasi gold esie eke mînyeneke ufọn, oro mmọ ẹkenamde ẹnọ enye ẹte onụhọ ọnọ, okotop ọduọn̄ọ ọnọ mme usịne ye mme emian̄,+
21 man enye odụk aba ikpọ itiat ye nsiaha ikpọ itiat, ke ntak ndịk Jehovah ye ke ntak uyama ubọn̄ esie,+ ke ini enye adahade ke enyọn̄ ndinam isọn̄ enyek.
22 Ke ufọn mbufo, ẹkpeme idem ye owo emi ibifịk esie odude enye ke odudu ibuo,+ koro ke nso ntak ke ẹkpebat enye ke n̄kpọ?+
