Numbers 35;1-34
35 Ndien Jehovah ọdọhọ Moses ke unaisọn̄ desat ke Moab ke mben Jordan+ ke Jericho ete:
2 “Dọhọ nditọ Israel ete ẹsio mme obio+ ke udeme mmọ ẹnọ nditọ Levi ndidụn̄, ẹnyụn̄ ẹnọ nditọ Levi in̄wan̄ mbiet ufene oro ẹdude ẹkanade mme obio oro.+
3 Ndien mme obio oro ẹyedi ebietidụn̄ mmọ, ke adan̄aemi mme in̄wan̄ mbiet mmọ ẹdidide eke ufene mmọ ye inyene mmọ ye kpukpru unam ikọt mmọ.
4 Ndien mme in̄wan̄ mbiet ufene obio oro, emi mbufo ẹdinọde nditọ Levi, ẹditọn̄ọ ke ibibene obio ẹniọn̄ ke cubit tọsịn kiet ẹkan ẹkụk.
5 Ndien ke edem obio, mbufo ẹnyene ndidomo cubit tọsịn iba ke edem usiahautịn ye cubit tọsịn iba ke edem usụk ye cubit tọsịn iba ke edem usoputịn ye cubit tọsịn iba ke edem edere, ye obio ke ufọt. Emi edidi in̄wan̄ mbiet ufene obio mmọ.
6 “Mme obio emi mbufo ẹdinọde nditọ Levi ẹdi emi: obio ubọhọ+ itiokiet, emi mbufo ẹdinọde man owotowo ekpefehe aka do,+ ẹnyụn̄ ẹnọ obio aba ye iba ẹdian do.
7 Kpukpru obio emi mbufo ẹdinọde nditọ Levi ẹdidi obio aba ye itiaita, mmọ ye in̄wan̄ mbiet ufene mmọ.+
8 Mme obio oro mbufo ẹdinọde ẹdito ke udeme nditọ Israel.+ Mbufo ẹyebọ mmọ emi ẹwakde ediwak, ẹnyụn̄ ẹbọ mmọ emi mîwakke esisịt.+ Esien kiet kiet edisio ke mme obio esie, nte ekemde ye udeme emi enye edidade, ọnọ nditọ Levi.”
9 Jehovah onyụn̄ ọdọhọ Moses ete:
10 “Dọhọ nditọ Israel ete, ‘Mbufo ẹmọn̄ ẹbe Jordan ẹdụk isọn̄ Canaan.+
11 Ndien mbufo ẹnyene ndimek mme obio emi ẹmemde utom ndisịm. Mmọ ẹdidi mme obio ubọhọ ẹnọ mbufo, ndien owo emi owotde ukpọn̄ ke ndudue+ enyene ndifehe n̄ka do.
12 Ndien mme obio oro ẹyedi mme obio ubọhọ ẹnọ mbufo ndifehe mbọhọ osio-usiene iyịp,+ mbak owotowo edikpa ke ini enye mîdaha ke ikpe ke iso esop.+
13 Ndien mme obio oro mbufo ẹdinọde, kpa obio ubọhọ itiokiet, ẹyedu ẹnọ mbufo.
14 Mbufo ẹyenọ obio ita ke edem Jordan emi,+ ẹnyụn̄ ẹnọ obio ita ke isọn̄ Canaan.+ Mmọ ẹdidi mme obio ubọhọ.
15 Mme obio itiokiet emi ẹdidi obio ubọhọ ẹnọ nditọ Israel ye esenowo+ ye odudụn̄ ke otu mmọ, man owo ekededi emi owotde ukpọn̄ ke ndudue ekpefehe aka do.+
16 “‘Ndien edieke owo adade ukwak eyịbi owo owot, enye edi owotowo.+ Yak ẹkûtre ndiwot owotowo oro.+
17 Edieke onyụn̄ edide ekpri itiat emi ekemede ndiwot owo ke enye akada ọtọ owo owot, enye edi owotowo. Yak ẹkûtre ndiwot owotowo oro.
18 Ndien edieke edide ekpri eto emi ekemede ndiwot owo ke enye akada eyịbi owo owot, enye edi owotowo. Yak ẹkûtre ndiwot owotowo oro.
19 “‘Osio-usiene+ iyịp ediwot owotowo oro. Enye oyowot enye ke ini esịmde enye.
20 Edieke enye okonụkde enye ọtọ ke esịt usua+ m̀mê ekedịbede ebet+ man otop n̄kpọ ọtọ enye owot,
21 mîdịghe adade ubọk eyịbi enye ke esịt usua man enye akpa, yak ẹkûtre ndiwot andiyịbi owo oro n̄wot. Enye edi owotowo. Osio-usiene iyịp oyowot owotowo oro ke ini esịmde enye.+
22 “‘Edi edieke ekedide ke ndudue mînyụn̄ idịghe ke esịt usua ke enye okonụk enye onyụn̄ otop n̄kpọ ọtọ enye ke ini mîdịbeke-dịbe ibet enye,+
23 mîdịghe okotopde itiat emi ekemede ndiwot owo ke ini mîkekwe enye m̀mê anamde itiat ọtọ enye owot ke ini mîkasuaha enye mîkonyụn̄ iyomke ndinam enye idiọk,
24 mbon esop ẹnyene ndikpe ikpe ke ufọt andiyịbi owo n̄wot ye osio-usiene iyịp nte ekemde ye ewụhọ emi.+
25 Ndien mbon esop+ ẹnyene ndinyan̄a owotowo oro nsio ke ubọk osio-usiene iyịp, ofụri esop ẹnyụn̄ ẹnyene ndinam enye afiak ọnyọn̄ obio ubọhọ emi enye ekefehede aka, enye onyụn̄ enyene ndidụn̄ do tutu akwa oku emi ẹkeyetde edisana aran akpa.+
26 “‘Edi edieke owotowo edede-dei ọwọrọ ebe adan̄a obio ubọhọ emi enye ekefehede aka,
27 ndien osio-usiene iyịp okụt enye ke edem adan̄a obio ubọhọ esie, osio-usiene+ iyịp onyụn̄ owotde owotowo oro, enye inyeneke ubiomikpe iyịp.
28 Koro enye ekpenyene ndidụn̄ ke obio ubọhọ esie tutu akwa oku akpa,+ ndien ke akwa oku ama akakpa, owotowo oro ekeme ndinyọn̄ n̄ka isọn̄ udeme esie.
29 Ndien emi edidi ewụhọ ikpe ọnọ mbufo ke ofụri emana mbufo ke kpukpru ebiet emi mbufo ẹdụn̄de.
30 “‘Owo ekededi eke eyịbide ukpọn̄ owot enyene ndikpa nte owotowo+ ke inua mme ntiense,+ owo kiet inyụn̄ ikemeke nditie ntiense mban̄a owo ete ẹwot enye.
31 Mbufo inyụn̄ inyeneke ndibọ owotowo eke odotde n̄kpa baba n̄kpọ kiet ke ufak ibuot esie,+ koro ẹnyene ndiwot enye.+
32 Mbufo ẹkûnyụn̄ ẹbọ owo emi efehede aka obio ubọhọ esie n̄kpọ ke ufak, ndinam enye afiak okodụn̄ ke isọn̄ esie mbemiso akwa oku akpade.
33 “‘Mbufo ẹkûbiat isọn̄ emi mbufo ẹdụn̄de ke esịt; koro edi iyịp anam isọn̄ edehe,+ ndien owo idikemeke ndisio isop nnọ isọn̄ mban̄a iyịp emi ẹduọkde ke esịt ke mîbọhọke iyịp owotowo oro.+
34 Mbufo ẹkûnyụn̄ ẹsabade isọn̄ emi mbufo ẹdụn̄de ke esịt, emi ami ndụn̄de ke otu mbufo; koro ami Jehovah ndụn̄de ke otu nditọ Israel.’”+
