ETIE nte akpa mbon oro ẹkedụn̄de ke Cameroon ẹkedi mbon Baka. Ekem, ke n̄kpọ nte 1500, mbon Portugal ẹma ẹdisịm. Ke ediwak isua ẹma ẹkebe, mbon Fulani emi ẹdide mbon muslim ẹma ẹdida edere edere Cameroon ẹnyene. Mfịn, n̄kpọ nte owo 4 ke otu kpukpru owo 10 ke Cameroon ẹdọhọ ke idi Christian, n̄kpọ nte owo 2 ke otu kpukpru owo 10 ẹdi Muslim, ndien mbon eken ẹkpono abasi mme ete ete mmọ.

Mme andidụn̄ obio in̄wan̄ ke Cameroon ẹsifọn ido etieti. Mmọ ẹsikọm ẹnyụn̄ ẹdara isenowo, ẹda ẹdụk ufọk ẹkenọ mmọn̄ ye udia. Enyeneufọk ekeme ndiyat esịt edieke esenowo mîbọhọ enye n̄kpọ ke ubọk idia, ẹsinyụn̄ ẹda oro nte usọn̄enyịn; edi esịt esinem owo ke ẹma ẹbọ enye n̄kpọ ke ubọk.

Ẹsiwak nditọn̄ọ nneme ke ndikọm owo nnyụn̄ mbụp nte n̄kpọ etiede ye enye ye mbonufọk esie. Ẹsikam ẹbụp ẹban̄a ufene owo. Joseph emi edide eyen  Cameroon ọdọhọ ke ini esenowo oyomde ndinyọn̄, ke isikụreke ke owo ndinyụn̄ ndọhọ enye “San̄a sụn̄-o.” Ediwak ini enyeneufọk esida enye akayak ke usụn̄, asan̄a eneme nneme ye enye. Ekem enye ọyọkọm enye unyọn̄ onyụn̄ afiak edem. Esenowo emi owo mîkamake ntem ekeme ndikere ke owo imaha imọ.

Mme ufan ẹsibuana usan udia kiet ẹdia ndusụk ini. Ke Cameroon, emi esiwụt ke mmọ ẹnen̄ede ẹdiana kiet. Ke nditịm ntịn̄, ẹsiwak ndinam emi man mbon oro ẹkenyenede mfịna ẹfiak ẹdiana kiet. Mme owo ndisịn ubọk ke usan kiet ndia udia ntem onyụn̄ etie nte ndidọhọ ke mmimọ inyeneke mfịna aba.