KE INI owo anamde n̄kpọ ndien se enye anamde iwọrọke usụn̄, enye ekeme ndifiak nnam n̄kpọ oro. Edieke enye ekpepde n̄kpọ oto se iketịbede onyụn̄ esịnde idem anam isan̄ emi, se enye anamde ekeme ndiwọrọ usụn̄.

Edi idụhe se idiọkde nte owo ndikere ke imedi n̄kpọ ke ini enye mîdịghe. Enye etidi ididiọn̄ọ ke imọ idịghe n̄kpọ, inyeneke aba se enye ekemede ndinam sia ini ama ebebe.

Yak inọ uwụtn̄kpọ. Jesus Christ ama obụp ini kiet ko ete: “Nso udori ke owo edidia edieke enye enyenede ofụri ererimbot edi ataba ukpọn̄ esie?” (Matthew 16:26) Ẹkeme ndida itien̄wed emi n̄ko ntịn̄ mban̄a mbon oro ẹsịnde ibuot ẹsịn itọn̄ ẹyom okụk ye inyene. Mmọ ẹkere ke okụk ye inyene anam mmimọ idi n̄kpọ, edi mmọ ẹbian̄a idem. Tom Denham emi esinọde mme owo item aban̄a utọ utom emi mmọ ẹkpenamde ekewet ete: “Owo nditak ndikere nte ẹkpemenerede imọ itie, nte ikpenen̄erede inyene okụk, nte ikpedepde emi ye oko, isiyakke uwem enem. Edi ndisịme ndikere ke okụk edinam fi edi n̄kpọ; emi idiyakke okop inemesịt.”

Ediwak owo ẹnyịme se Tom Denham etịn̄de emi. Ke uwụtn̄kpọ, ke ndụn̄ọde kiet oro ẹkenamde ke United States, ẹma ẹsiak n̄kpọ 22 emi mme owo ẹdọhọde ke mmọ ẹsinam owo edi n̄kpọ ke ererimbot emi. “Ndinyene ediwak okụk” ekedi ọyọhọ n̄kpọ 20 ke otu n̄kpọ 22 emi ẹkesiakde do. Ndikop nsọn̄idem, ndinyene nti ufan, ye ndinyene utom emi owo amade ke ẹkebem iso ẹsiak nte se isinen̄erede inam owo edi n̄kpọ.

Emi owụt ke ediwak owo ẹfiọk mme n̄kpọ oro ẹsinen̄erede ẹnam owo edi n̄kpọ ye mbon oro mîsinamke. Edi ekeme ndisọn̄ ndidu uwem ke usụn̄ emi owụtde ke imọfiọk se isinen̄erede inam owo edi n̄kpọ.