SE MME OWO ẸDỌHỌDE

Ediwak owo, esịnede mme aka ufọkabasi, ẹkere ke idiọkke ndinam afai ke ini owo ayatde fi esịt. Ata ediwak owo inyụn̄ ikwe se idiọkde ke owo ndise afai ke fim m̀mê ke TV.

SE BIBLE ỌDỌHỌDE

Enyene akwa obio kiet emi okodude ke eset emi anade ndon idahaemi ekpere Mosul, ke edem edere Iraq. Obio emi ekekere Nineveh okonyụn̄ edi ibuot obio ukara Assyria. Ke ini obio emi okosụk edide ata akwa obio, Abasi ọkọdọhọ ke ‘iyanam enye edi ndon.’ (Zephaniah 2:13) Abasi ọkọdọhọ n̄ko ke ‘iyenịm enye nte n̄kpọ ndise.’ Ntak-a? Koro Nineveh ekedi “obio emi ọduọkde iyịp.” (Nahum 1:1; 3:1, 6) Psalm 5:6 ọdọhọ ke “Jehovah asasua ọduọkiyịp.” Nte Nineveh anade ndon mfịn owụt ke Abasi ama anam nte enye ọkọdọhọde.

Satan emi ẹkotde n̄ko Devil ọkọtọn̄ọ afai. Enye edi asua nnyịn ye asua Abasi. Jesus Christ okokot enye “owotowo.” (John 8:44) N̄ko, sia “ofụri ererimbot [esịnede] ke idak odudu andidiọk,” oro anam mme owo ẹtie afai afai ẹnyụn̄ ẹma ndise afai ke fim m̀mê ke TV. (1 John 5:19) Ana ikpep ndisua afai inyụn̄ ima se Abasi amade man inem enye esịt. * Ndi imekeme ndinam oro?

“Jehovah . . . asasua owo ekededi eke amade afai.”—Psalm 11:5.

SE MME OWO ẸDỌHỌDE

Afai esesịne nnyịn ke iyịp, ndien idụhe se owo ekemede ndinam mban̄a oro.

SE BIBLE ỌDỌHỌDE

“Ẹsion̄o kpukpru mmọ ke idem mbufo ẹfep—iyatesịt ye ifụtesịt ye idiọkn̄kpọ ye isụn̄i, ẹkûnyụn̄ ẹyak mbubiam ikọ ọwọrọ mbufo ke inua. . . . Ẹsio akani owo ye mme edinam esie ẹduọk, ẹnyụn̄ ẹmen obufa owo ẹsịne.” (Colossae 3:8-10) Ndi se Abasi ọdọhọde inam emi ọsọn̄ akaha? Ihih. Mme owo ẹkeme ndikpụhọde. * Didie?

Akpa n̄kpọ emi anade owo anam edi ndinyene nnennen ifiọk mban̄a Abasi. (Colossae 3:10) Edieke owo emi enyenede  eti esịt ekpepde aban̄a nti edu ye ibet Abasi, emi ayanam enye ama Abasi onyụn̄ oyom ndinem enye esịt.—1 John 5:3.

Ọyọhọ n̄kpọ iba aban̄a utọ mbon oro nnyịn idụkde nsan̄a. Bible ọdọhọ ete: “Kûdụk nsan̄a ye owo ekededi eke ọsọpde iyatesịt; kûnyụn̄ udụk ndụk ye owo ifụtesịt, mbak afo udumehe ye usụn̄ esie unyụn̄ usịn ukpọn̄ fo ke afia.”—Mme N̄ke 22:24, 25.

Ọyọhọ n̄kpọ ita aban̄a nnyịn ndinyene ikike. Edieke enyenede ikike, ọyọdiọn̄ọ ke afai edi ata idiọk n̄kpọ; owo afai isikemeke ndimụm idem n̄kama ke ini ẹnamde se ibiakde enye. Edi owo emem itiehe ntem; enye esimụm idem akama ke ini n̄kpọ abiakde enye. Mme N̄ke 16:32 ọdọhọ ete: “Owo eke mîsọpke iyatesịt ọfọn akan ọkpọsọn̄ owo.”

“Ẹyom emem ye kpukpru owo.” —Mme Hebrew 12:14.

SE MME OWO ẸDỌHỌDE

Afai itọn̄ọke mfịn, idinyụn̄ itreke tutu amama.

SE BIBLE ỌDỌHỌDE

“Ayak esisịt, idiọkowo ididụhe aba . . . Edi mbon nsụkidem ẹyeda isọn̄ ẹnyene, ediwak emem oyonyụn̄ adat mmọ esịt.” (Psalm 37:10, 11) Abasi ọmọn̄ osobo mbon emi ẹmade afai nte enye okosobode mbon Nineveh. Enye edinam emi man anyan̄a mbon nsụhọdeidem ye mbon emem. Ke oro ebede, afai ididụhe aba tutu amama!—Psalm 72:7.

Ntre, ini edi emi ndikpep nditie emem emem man inem Abasi esịt. Udiana Peter 3:9 ọdọhọ ete: “Jehovah . . . enyene ime ye mbufo koro enye mîyomke baba owo kiet atak edi oyom kpukpru owo ẹkabade esịt.”

“Mmọ ẹyeda akan̄kan̄ mmọ ẹdom n̄kpọ ufụn̄isọn̄ ẹnyụn̄ ẹda eduat mmọ ẹdom ikwa udiọn̄ eto.” —Isaiah 2:4.