Zechariah 5;1-11
5 Ekem mfiak mmenede enyịn; ndien, sese! n̄kụt ikpan̄wed emi efede.+
2 Ndien enye obụp mi ete: “Nso ke afo okụt?”+
Ndien mbọrọ nte: “N̄kụt ikpan̄wed emi efede, emi uniọn̄ esie edide cubit edịp, ubom esie onyụn̄ edide cubit duop.”
3 Ndien enye ọdọhọ mi ete: “Emi edi isụn̄i emi ọwọrọde aka iso ofụri isọn̄,+ koro kpukpru owo eke ẹyịpde inọ,+ emi ẹsụn̄ide ke n̄kan̄ emi, ẹbọhọ ufen; kpukpru owo eke ẹnyụn̄ ẹn̄wọn̄ọde un̄wọn̄ọ,+ emi ẹsụn̄ide ke n̄kan̄ eken,+ ẹbọhọ ufen.
4 ‘Mmanam enye ọwọrọ aka,’ uyo Jehovah mme udịm edi emi, ‘ndien enye oyodụk ufọk inọ ye ufọk owo oro ọn̄wọn̄ọde un̄wọn̄ọ ke nsu ke enyịn̄ mi;+ ndien enye oyodụn̄ ke esịtufọk esie onyụn̄ osobo enye ye mme eto esie ye mme itiat esie.’”+
5 Ekem angel emi ekenemede nneme ye ami ọwọrọ edi edidọhọ mi ete: “Mbọk, menede enyịn fo se m̀mê n̄kpọ emi ọwọrọde aka ko edi nso.”
6 Ndien mbụp nte: “Nso ke enye edi?”
Ndien enye ọbọrọ ete: “Emi edi ephah udomon̄kpọ oro ọwọrọde aka.” Ndien enye ọdọhọ ete: “Nte mmọ ẹtiede edi emi ke ofụri isọn̄.”
7 Ndien, sese! ẹkụbọde ekara ekara okukịp n̄ket; ndien se n̄wan kiet etiede do ke esịt ephah oro.
8 Ntre enye ọdọhọ ete: “Emi edi Idiọkido.” Ndien onụk enye esịn ke esịt ephah+ oro, ndien ekem ada n̄ket eke odobide ekịbi ke inua esie.
9 Ekem mmenede enyịn n̄kụt, ndien sese iban iba ke ẹdi, ofụm onyụn̄ odu ke mba mmọ. Mmọ ẹnyụn̄ ẹnyene mba eke ẹbietde mba inuen inyan̄. Ndien mmọ ẹmenede ephah oro sụn̄sụn̄ ẹdọk ẹkpọn̄ isọn̄ ẹsịm ufụmenyọn̄.
10 Ndien ami mbụp angel oro ekenemede nneme ye ami nte: “Mmọ ẹda ephah emi ẹka m̀mọ̀n̄?”
11 Ndien enye ọbọrọ mi ete: “Ẹda ẹka ndibọp+ ufọk nnọ n̄wan oro ke isọn̄ Shinar;+ ndien ẹyesọn̄ọ ẹwụk ufọk oro, ẹyenyụn̄ ẹnịm n̄wan oro do ke nnennen itie esie.”
