UTỊT UTỊT November 1932 edi emi. Ukara ẹma ẹsịn traffic light urua oko ke Mexico City emi se ibede owo miliọn kiet ẹdụn̄de. Ama enem mme owo tutu sia akanam utọ n̄kpọ oro idụhe ke obio oro. Edi ẹtise, mme ọkọmbụk n̄kpọntịbe itịn̄ke-tịn̄ iban̄a utọ n̄kpọ oro aba. Mmọ ẹditịn̄ ẹban̄a edinam emi ẹdinamde urua oro. Mmọ ẹdu ke itiembehe tren ẹbet akpan esenowo kiet, oro edi Joseph F. Rutherford, emi ekedide etieibuot Watch Tower Society ini oro. Mme Ntiense Jehovah n̄ko ke obio oro ẹtiene ẹdu do man ẹdara Brọda Rutherford emi edide ndidụk mbono usen ita.

The Golden Age ama ọdọhọ ke “owo idisọpke ifre ke mbono oro ama an̄wam ẹnen̄ede ẹnam mme owo ẹfiọk Akpanikọ ke Mexico.” Nso ikanam mbono emi owo 150 kpọt ẹkedụkde ọwọrọ etop ntre?

Mbemiso ẹkenịmde mbono oro, ukwọrọikọ ikomụmke isọn̄ ke Mexico. Ẹma ẹsinịm n̄kpri mbono toto ke 1919, edi mme esop ikawakke aba ke mme isua oro ẹketienede. Ke ini ikenyenede ọfis ke Mexico City ke 1929, eketie nte n̄kpọ ọmọn̄ okpụhọde. Edi ndusụk mfịna ama odu. Ke ini ẹkedọhọde ẹkûsuda ini ukwọrọikọ unam mbubehe, asiakusụn̄ kiet ama ayat esịt ọwọrọ akasiak ufọkabasi. Esenyịn n̄kọk itieutom ama anam idiọkn̄kpọ, ntre akana ẹmek owo en̄wen. Akpana an̄wan̄a fi ke ama oyom ẹn̄wam Mme Ntiense oro ẹkemade Jehovah ke Mexico ẹka iso ẹnam n̄kpọ esie.

Brọda Rutherford ama edisọn̄ọ mmọ idem ata etieti. Enye ama ọnọ inem inem utịn̄ikọ iba ke mbono oro onyụn̄ ọkwọrọ ikọ ke ufọkutom radio ition. Akpa ini emi mme ufọkutom radio ke Mexico ẹkenamde mme owo ke idụt oro ẹkop eti mbụk ekedi oro. Ke mbono oro ama okokụre, ẹma ẹmek obufa esenyịn n̄kọk itieutom man etịm utom ukwọrọikọ. Ikọt Jehovah oro ẹkenyenede ifịk ẹma ẹka iso ẹkwọrọ ikọ, ndien Jehovah ama ọdiọn̄ mmọ.

Ke Brọda Rutherford ama ọkọnyọn̄ ke 1932, ẹma ẹnịm mbono iba ke idụt oro ke 1933, kiet ke Veracruz, kiet ke Mexico City. Jehovah ama ọdiọn̄ mmọ ke ndikesịn ifịk n̄kwọrọ ikọ. Mme Ntiense 82 ẹkedu do ke 1931. Edi ke ufan̄ isua duop, mmọ ẹma ẹwak utịm ikoduop ẹkan oro. N̄kpọ nte owo 1,000 ẹkedụk Mbono Ukara Abasi oro ẹkenịmde ke Mexico City ke 1941.

Ke 1943, Mme Ntiense Jehovah ẹma ẹwet n̄kpọ ke kad ẹkọn̄ọ ke iso ye edem ẹda ẹkot mme owo ẹdidụk “Mbono Ukara Abasi ‘Idụt Ifụre’ ” oro ẹkenịmde ke obio 12 ke Mexico. * Ikọt Jehovah  ẹma ẹsikọn̄ọ kad ntem ẹda ẹkot mme owo mbono mmọ toto ke 1936.

Ndikọn̄ọ kad nda n̄kot mme owo mbono ama ọfọn tutu magazine oro ẹkotde La Nación ọdọhọ ete: “Ke Mme Ntiense Jehovah ẹma ẹkedụk akpa usen mbono oro, ẹma ẹdọhọ mmọ ẹkot ediwak owo ẹtiene ẹdi. Ẹma ẹwak edem usen oro tutu itie ikemke owo.” N̄kpọ oro ama ayat mbon Catholic tutu mmọ ẹtọn̄ọ ndikọbọ Mme Ntiense Jehovah. Edi oro ikanamke nditọete nnyịn ẹtre ndisan̄a ke mme efak n̄kot mme owo mbono. Magazine oro ama ọdọhọ n̄ko ete: “Kpukpru obio ẹma ẹkụt mmọ . . . ẹma ẹkụt iren ye iban ẹkọn̄ọde kad ẹsan̄a tutu mmọ ẹditie nte signboard.” Magazine oro ama esịn ndise nditọete emi ẹkọn̄ọde kad ẹsan̄a ke mme efak ke Mexico City. Ẹkewet ke idak ndise oro ete: “Mmọ ẹyọyọhọ efak.”

Ikesimemke inọ ata ediwak ikọt nnyịn ndidụk mme mbono oro ẹkesinịmde ke Mexico. Ediwak owo ẹkesito mme obio in̄wan̄ ẹdi. Mmọ ikenyeneke usụn̄, tren ikonyụn̄ idụkke mme obio oro. Esop kiet ẹma ẹwet ẹte: “Tren ndomokiet isisịmke mi.” Mme owo ẹkesiwat ke enan̄-mbakara emi ẹkotde mule, mîdịghe ẹsasan̄a ediwak usen ẹkesịm itie emi mmọ ẹdidụkde tren ika itiembono oro.

Ata ediwak ikọt nnyịn ẹma ẹbuene tutu ọsọn̄ mmọ ndinyene okụk n̄kpe nsịm itiembono, owo itịn̄ke-tịn̄ ndikpe nnyọn̄. Ediwak owo ẹkedu ke ufọk nditọete nnyịn, ke ini mbon eken ẹdude ke mme Ufọkmbono Obio Ubọn̄. Enyene isan̄ kiet emi n̄kpọ nte owo 90 ẹkedude ke Bethel. “Ẹma ẹbon katọn n̄wed 20 ẹnọ owo mmọ kiet kiet ẹna.” N̄wedisua Ikọmbakara eke 1938 ama obụk ke nditọete ẹkedọhọ ke enem mmimọ ndina ke katọn akan ndina ke isọn̄ simen.

Ama esinem nditọete ke Mexico ndidu ye nditọete mmọ ke mbono tutu mmọ idọn̄ke enyịn ke kpukpru ufen emi mmọ ẹsibọde man ẹdụk mbono. Mme Ntiense Jehovah ẹkpere ndisịm miliọn kiet ke Mexico idahaemi. Osụk enenem mmọ ndisop idem ọtọkiet ye nditọete mmọ. * N̄kọk itieutom Mexico ẹma ẹwet ke 1949 ẹte: “Nsọn̄ọn̄kpọ ikpanke mmọ ndisịn idem ke n̄kpọ Abasi. Ke kpukpru mbono okụrede, nditọete ẹsiwak ndineme mban̄a mbono oro ke anyan ini ẹsinyụn̄ ẹbụp ẹte: ‘Ini ewe ke idifiak inyene mbono?’ ” Se mmọ ẹsinamde edi oro tutu emi.​—Oto itieutom ubon n̄kani n̄kpọ nnyịn ke Central America.