María, Raúl, Arne, ye ata ediwak mbon en̄wen ẹda akam nte ata eti enọ. Mmọ ẹdọhọ ke akam esinam mmimọ ikeme ndineme nneme ye Abasi, ikọm enye ke se enye anamde ọnọ mmimọ, inyụn̄ iben̄e enye an̄wam mmimọ. Mmọ ẹnịm ke se Bible etịn̄de aban̄a ndibọn̄ akam nnọ Abasi edi akpanikọ. Bible ọdọhọ ete: “Mbuọtidem emi nnyịn inyenede ke enye edi emi, ite, se ededi oro nnyịn iben̄ede nte ekemde ye uduak esie, enye ọbiọn̄ utọn̄ ke eben̄e nnyịn.”—1 John 5:14.

Edi ọsọsọn̄ ediwak owo ndinịm se Bible ekpepde aban̄a akam. Steve etịn̄ nte enye akadade akam. Enye ọdọhọ ete: “Ke ini n̄kedide isua 17, ufan mi ita ẹma ẹkpa—kiet akakpa ke aksiden, ndien iba eken ẹkpa ke  mmọn̄.” Nso ke Steve akanam? Enye ọdọhọ ete: “Mma mbọn̄ akam mbụp Abasi ntak emi kpukpru emi ẹketịbede, edi enye ikọbọrọke mi. Ntre mma n̄kere ke ufọn idụhe ndibọn̄ akam.” Ediwak owo ẹdọhọ ke ufọn idụhe ndibọn̄ akam, sia mmọ ẹkere ke Abasi isikopke akam mmimọ.

Enyene mme n̄kpọ en̄wen emi anamde mme owo ẹkere ke ufọn idụhe ndibọn̄ akam. Ndusụk owo ẹdọhọ ke Abasi ọdọdiọn̄ọ se mmimọ iyomde ye se ifịnade mmimọ, ntre ke ufọn idụhe nditịn̄ mme n̄kpọ emi nnọ enye ke akam.

Mbon en̄wen ẹdọhọ ke Abasi isikopke akam mmimọ ke ntak idiọkn̄kpọ emi mmimọ ikanamde. Kop se Jenny eketịn̄de mi: “Se isinamde ọsọn̄ mi ndibọn̄ akam edi ke n̄kere ke n̄wọrọke n̄kpọ. Mma nnam mme n̄kpọ emi Abasi mîmaha, ntre n̄kọdọhọ idemmi ke idịghe utọ owo nte ami ke Abasi okpokop akam esie.”

Nso kaban̄a fi? Edieke edide mme n̄kpọ oro inemede mi esitiene anam fi ekere m̀mê ufọn osụk odu ndibọn̄ akam, Bible etịn̄ n̄kpọ emi ekemede ndin̄wam fi. Se Bible etịn̄de aban̄a akam edi akpanikọ. * Enye ọbọrọ mme utọ mbụme nte:

• Ndi Abasi esikop akam nnyịn?

• Ntak emi Abasi mîsibọrọke ndusụk akam?

• Didie ke ọkpọbọn̄ akam man Abasi okop?

• Ndi akam ekeme ndin̄wam fi?