N̄KỌP emi enyenede n̄kam esisọn̄ọ eyịre ke akamba itiat, eto, m̀mê idem nsụn̄ikan̄. Edi mmọ itiehe nte mme n̄kọp eken emi ẹsidianade-diana ke n̄kpọ; mmọ ẹsida n̄kam mmọ ẹmụm n̄kpọ ẹkama. Emi esinam mmọ ẹkeme ndiwọn̄ọde idem nnyụn̄ ndia udia. Edi utọ n̄kpri n̄kam emi ẹsinam didie ẹkeme ndinam n̄kọp emi ọsọn̄ọ eyịre ke n̄kpọ tutu mbufụt mmọn̄ ikemeke ndidian̄ade enye?

Kere ise: N̄kam n̄kọp emi ọsọsọn̄ ke n̄kan̄ kiet, edi ememem ke n̄kan̄ eken. Ntaifiọk ẹdọhọ ke n̄kan̄ emi ọsọn̄de enen̄ede okpon akan n̄kan̄ emi ememde, ntak edi oro enye esikemede ndisọn̄ọ nyịre ke n̄kpọ. Emi n̄ko isiyakke mbufụt mmọn̄ ekeme ndidian̄ade n̄kọp emi ke n̄kpọ oro enye eyịrede sia mbufụt mmọn̄ esidi otop enye aka iso otop afiak edem.

Prọfesọ Guy Genin ọdọhọ ke se ẹkụtde ke ndụn̄ọde emi ẹkenamde ẹban̄a n̄kam n̄kọp emi akpa owo idem tutu. Enye ọdọhọ ke nte n̄kam n̄kọp emi ọsọn̄de ke n̄kan̄ kiet onyụn̄ ememde ke n̄kan̄ eken edi n̄kpọ emi ayan̄ade owo ifiọk. Ntaifiọk ẹdọhọ ke ndidụn̄ọde nte n̄kam n̄kọp emi etiede ekeme ndin̄wam mmimọ idiọn̄ọ nte ikpọbọpde n̄kpọ idian ke ufọk ye ke nsụn̄ikan̄ isọn̄ mmọn̄, ifiọk nte ikpanamde esịp adiana ye ọkpọ ke ini owo enyenede mfịna ke ọkpọ, ye nte ikpesịride nde unan oro ẹkesiakde owo idem. Herbert Waite emi edide ataifiọk ke Ufọkn̄wed Ntaifiọk California ke Santa Barbara ke U.S.A. ọdọhọ ke n̄kpọ-obot ekeme ndikpep nnyịn ata ediwak n̄kpọ mban̄a nte ẹkpediande n̄kpọ.

Afo ekere didie? Ndi n̄kọp emi enyenede utọ n̄kam emi okofoforo? Mîdịghe ndi ẹkebobot enye?