Esop Edidiana Mme Idụt ẹdọhọ mme owo ke ofụri ererimbot ẹdiana kiet, ẹkpono unen emi owo enyenede, ẹnyụn̄ ẹtre ndibiat isọn̄, ofụm, ye mmọn̄. Ntak emi mmọ ẹdọhọde ntre? Maher Nasser ekewet ke n̄wed oro ẹkotde UN Chronicle ete ke ubiatibet, utụk, utọk, ọkpọsọn̄ edịm, ọkpọsọn̄ ufiop, mfịna emi anamde ediwak owo ẹfehe ẹkpọn̄ ufọk, ndiọi owo ndiwot mme owo ọkwọkudịm, ye ndiọi udọn̄ọ emi ẹkemede ndibe owo, ye mme mfịna ntre, idịghe n̄kpọ obio kiet.

Ndusụk owo ẹdọhọ ke akpana ukara kiet kpọt akara ofụri ererimbot. Ke uwụtn̄kpọ, Dante, (1265-1321) eyen Italy emi ekedide ataifiọk, ewet uto, ye akwa owo ukara, ọkọdọhọ ke se idikọkde mfịna ererimbot emi edi oro. Ataifiọk emi ekekerede Albert Einstein (1879-1955) okonyụn̄ esịn ke uyo oro. Dante ọkọdọhọ ke emem ikemeke ndidu mbịghi ke ererimbot emi edieke idụt kiet kiet ẹkarade idemmọ. Enye ama etịn̄ se Jesus Christ eketịn̄de ete ke “obio ubọn̄ eke abaharede ada an̄wana ye idemesie odụk ke nsobo.”—Luke 11:17.

Ke ọyọhọ ekọn̄ ererimbot iba ama okokụre, emi ẹketopde bọmb atọm iba, Albert Einstein ama ewet leta ọnọ Esop Edidiana Mme Idụt ete ke ana mmọ ẹsọsọp ẹnam se ededi oro anade ẹnam man ẹnyene ukara kiet kpọt ke ofụri ererimbot.

Edi idinam didie idiọn̄ọ m̀mê mbon oro ẹdikarade ofụri ererimbot ẹyekeme ndikara ọfọn, idiaha inọ, inyụn̄ ifịkke mme owo? Mîdịghe ndi mmọ ẹyediọk nte mme andikara eken? Mme mbụme emi anam iti se Lord Acton, eyen Britain emi ekedide ewetn̄wed, eketịn̄de. Enye ọkọdọhọ ke odudu esibabiat owo, ke ẹma ẹnọ owo odudu ẹkaha, ke oro esibiat owo ofụri ofụri.

Se idude edi ke edieke ẹyomde emem ye ifụre odu ke ererimbot emi, ana mme owo ẹdiana kiet. Edi, mme owo ẹdinam didie idiana kiet? Ndi emi ekeme nditịbe? Bible ọdọhọ ke eyetịbe. Edi edinam didie itịbe? Idịghe mme andikara ererimbot emi ẹsidiade inọ ẹdinam mme owo ẹdiana kiet. Utu ke oro, ukara Abasi edinam. Jehovah enyene unen ndikara ofụri se enye okobotde. Bible okot ukara emi “obio ubọn̄ Abasi.”—Luke 4:43.

Obio Ubọn̄ Abasi ke Jesus Christ eketịn̄ aban̄a ke ini enye ọkọdọhọde ke Akam Ọbọn̄ ete: “Yak obio ubọn̄ fo edi. Yak uduak fo ada itie . . . ke isọn̄.” (Matthew 6:9, 10) Ke Obio Ubọn̄ Abasi, uduak Abasi ke ẹdinam ke isọn̄, idịghe uduak mbon oro ẹkerede ẹban̄a idemmọ kpọt ẹnyụn̄ ẹyomde ndika iso n̄kara.

Ẹkot Obio Ubọn̄ Abasi n̄ko “obio ubọn̄ heaven.” (Matthew 5:3) Ntak-a? Sia enye edidu ke heaven ikara ofụri isọn̄. Oro ọwọrọ ke ukara emi idiyomke mme owo ẹkpe tax man ẹnyene okụk ẹda ẹnam n̄kpọ. Kere nte uwem edinemde ke Obio Ubọn̄ Abasi!

Sia ẹkotde enye “obio ubọn̄,” ọwọrọ edidem oyodu. Jesus Christ edi Edidem oro, ndien Abasi ọnọ enye odudu. Kop se Bible etịn̄de mi aban̄a Jesus:

• “Ubọn̄ oyodoro enye ke afara . . . N̄kọri ke ubọn̄ [esie] ye emem idinyeneke utịt.”—Isaiah 9:6, 7.

• “Ẹnọ enye ukara ye itie ukpono ye obio ubọn̄, ẹte kpukpru owo ye mme idụt ye usem  ẹnam n̄kpọ ẹnọ enye. Ukara esie edi nsinsi ukara emi mîdibehe ifep.”—Daniel 7:14.

• “Obio ubọn̄ ererimbot emi amakabade edi obio ubọn̄ Ọbọn̄ nnyịn [Abasi] ye eke Christ esie.”—Ediyarade 11:15.

Nte Jesus eketịn̄de ke Akam Ọbọn̄, Obio Ubọn̄ Abasi ayanam ẹnam uduak Abasi ke isọn̄. Ini oro, mme owo ẹyefiọk nditịm nse mban̄a isọn̄, ndien isọn̄ ayafiak ọfọn nte Abasi okoyomde. Ndien mme owo idisoboke unam nte ẹsobode idahaemi, utu ke oro, kpukpru orụk unam ẹyedu.

Obio Ubọn̄ Abasi eyekpep mme owo nte ẹkpedude uwem. Ẹdikpep kpukpru owo ukem n̄kpọ. Ubahade ididụhe. Isaiah 11:9 ọdọhọ ete: “Mmọ idinamke ibak, idinyụn̄ ibiatke n̄kpọ . . . koro ifiọk Jehovah ọyọyọhọ isọn̄ kpa nte mmọn̄ ofụkde inyan̄.”

Mme owo ke ofụri ererimbot ẹyediana kiet ẹnyụn̄ ẹdu ke emem. Se Esop Edidiana Mme Idụt ẹyomde edi oro, edi ikemeke ndinam. Psalm 37:11 ọdọhọ ke ‘ediwak emem ayadat mme owo esịt.’ Ini oro, nnyịn idikopke aba utọ ikọ nte “ubiatibet,” “ubuene,” “ekọn̄,” ye “ndibiat isọn̄, ofụm, ye mmọn̄.” Edi ini ewe ke emi editịbe? Ini ewe ke Obio Ubọn̄ Abasi editọn̄ọ ndikara ofụri isọn̄? Didie ke enye edikara? Ndien nso ke akpanam man etiene odu ini oro? Kot ibuotikọ oro etienede man okụt.