SE BIBLE ETỊN̄DE ABAN̄A
Messiah
Bible ama etetịn̄ anyan ini ke edem ete ke Messiah eyedi ererimbot onyụn̄ edisio udọn̄ọ, ufen, ye n̄kpa efep. Ndi Jesus Christ edi Messiah?
Mme owo ẹdinam didie idiọn̄ọ Messiah?
Prọfesi Bible owụt ke Messiah, m̀mê Christ, * ekenyene ndinam utom esie ikaba. Ke akpa ini oro enye akanamde utom nte Messiah, enye okodu mi ke isọn̄. Ndien ata ediwak isua ẹkenyene ndibe mbemiso enye afiakde anam utom esie nte Messiah, isan̄ emi ke heaven. Mme andiwet Bible ẹma ẹtịn̄ ediwak prọfesi ẹban̄a owo emi edidide Messiah, se idiwọrọde enye, ye nte enye edinamde utom esie. Mmọ ẹkenam emi man mme owo ẹkpediọn̄ọ enye. Ke nditịm ntịn̄, Bible ọdọhọ ke uduak editịn̄ prọfesi edi man “ẹtie ntiense ẹnọ Jesus.”—Ediyarade 19:10.
Se Jesus akanamde ke isọn̄ ekedi ata ekpri ke ẹmende ẹdomo ye se enye editiede ke heaven inam inọ kpukpru owo ke isọn̄
SE BIBLE ỌDỌHỌDE
Kop se Bible eketịn̄de mi aban̄a Messiah:
-
Enye edidi eyen Edidem David.—Isaiah 9:7; Luke 3:23-31. *
-
Edimana ke Bethlehem.—Micah 5:2; Luke 2:4-7.
-
Oyosụhọde idem ọkwọrọ “eti mbụk.”—Isaiah 61:1; Luke 4:43.
-
Ẹyesịn enye ke ndek, owo idinyụn̄ idaha enye ke n̄kpọ.—Isaiah 53:3; Matthew 26:67, 68.
-
Ẹyeda enye ẹnọ ke mbak silver 30.—Zechariah 11:12, 13; Matthew 26:14, 15.
-
Enye idisioroke uyo ke ini ẹdoride enye ikọ ẹnyụn̄ ẹbierede n̄kpa ẹnọ enye.—Isaiah 53:6, 7; Matthew 27:12-14.
-
Enye edi “eyenerọn̄” uwa emi edimende idiọkn̄kpọ mme owo ifep inyụn̄ inam mmọ ẹsana ke enyịn Abasi.—Isaiah 53:7; John 1:29, 34, 36.
-
Ẹyewot enye, edi owo idibụn̄ke ọkpọ esie ndomokiet.—Psalm 34:20; John 19:33, 36.
-
Ẹdibụk enye ye mme imọ owo.—Isaiah 53:9; Matthew 27:57-60.
-
Abasi ayanam enye eset ke ọyọhọ usen ita.—Matthew 16:21; 28:5-7.
Kpukpru prọfesi emi ye ediwak en̄wen ẹma ẹsu Jesus ke idem. Jesus n̄ko ama esikọk mme owo udọn̄ọ onyụn̄ anam mme akpan̄kpa ẹset. Emi n̄ko anam nnyịn ifiọk ke enye ekedi Messiah onyụn̄ anam inịm ke enye ayanam kpukpru se Abasi ọn̄wọn̄ọde ọnọ kpukpru owo ke ini iso. (Luke 7:21-23; Ediyarade 21:3, 4) Ke Abasi ama akanam Jesus eset, enye ama osụhọde etie ke “ubọk nnasia” Abasi, ebet ini emi enye edikụrede utom esie nte Messiah.—Psalm 110:1-6.
“Ke ini Christ edidide, nte enye ayanam mme idiọn̄ọ akan se owo emi anamde?”—John 7:31.
Didie ke Messiah edikụre utom esie?
Mme Jew eyo Jesus ẹkekere ke Messiah oyosio mmọ ke ubọk mbon Rome onyụn̄ akara obio ubọn̄ Israel emi ẹfiakde ẹyak ẹnọ mmọ. (Utom 1:6) Nte ini akakade ke mme mbet Jesus emi ẹdide mme Jew ẹkedifiọk ke Jesus editie ke heaven ikụre utom esie nte Messiah, sia ẹma ẹkenọ enye ofụri odudu ke heaven ye ke isọn̄.—Matthew 28:18.
SE BIBLE ỌDỌHỌDE
Se se Jesus enyenede ndinam mi nte Messiah ke heaven:
-
Edi Edidem Obio Ubọn̄ Abasi emi edikarade ofụri ererimbot.—Daniel 7:13, 14; Ediyarade 11:15.
-
Enye ke Abasi ada ọdiọn̄ kpukpru mbon emi ẹbuọtde idem ye enye.—Genesis 22:17, 18; Psalm 72:7, 8.
-
‘Ayanam idem akpa ediwak idụt’ ye ndidem mmọ ke ini enye osobode mmọ ke ntak emi mmọ ẹkebiọn̄ọde enye.—Isaiah 52:15; Ediyarade 19:19, 20.
-
Ayanam “akwa otuowo” emi ẹtode kpukpru idụt ẹnyụn̄ ẹnamde se inende ẹdụk obufa ererimbot emi emem edidude ke kpukpru ebiet.—Ediyarade 7:9, 10, 13-17.
-
Enye ye Jehovah Abasi ẹyenam mme owo ẹset ẹdidu uwem ke Paradise ke isọn̄.—Luke 23:43; John 5:21, 28, 29.
-
Eyekpep ikọt esie nte ẹkpedude ke emem.—Isaiah 11:1, 2, 9, 10.
-
Oyosio idiọkn̄kpọ, emi edide akpan ntak emi mme owo ẹsidọn̄ọde ẹnyụn̄ ẹkpade.—John 1:29; Rome 5:12.
-
Ayabiat kpukpru utom Satan ke akpatre onyụn̄ anam kpukpru owo ẹdiana kiet ẹsụk ibuot ẹnọ ukara Jehovah Abasi.—1 Corinth 15:25-28; 1 John 3:8.
Jesus ama anam ofụri se akanade enye anam mi ke isọn̄. Enye idinyụn̄ itreke nditie ke heaven n̄kụre utom esie nte Messiah. Ntre, mbon oro ẹmade uwem ẹsinen̄ede ẹkpep n̄kpọ ẹban̄a enye sia enye ọkọdọhọ ke ‘imọ idi usụn̄ ye akpanikọ ye uwem.’—John 14:6.
“Edinen owo ayafiari ke eyo esie, ndien ediwak emem oyodu tutu ọfiọn̄ idụhe aba. Enye oyonyụn̄ akara mme owo . . . tutu esịm utịt isọn̄.”—Psalm 72:7, 8.
^ ikp. eki. 5 “Messiah” edi ikọ Hebrew. “Christ” edi ikọ Greek onyụn̄ ọwọrọ ukem n̄kpọ ye “Messiah.”—John 1:41.
^ ikp. eki. 7 Akpa itien̄wed oro ẹsiakde mi edi prọfesi; udiana edi nte prọfesi emi okosude.
Ekeme Ndidi Ayama Mmọ Emi N̄ko
BIBLE EKEME NDIBỌRỌ MBỤME FO
Ndi Mme Prọfesi Oro Aban̄ade Messiah Owụt ke Jesus Ekedi Messiah?
Ndi nsio nsio owo ẹkeme ndidi Messiah?
ENYỌN̄-UKPEME
“Nnyịn Imokụt Messiah”!
Ediwak owo ẹnịm ke Jesus ekedi Messiah oro Abasi ọkọn̄wọn̄ọde. Mbon eken inịmke. Se se Bible etịn̄de.
