Jeremiah 38;1-28
38 Ndien Shephatiah eyen Mattan ye Gedaliah eyen Pashhur ye Jucal+ eyen Shelemiah ye Pashhur eyen Malchijah+ ẹdi ẹdikop ikọ oro Jeremiah eketịn̄de ọnọ kpukpru owo,+ ete:
2 “Ntem ke Jehovah ọdọhọ ete, ‘Owo eke odụn̄de ke obio emi edikpa ke akan̄kan̄,+ ye ke akan̄+ ye ke idiọk udọn̄ọ.+ Edi owo eke ọwọrọde etiene mbon Chaldea edidu uwem, enye oyonyụn̄ enyene ukpọn̄ esie nte n̄kpọ mbụme onyụn̄ odu uwem.’+
3 Ntem ke Jehovah ọdọhọ ete, ‘Owo iditreke ndiyak obio emi nsịn ke ubọk udịmekọn̄ edidem Babylon, enye idinyụn̄ itreke ndikan enye.’”+
4 Ndien mbọn̄ ẹdọhọ edidem ẹte: “Mbọk, yak ẹwot owo emi,+ koro ntem ke enye anam ubọk emem mbonekọn̄ oro ẹsụhọde ke obio emi onyụn̄ anam ubọk emem kpukpru owo, ke nditịn̄ kpukpru ikọ emi nnọ mmọ.+ Koro owo emi iyomke emem mbon emi edi oyom afanikọn̄ mmọ.”
5 Ntre Edidem Zedekiah ọdọhọ ete: “Sese! Enye esịne mbufo ke ubọk. Koro idụhe baba n̄kpọ kiet emi edidem ekemede ndinam mbiọn̄ọ mbufo.”+
6 Ndien mmọ ẹmen Jeremiah ẹketop ẹsịn ke obube udọn̄ mmọn̄ Malchijah+ eyen edidem, emi odude ke Okụre Ufọk Ukpeme.+ Ntre mmọ ẹda urụk ẹsụhọde Jeremiah ẹsịn. Mmọn̄ ikodụhe ke obube udọn̄ mmọn̄ oro, edi okpụk okodu; ndien Jeremiah etịghede odụk okpụk oro.+
7 Ndien Ebed-melech owo Ethiopia,+ emi edide eunuch onyụn̄ odude ke ufọk edidem, okop ke mmọ ẹma ẹsịn Jeremiah ke obube udọn̄ mmọn̄; ndien edidem eketie ke Inuaotop Benjamin.+
8 Ntre Ebed-melech ọwọrọ ke ufọk edidem ọkọdọhọ edidem, ete:
9 “O ọbọn̄ mi edidem, mbon emi ẹmenam idiọk ke kpukpru n̄kpọ oro mmọ ẹnamde prọfet Jeremiah, emi mmọ ẹtopde ẹsịn ke obube udọn̄ mmọn̄, man enye akpa+ ke ebiet emi enye odude ke ntak akan̄.+ Koro uyo baba kiet idụhe aba ke obio.”
10 Ekem edidem owụk Ebed-melech owo Ethiopia, ete: “Da irenowo edịp ye duop emi ẹdude ye afo ke ebiet emi ka kosio prọfet Jeremiah ke obube udọn̄ mmọn̄ mbak enye edikpa.”+
11 Mmọdo Ebed-melech ada irenowo oro ẹdude ye enye aka ufọk edidem ke itie ubon n̄kpọuto+ onyụn̄ okosion̄o ntaha ọfọn̄ ye mbai ọfọn̄ do, ndien enye ada urụk osụhọde mmọ esịn ke obube udọn̄ mmọn̄+ oro ọnọ Jeremiah.
12 Ekem Ebed-melech owo Ethiopia ọdọhọ Jeremiah ete: “Mbọk, men ntaha ọfọn̄ ye mbai ọfọn̄ emi sịn ke n̄kpafaha fo ke idak urụk.” Jeremiah onyụn̄ anam ntre.+
13 Ke akpatre mmọ ẹda urụk oro ẹdụri Jeremiah ẹsio ke obube udọn̄ mmọn̄ oro. Ndien Jeremiah osụk odu ke Okụre Ufọk Ukpeme.+
14 Ndien Edidem Zedekiah ọdọn̄ ete ẹkeda prọfet Jeremiah ẹsọk imọ+ ke ọyọhọ usụn̄ ita emi ẹsisan̄ade ẹdụk,+ emi odude ke ufọk Jehovah,+ ekem edidem ọdọhọ Jeremiah ete: “Ami mmọn̄ mbụp fi n̄kpọ. Kûdịp mi baba n̄kpọ kiet.”+
15 Ntre Jeremiah ọdọhọ Zedekiah ete: “Edieke nsiande fi, nte afo uduwotke mi? Ndien edieke nnọde fi item, afo udukopke uyo mi.”+
16 Ntem Edidem Zedekiah ọn̄wọn̄ọ ọnọ Jeremiah ke ebiet udịbe, ete: “Ma uwem Jehovah, emi ọnọde nnyịn uwem emi,+ ami ndiwotke fi, ndinyụn̄ nyakke fi nsịn ke ubọk mbon emi ẹyomde ukpọn̄ fo.”+
17 Ke emi Jeremiah ọdọhọ Zedekiah ete: “Ntem ke Jehovah, Abasi mme udịm,+ Abasi Israel,+ ọdọhọ ete, ‘Edieke afo ediwọrọde etiene mbọn̄ edidem Babylon,+ ukpọn̄ fo n̄ko oyodu uwem, owo idinyụn̄ ifọpke obio emi ke ikan̄, ndien afo ye mbonufọk fo ẹyedu uwem.+
18 Edi edieke afo mûduwọrọke utiene mbọn̄ edidem Babylon, ẹyeyak obio emi n̄ko ẹsịn ke ubọk mbon Chaldea, mmọ ẹyenyụn̄ ẹfọp enye ke ikan̄,+ ndien afo udufeheke ubọhọ ubọk mmọ.’”+
19 Ekem Edidem Zedekiah ọdọhọ Jeremiah ete: “Ami mfehe mme Jew oro ẹwọrọde ẹtiene mbon Chaldea,+ mbak mmọ ẹdiyak mi ẹsịn mmọ ke ubọk ndien mmọ ẹsuene mi.”+
20 Edi Jeremiah ọdọhọ ete: “Mmọ idinamke orụk n̄kpọ oro. Mbọk, kop uyo Jehovah ke se ami ntịn̄de nnọ fi, ndien ọyọfọn ye afo,+ ukpọn̄ fo oyonyụn̄ odu uwem.
21 Edi edieke afo esịnde ndiwọrọ ntiene mmọ,+ n̄kpọ emi ke Jehovah anam mi n̄kụt:
22 Ndien, sese! ke ẹda kpukpru iban oro ẹkeyakde ẹsụhọ ke ufọk edidem Judah+ ẹwọrọ ẹsọk mbọn̄ edidem Babylon,+ ndien mmọ ke ẹdọhọ ẹte,
‘Mbon oro ẹdude ke emem ye afo ẹmetap fi+ ẹnyụn̄ ẹkan fi.+
Mmọ ẹmenam ukot fo etịghede odụk okpụk; mmọ ẹmefiak edem ẹsan̄a n̄kan̄ eken.’+
23 Ndien mmọ ke ẹsion̄o kpukpru iban fo ye nditọ fo ẹsọk mbon Chaldea, afo udunyụn̄ ufeheke ubọhọ ubọk mmọ,+ edi ubọk edidem Babylon oyomụm fi, ndien ke ntak fo ẹyefọp obio emi ke ikan̄.”+
24 Ndien Zedekiah ọdọhọ Jeremiah ete: “Kûyak baba owo kiet ọfiọk mme n̄kpọ emi, mbak afo udukpa.
25 Ndien edieke mbọn̄+ ẹkopde ke ami mmenyene nneme ye afo ndien mmọ ẹdi ẹbịne fi ẹdidọhọ fi ẹte, ‘Mbọk, sian nnyịn, Nso ke afo ekeneme ye edidem? Kûdịp nnyịn baba n̄kpọ kiet, ndien nnyịn idiwotke fi. Nso ke edidem okonyụn̄ eneme ye afo?’
26 afo enyene ndidọhọ mmọ n̄ko ete, ‘Ami n̄kemen eben̄e mi oro n̄keben̄ede nyom mfọn nnịm edidem ke iso, nte enye okûnọ mi mfiak n̄ka ufọk Jehonathan+ n̄kakpa do.’”
27 Ekem kpukpru mbọn̄ ẹdụk ẹbịne Jeremiah ẹnyụn̄ ẹbụp enye mbụme. Ntem, enye asian mmọ nte ekemde ye kpukpru ikọ emi edidem okowụkde enye.+ Ntre mmọ isioroke uyo ke iso esie, koro owo ikokopke n̄kpọ oro.
28 Ndien Jeremiah odu ke Okụre Ufọk Ukpeme+ tutu esịm usen oro ẹkekande Jerusalem.+ Ndien emi eketịbe kpa ke ini emi ẹkekande Jerusalem.+
