Ntak Emi Isibọde Ufen, Isọn̄de, Inyụn̄ Ikpade?
Abasi ada nnyịn nte nditọ esie, ntre enye iyomke nnyịn ibọ ufen. Edi, ufen okpon etieti ke ererimbot emi. Ntak edide ntre?
Adam ye Eve Ẹnam Nnyịn Ibọ Ufen
“Idiọkn̄kpọ [okoto] owo kiet odụk ererimbot, n̄kpa onyụn̄ [oto] ke idiọkn̄kpọ oro odụk, ndien n̄kpa atara esịm kpukpru owo.”—ROME 5:12.
Ini Abasi okobotde akpa ete ye eka nnyịn—Adam ye Eve—mmọ ẹma ẹfọn ẹma, inyeneke ndo ndomokiet. Itie oro enye ọkọnọde mmọ ẹdụn̄ ekedi Paradise; ẹkekot enye In̄wan̄ Eden. Enye ama ọdọhọ ke mmọ ẹkeme ndidia mfri eto ekededi ke in̄wan̄ oro, edi enyene kiet emi enye ọkọdọhọde mmọ ẹkûdia. Adam ye Eve ẹma ẹkokoi ẹdia mfri eto oro; idiọkn̄kpọ ekedi oro. (Genesis 2:15-17; 3:1-19) Ke mmọ ẹma ẹkenam idiọkn̄kpọ, Abasi ama ebịn mmọ osio ke in̄wan̄ oro, ndien uwem ama ọtọn̄ọ ndisọn̄ ye mmọ. Nte ini akakade, mmọ ẹma ẹnyene nditọ, ndien uwem ama onyụn̄ ọsọn̄ ye nditọ mmọ n̄ko. Mmọ ẹma ẹsọn̄ ẹnyụn̄ ẹkpan̄a. (Genesis 3:23; 5:5) Se isinamde idọn̄ọ, isọn̄, inyụn̄ ikpa edi ke kpukpru nnyịn idi nditọ Adam.
Satan ye Mme Demon Ẹtiene Ẹnam Nnyịn Ibọ Ufen
“Ofụri ererimbot esịne ke idak odudu andidiọk.”—1 JOHN 5:19.
Satan edi “andidiọk” oro. Enye edi idiọk angel oro ọkọsọn̄de ibuot ye Abasi. (John 8:44; Ediyarade 12:9) Nte ini akakade, mme angel en̄wen ẹma ẹtiene Satan ẹsọn̄ ibuot ye Abasi. Mmọ ke ẹkot mme demon. Mmọ ẹsida odudu mmọ ẹbian̄a mme owo ẹnyụn̄ ẹnam mmọ ẹkûkop uyo Abasi. Mmọ ẹsidomo ndinam mme owo ẹnam ndiọi n̄kpọ. (Psalm 106:35-38; 1 Timothy 4:1) Esinenem Satan ye mme demon ndinam mme owo ẹbọ ufen.
Se Nnyịn Inamde Esitiene Anam Ibọ Ufen Ndusụk Ini
“Se ededi eke owo ọtọde, oro ke enye edinyụn̄ ọdọk.”—GALATIA 6:7.
Ediwak ufen emi ibọde oto ntak emi ikadade-da idiọkn̄kpọ imana ye ntak emi edide Satan akara ererimbot emi. Edi ndusụk ini, mme owo ẹsidi mfịna idemmọ. Didie? Ke ini mmọ ẹnamde idiọkn̄kpọ m̀mê ẹbierede n̄kpọ emi mîfọnke, mmọ ẹsidọk se mmọ ẹtọde. Edi ke ini mme owo ẹnamde nti n̄kpọ, mmọ ẹsidia ufọn. Ke uwụtn̄kpọ, edieke owo edide owo akpanikọ, esisịnde idem anam utom, onyụn̄ amade n̄wan ye nditọ esie, enye eyenen̄ede adia ufọn, ubon esie ẹyenyụn̄ ẹkop inemesịt. Edi edieke owo esibrede mbre mfọniso, esin̄wọn̄de mmịn akaha, onyụn̄ edide ifu, emi ekeme ndinam n̄kpọ ọsọn̄ ye ubon esie. Abasi oyom n̄kpọ ọfọn nnyịn. Ntre ima ikop uyo esie, iyenen̄ede idia ufọn. Ufọn kiet edi ke iyenyene emem.—Psalm 119:165.
Nnyịn Idu ke “Mme Akpatre Usen”
“Ke mme akpatre usen . . . , mme owo ẹyedi mme ama idem, mme ama okụk, . . . ẹsọn̄ ibuot ye ete ye eka, . . . ẹnana mfara ke idem, ẹtie obom obom, imaha eti ido.”—2 TIMOTHY 3:1-5.
Ediwak owo mfịn ẹdu uwem nte itien̄wed emi etịn̄de. Nte mmọ ẹdude uwem etiene owụt ke nnyịn idu ke “mme akpatre usen” idiọk ererimbot emi. Bible ama etịn̄ n̄ko ke ekọn̄, akan̄, ikpọ unyekisọn̄, ye ndiọi udọn̄ọ ẹyedu ke eyo nnyịn emi. (Matthew 24:3, 7, 8; Luke 21:10, 11) Mme n̄kpọ emi anam mme owo ẹnen̄ede ẹbọ ufen ẹnyụn̄ ẹkpan̄a.
