Matthew 9;1-38
9 Ntre, enye ediere ke ubom, ebe aka edem oko onyụn̄ okodụk obio esiemmọ.+
2 Ndien, sese! mmọ ẹmen owo akpauben̄ kiet emi anade ke n̄kpana ẹsọk enye.+ Ke ini Jesus okụtde mbuọtidem mmọ, enye ọdọhọ owo akpauben̄ oro ete: “Sọn̄ esịt, eyen; ẹmefen mme idiọkn̄kpọ fo.”+
3 Ndien, sese! ndusụk mme scribe* ẹdọhọ ke idemmọ ẹte: “Owo emi etịn̄ ikọ isụn̄i adian Abasi.”+
4 Edi ke Jesus ọfiọkde ekikere mmọ,+ enye obụp ete: “Ntak emi mbufo ẹkerede ndiọi n̄kpọ ke esịt mbufo?+
5 Ke uwụtn̄kpọ, ewe emem akan, ndi ndidọhọ, Ẹmefen mme idiọkn̄kpọ fo, m̀mê ndidọhọ, Daha ke enyọn̄ san̄a?+
6 Edi, man mbufo ẹfiọk ẹte ke Eyen owo enyene odudu ke isọn̄ ndifen mme idiọkn̄kpọ+—” ndien enye ọdọhọ owo akpauben̄ oro ete: “Daha ke enyọn̄, men n̄kpana fo nyọn̄ ufọk fo.”+
7 Ndien enye adaha ke enyọn̄ ọnyọn̄ ufọk esie.
8 Ke ini otuowo ẹkụtde emi, ndịk anam mmọ, mmọ ẹnyụn̄ ẹnọ Abasi ubọn̄,+ kpa enye emi ọkọnọde mme owo utọ odudu+ oro.
9 Ekem, nte Jesus asan̄ade do ebe, enye okụt owo emi ekerede Matthew nte etiede ke itie ubọ tax, ndien enye ọdọhọ enye ete: “Tiene mi.”*+ Ndien enye adaha ke enyọn̄ etiene enye.+
10 Edikem, ke ini enye etiede ke okpokoro ke ufọk,+ sese! ediwak mme ọbọ a-tax ye mme anamidiọk ẹdi ẹditie ye Jesus ye mme mbet esie.
11 Edi ke ini mme Pharisee ẹkụtde emi, mmọ ẹbụp mme mbet esie ẹte: “Ntak emi andikpep mbufo adiade n̄kpọ ye mme ọbọ a-tax ye mme anamidiọk?”+
12 Ke ini enye okopde emi, enye ọdọhọ mmọ ete: “Mbon emi idem ọsọn̄de isiyomke abiausọbọ,+ edi mbon oro idem mîsọn̄ke ẹsiyom.
13 Ẹka, ndien, ẹkekpep se emi ọwọrọde, ‘Nyom mbọm, idịghe uwa.’+ Koro n̄kedịghe ndikot ndinen owo, edi n̄kedi ndikot mme anamidiọk.”
14 Ndien mme mbet John ẹdi ẹbịne enye ẹdibụp ẹte: “Ntak emi nnyịn ye mme Pharisee itiede utreudia edi mme mbet fo itiehe?”+
15 Edi Jesus ọbọrọ mmọ ete: “Ndi mme ufan ebendọ ẹnyene ntak ndifụhọ adan̄a nte ebendọ+ odude ye mmọ? Edi mme usen ẹyedi eke ẹdibọde+ mmọ ebendọ, ndien adan̄aoro mmọ ẹyetie utreudia.+
16 Baba owo kiet idaha ubak obufa ọfọn̄ ikịm idian ke akani ewụra; koro odudu esie oyodụri ewụra oro ndien nde n̄waha esie etetịm ọdiọk.+
17 Owo isinyụn̄ isịnke obufa wine ke n̄kani ikpa wine; edieke ẹsịnde, ikpa wine oro ẹyesiaha ndien wine ọduọhọ, ikpa wine ẹnyụn̄ ẹtak.+ Edi mme owo ẹsisịn obufa wine ke mbufa ikpa wine, ndien mbiba itakke.”+
18 Ke adan̄aemi enye osụk etịn̄de mme n̄kpọ emi ọnọ mmọ, sese! andikara+ kiet emi akasan̄ade ekpere edinụhọ ọnọ enye+ onyụn̄ ọdọhọ ete: “Anaedi eyen mi an̄wan akpakpa ko;+ edi di didori enye ubọk ndien enye oyodu uwem.”+
19 Ndien Jesus adaha ke enyọn̄, etiene enye; mme mbet esie ẹnyụn̄ ẹtiene enye.
20 Ndien, sese! n̄wan emi ọdọn̄ọde uwọrọiyịp+ ke isua duopeba oto edem edem editụk nyeriye ewụra esie;+
21 koro enye ọkọdọhọde ke esịt esie ete: “N̄kpakam ntotụk ewụra esie nyokop nsọn̄idem.”+
22 Jesus ọwọn̄ọde, ndien ke ini enye okụtde enye, ọdọhọ ete: “Sọn̄ esịt, eyenan̄wan; mbuọtidem fo amanam idem ọsọn̄ fi.”+ Ndien ọtọn̄ọde ke ini oro n̄wan oro okop nsọn̄idem.+
23 Ndien, ke ini enye edide edisịm ufọk andikara+ oro onyụn̄ okụtde mme efri ifiom ye otuowo nte ẹsịnde editịm,+
24 Jesus ọdọhọ ete: “Ẹwọn̄ọ mi, koro ekpri eyenan̄wan emi ikpaha-kpa, edi edede.”+ Ntem mmọ ẹtọn̄ọ ndisak enye nsahi.+
25 Ke ndondo oro ẹma ẹkenam otuowo ẹwọn̄ọ an̄wa, enye ebe odụk okomụm enye ubọk,+ ndien ekpri eyenan̄wan emi adaha ke enyọn̄.+
26 Ke akpanikọ, etop n̄kpọ emi asuana ke ofụri ikpehe oro.
27 Nte Jesus otode do asan̄a ebe, nnan iba+ ẹtiene enye, ẹfiori ẹnyụn̄ ẹdọhọ ẹte: “Tua nnyịn mbọm,+ Eyen David.”
28 Ke enye ama okodụk ufọk, nnan iba oro ẹdụk ẹtiene enye, ndien Jesus obụp mmọ ete: “Ndi mbufo ẹmenyene mbuọtidem+ ẹte ke ami mmekeme ndinam emi?” Mmọ ẹbọrọ ẹte: “Ih, Ọbọn̄.”
29 Ekem enye otụk mmọ enyịn,+ ọdọhọ ete: “Yak ọwọrọ ọnọ mbufo nte mbuọtidem mbufo edide.”
30 Ndien enyịn atara mmọ. Akan oro, Jesus owụk mmọ ete: “Ẹkụt ẹte ke baba owo kiet ifiọkke n̄kpọ emi.”+
31 Edi ke mmọ ẹma ẹkewọrọ an̄wa, mmọ ẹsuan etop n̄kpọ emi ke ofụri ikpehe oro.+
32 Edi ke ini mmọ ẹyomde ndikpọn̄ do, sese! mme owo ẹda imụm kiet emi enyenede demon ẹsọk enye;+
33 ndien ke ama ekebịn demon emi osio imụm oro etịn̄ ikọ.+ Edi idem akpa+ otuowo, mmọ ẹnyụn̄ ẹdọhọ ẹte: “Akananam owo ikwe mbiet n̄kpọ ntem ke Israel.”
34 Edi mme Pharisee ẹdọhọ ẹte: “Enye ada odudu andikara mme demon ebịn mme demon.”+
35 Ndien Jesus asan̄a akanade kpukpru obio ye mme obio-in̄wan̄, ekpep n̄kpọ ke mme synagogue mmọ onyụn̄ ọkwọrọ eti mbụk obio ubọn̄ onyụn̄ ọkọk kpukpru orụk udọn̄ọ ye kpukpru orụk ndiọkidem.+
36 Ke ini enye okụtde otuowo mbọm mmọ anam enye,+ koro ẹfiomode ẹnyụn̄ ẹsuande mmọ nte erọn̄ eke mînyeneke andikpeme.+
37 Ekem enye ọdọhọ mme mbet esie ete: “Ke akpanikọ, idọk okpon, edi mme anamutom iwakke.+
38 Mmọdo, ẹben̄e Enyene-idọk ẹte enye osio mme anamutom ọnọ ẹdi ke idọk esie.”+
