SE BIBLE ETỊN̄DE ABAN̄A
Usanaidem
Ndi Abasi oyom nnyịn isana idem?
“Ẹyak nnyịn iyet kpukpru se isabarede obụkidem ye spirit ifep ke idem nnyịn.”—2 Corinth 7:1.
SE BIBLE ỌDỌHỌDE
Andibot nnyịn ama nnyịn onyụn̄ oyom nnyịn ikop nsọn̄idem inyụn̄ idu uwem ibịghi. Enye ọdọhọ ete: “Yak esịt fo . . . ekpeme mme ewụhọ mi, koro ẹyekọrọ ediwak usen ye isua uwem ye emem ẹnọ fi.” (Mme N̄ke 3:1, 2) Imekeme ndikụt nte Abasi amade mme owo ke ibet emi enye ọkọnọde nditọ Israel. Ibet emi ama esịne mme n̄kpọ emi mmọ ẹkpenamde man ẹsana idem. (Deuteronomy 23:12-14) Ke ini nditọ Israel ẹkenamde mme n̄kpọ emi, mmọ ẹma ẹsikop nsọn̄idem inyụn̄ idọn̄ọke udọn̄ọ nte mbon idụt en̄wen, utọ nte Egypt, emi mîkenyeneke utọ ibet oro.—Deuteronomy 7:12, 15.
Ediwak n̄kpọ ẹdu mfịn emi ‘ẹsisabarede obụkidem,’ utọ nte ndin̄wọn̄ sika m̀mê ikọn̄ekpo, ndin̄wọn̄ mmịn mbe ubọk, ye ndida n̄kpọsọn̄ ibọk. Ndien mbon oro ‘ẹyetde kpukpru se isabarede obụkidem ẹfep ke idem mmọ’ isisọpke idọn̄ọ udọn̄ọ, ibuot isisọpke ibe mmọ, mmọ isinyụn̄ ikpaha nte unen. Ndien sia nnyịn isidụn̄de ye mbon en̄wen, nnyịn ndisana idem nte Abasi ọdọhọde owụt n̄ko ke imekere iban̄a mbon en̄wen.—Mark 12:30, 31.
Ndi Abasi oyom nnyịn idu eti uwem inyụn̄ ikpono imọ ikpọn̄-ikpọn̄?
“Ẹwot mme ndido idem mbufo emi ẹdude ke isọn̄ man ẹtre use, mbubiam ido, ọkpọsọn̄ udọn̄ idan̄, idiọk udọn̄, ye edisịn esịt ke n̄kpọ owo, emi edide ukpono ndem. Ke ntak mme n̄kpọ emi iyatesịt Abasi ke edi.” —Colossae 3:5, 6.
SE BIBLE ỌDỌHỌDE
Nte ima iketetịn̄, Bible eteme nnyịn ete “iyet kpukpru se isabarede obụkidem ye spirit ifep ke idem nnyịn.” Ke eyo Jesus, ediwak owo, esịnede mme adaiso ido ukpono mme Jew, ẹma ẹsinam se mmọ ẹkekeme man ẹsana idem, edi idụhe eti uwem inyụn̄ ikponoke Abasi nte enye oyomde. (Mark 7:1-5) Jesus ama owụt ke se mmọ ẹkenamde emi inenke. Enye ọkọdọhọ ete: “Baba n̄kpọ kiet emi otode an̄wa ebe odụk owo idem ikemeke ndisabade owo, sia enye . . . ebede odụk enye idịbi, onyụn̄ ọwọrọ odụk ekwe.” Ekem enye ama adian do ete: “Se iwọrọde owo ke idem ẹsabade owo; koro ndiọi ekikere ẹto ke esịtidem, ke esịt owo, ẹwọn̄ọ: use, inọ, uwotowo, efịbe, edisịn esịt ke n̄kpọ owo, idiọkido, abian̄a, obukpo ido, isịnenyịn, . . . unana ibuot. Kpukpru ndiọi n̄kpọ emi . . . ẹsabade owo.”—Mark 7:18-23.
Jesus ọkọdọhọ ke mbon oro ẹnamde se mmọ ẹkekeme man ẹsana idem, edi mîdụhe eti uwem mînyụn̄ ikponoke Abasi nte enye oyomde ẹtie nte edem cup emi ẹyetde asana edi esịt esie edehe ebe nde.—Matthew 23:25, 26.
Ndi ibet Abasi ọsọn̄ akaha?
“Ndima Abasi ọwọrọ ete nnyịn inịm mme ewụhọ esie; ndien mme ewụhọ esie idobike owo mbiomo.”—1 John 5:3.
SE BIBLE ỌDỌHỌDE
Micah 6:8 ọdọhọ ete: “Nso ke Jehovah oyom oto fi ke mîbọhọke ndinam se inende nnyụn̄ mma mfọnido nnyụn̄ nsụk idem nsan̄a ye Abasi fo.” Ndi se Abasi ọdọhọde inam emi ọsọn̄ akaha? Isọn̄ke! N̄ko, Andibot nnyịn oyom ikop uyo esie sia imade enye. Edieke inamde emi, nnyịn iyenen̄ede ikop inemesịt. (Psalm 40:8) Ndien Abasi esitua nnyịn mbọm ke ini inamde idiọkn̄kpọ. Bible ọdọhọ ete: “Kpa nte ete atuade nditọ esie mbọm, ntre ke Jehovah atua mbon oro ẹbakde enye mbọm. Koro enye etịmde ọfiọk nte ẹbotde nnyịn, emeti ete ke nnyịn idi ntan,” oro edi, ke nnyịn ifọnke ima.—Psalm 103:13, 14.
Ke nditịn̄ ibio ibio, Abasi ndidọhọ nnyịn isana idem, idu eti uwem, inyụn̄ ikpono imọ ikpọn̄-ikpọn̄ owụt ke enye ọfọn ido onyụn̄ ama nnyịn. Edieke inamde se enye ọdọhọde emi, ọwọrọ imenyene ibuot inyụn̄ ima enye n̄ko.
Ekeme Ndidi Ayama Mmọ Emi N̄ko
ENYỌN̄-UKPEME
Abasi Ese Didie Un̄wọn̄ Sika?
Sia Bible mîtịn̄ke n̄kpọ ndomokiet iban̄a sika, isan̄a didie idiọn̄ọ m̀mê ọdiọk?
ENYỌN̄-UKPEME
