Utom 5;1-42
5 Nte ededi, owo kiet emi ekerede Ananias, adiana ye Sapphira n̄wan esie, anyam inyene esie
2 onyụn̄ omụm ubak okụk enịm ke ndịbe, n̄wan esie ọfiọk aban̄a emi n̄ko, ndien enye ada sụk ubak edi edinịm mme apostle ke ukot.+
3 Edi Peter ọdọhọ ete: “Ananias, ntak emi Satan+ anamde fi enyene uko ndisu nsu+ nnọ edisana spirit+ onyụn̄ omụm ubak okụk in̄wan̄ enịm ke ndịbe?
4 Adan̄a nte enye okodude ye afo nte enye ikedịghe okwo, ndien ke ama akanyam enye nte enye ikosụk idụhe fi ke ubọk? Ntak emi akaduakde utọ edinam emi ke esịt fo? Usụhu nsu+ unọ owo, osu ọnọ Abasi.”+
5 Ke ini Ananias okopde ikọ emi enye ọduọ ke isọn̄ akpa.+ Ndien akwa ndịk+ omụm kpukpru mmọ eke ẹkopde n̄kpọ emi.
6 Edi n̄kparawa ẹdaha ke enyọn̄, ẹda ọfọn̄ ẹwan̄ enye,+ ẹnyụn̄ ẹmen enye ẹwọrọ ẹkebụk.
7 Ekem ke n̄kpọ nte hour ita ẹbede, n̄wan esie odụk edi, ifiọkke se iketịbede.
8 Peter ọdọhọ enye ete: “Sian mi, nte mbufo mbiba ẹkenyam in̄wan̄ ẹbọ adan̄a ibat okụk ntem?” Enye ọbọrọ ete: “Ih, ikọbọ adan̄a ibat okụk oro.”
9 Ntre Peter ọdọhọ enye ete: “Ntak emi mbufo mbiba ẹkenyịmede ndidomo+ spirit Jehovah nse? Sese! Ikpat mmọ emi ẹkebụkde uberi ẹdu ke enyịnusụn̄, ndien mmọ ẹyemen fi ẹwọrọ.”
10 Kpa idaha oro enye ọduọ enye ke ukot akpa.+ Ke ini n̄kparawa oro ẹdụkde ẹdi, mmọ ẹkụt ke enye akpa, ndien mmọ ẹmen enye ẹwọrọ ẹkebụk ẹkpere ebe esie.
11 Mmọdo akwa ndịk omụm ofụri esop onyụn̄ omụm kpukpru mmọ eke ẹkopde ẹban̄a mme n̄kpọ emi.
12 Akan oro, mme apostle ẹka iso ndinam ediwak idiọn̄ọ ye mme utịben̄kpọ ke otu mbio obio;+ ndien kpukpru mmọ ẹdu ye esịt kiet ke etehe Solomon.+
13 Ke akpanikọ, baba owo kiet ke otu mmọ eken idehedei idian idem ye mmọ;+ edi, mbio obio ẹtoro mmọ.+
14 Akan oro, ẹdọdiọn̄ ẹda mme andinịm Ọbọn̄ ke akpanikọ ẹdidian, akwa udịmowo emi ẹsịnede iren ye iban;+
15 tutu mmọ ẹmen mbon udọn̄ọ ẹwọn̄ọ ẹdi ikpọ efak ẹnyụn̄ ẹdinịm mmọ do ke n̄kpri bed ye n̄kpana, man, nte Peter asan̄ade ebe, ke nsụhọde n̄kaha mbukpọn̄ esie ọkpọduọ ndusụk mmọ ke idem.+
16 N̄ko, akwa udịmowo emi ẹtode mme obio emi ẹkande Jerusalem ẹkụk ẹdọdiọn̄ ẹwọn̄ọ ẹdisop idem ọtọkiet, ẹda mbon udọn̄ọ ẹdi ye mbon emi ndedehe spirit ẹfịnade, ndien ẹnam udọn̄ọ okụre kpukpru mmọ.
17 Edi akwa oku ye kpukpru mmọ emi ẹdude ye enye, kpa n̄ka mme Sadducee emi ẹkedude ini oro, ẹdaha ke enyọn̄, ufụp+ onyụn̄ ọyọhọ mmọ esịt,
18 ndien mmọ ẹmụm mme apostle ẹnyụn̄ ẹsịn mmọ ke ufọk-n̄kpọkọbi.+
19 Edi ke okoneyo angel+ Jehovah eberede usụn̄ ufọk-n̄kpọkọbi+ oro, osion̄o mmọ onyụn̄ ọdọhọ ete:
20 “Ẹwọn̄ọ ẹnyọn̄ọ, ẹkedụk temple, ẹnyụn̄ ẹdọdiọn̄ ẹtịn̄ kpukpru ikọ emi ẹban̄ade uwem+ emi ẹnọ mbio obio.”
21 Ke ẹma ẹkekop emi, mmọ ẹdụk temple ke usiere ẹnyụn̄ ẹtọn̄ọ ndikpep mme owo n̄kpọ.
Edi ke ini akwa oku ye mmọ emi ẹdude ye enye ẹdide ẹdisịm, mmọ ẹkot Sanhedrin ye kpukpru n̄ka mbiowo nditọ Israel+ ẹbon ọtọkiet, ndien mmọ ẹdọn̄ ẹka ufọk-n̄kpọkọbi ẹkeda mmọ oro ẹdi.
22 Edi ke ini mme isụn̄utom ẹsịmde do mmọ ikwe mmọ ke ufọk-n̄kpọkọbi. Ntre mmọ ẹfiak ẹdi ẹdibụk se itịbede,
23 ẹte: “Nnyịn ima ikụt ke ẹkọbi ufọk-n̄kpọkọbi, mbon ukpeme ẹnyụn̄ ẹda ke enyịnusụn̄, edi ke ini ibererede nnyịn ikwe baba owo kiet ke esịt.”
24 Edi, ke ini etubom temple ye mbọn̄ oku ẹkopde ikọ emi, esịt etịmede mmọ aban̄a se mme n̄kpọ emi ẹwọrọde.+
25 Edi owo kiet edi editịn̄ ọnọ mmọ ete: “Sese! Mme owo emi mbufo ẹkedọn̄de ke ufọk-n̄kpọkọbi mmọdo ke temple, ke ẹda ẹkpep mme owo n̄kpọ.”+
26 Ekem etubom oro ye mme asan̄autom esie ẹka ẹkeda mmọ ẹdi, edi idịghe ke afai, sia mmọ ẹfehede ndịk+ mbak mme owo ẹditọn̄ọ mmọ ke itiat.
27 Ntre mmọ ẹda mmọ oro ẹdi ẹnyụn̄ ẹdinam mmọ ẹda ke ufọkesop Sanhedrin. Ndien akwa oku obụp mmọ mbụme
28 onyụn̄ ọdọhọ ete: “Nnyịn ima isọn̄ọ iwụk+ mbufo ite ẹkûka iso ẹkpep aba n̄kpọ ke enyịn̄ emi, ndien, sese! mbufo ẹmeda ukpepn̄kpọ mbufo ẹyọhọ Jerusalem,+ mbufo ẹmenyụn̄ ẹbiere ndinam iyịp+ owo emi ọkọbọ nnyịn.”
29 Peter ye mme apostle eken ẹbọrọ ẹte: “Nnyịn inyene ndikop uyo Abasi nte andikara utu ke uyo owo.+
30 Abasi mme ete ete nnyịn akanam Jesus, emi mbufo ẹkekọn̄de ke eto ẹwot,+ eset ke n̄kpa.+
31 Abasi ama emenede enye ke enyọn̄ nte Akpan Isụn̄utom+ ye Andinyan̄a+ enịm ke ubọk nnasia esie,+ man anam Israel ẹkabade esịt+ onyụn̄ anam ẹfen mme idiọkn̄kpọ mmọ.+
32 Ndien nnyịn idi mme ntiense n̄kpọ emi,+ edisana spirit,+ emi Abasi ọkọnọde mbon oro ẹkopde uyo esie nte andikara, onyụn̄ etiene edi n̄ko.”
33 Ke ini mmọ ẹkopde emi, esịt enen̄ede ayat mmọ, mmọ ẹnyụn̄ ẹyom ndiwot mmọ.+
34 Edi owo kiet adaha ke enyọn̄ ke Sanhedrin, owo Pharisee emi ekerede Gamaliel,+ Ekpep-Ibet emi kpukpru owo ẹkponode, onyụn̄ ọnọ uyo ete ẹnam mbon emi ẹwọn̄ọ an̄wa ke esisịt ini.+
35 Ndien enye ọdọhọ mmọ ete: “Mbon Israel,+ ẹkpeme idem mbufo ke se mbufo ẹyomde ndinam ye mmọ emi.
36 Ke uwụtn̄kpọ, ini kiet ko Theudas ama adaha ada, ọdọhọ ke imọ idi n̄kpọ,+ ndien ediwak owo, n̄kpọ nte owo ikie inan̄, ẹma ẹdiana ye enye.+ Edi ẹma ẹwot enye, ndien kpukpru mbon emi ẹkekopde uyo esie ẹma ẹsuana inyụn̄ idụhe aba.
37 Ke enye ama ekebe efep, Judas eyen Galilee ama adaha ada ke mme usen usịnenyịn̄,+ onyụn̄ odụri mme owo adian idem. Edi owo emi ama atak, ndien kpukpru mbon oro ẹkekopde uyo esie ẹma ẹsuana.
38 Ntem, ke utọ idaha emi, ndọhọ mbufo nte, Ẹkûbiọn̄ọ mbon emi, edi ẹsana mmọ ẹyak; (koro edieke ukpepn̄kpọ emi m̀mê utom emi otode owo, enye oyowụre;+
39 edi edieke otode Abasi,+ mbufo idikemeke ndiwụri mmọ;)+ mîdịghe ntre, mbufo ẹmekeme ndidikụt ke ikam in̄wana ye Abasi.”+
40 Ndien mmọ ẹkop uyo esie, mmọ ẹnyụn̄ ẹkot mme apostle ẹdi, ẹmia mmọ,+ ẹnyụn̄ ẹwụk mmọ ẹte ẹtre nditịn̄ ikọ ke enyịn̄ Jesus,+ ndien ẹyak mmọ ẹnyọn̄ọ.
41 Ke ntre, mmọ emi ẹwọn̄ọ ke iso Sanhedrin, ẹdara+ koro ẹbatde ẹte mmọ ẹdot ndibọ esuene ke ntak enyịn̄ esie.+
42 Ndien kpukpru usen ke temple ye ke ufọk ke ufọk+ mmọ ẹka iso ye unana edikpa mba ndikpep+ nnyụn̄ ntan̄a eti mbụk aban̄ade Christ, Jesus.+
