“Mma N̄kụt Kpukpru Se N̄koyomde”

NTE ekemde ye ntọt kiet otode Esop Kaban̄a Nsọn̄idem Ererimbot, ẹdọhọ ke se iwakde ibe miliọn owo 120 ke ofụri ererimbot ẹkop ọkpọsọn̄ mfụhọ. Kpukpru isua, owo miliọn kiet ẹsiwot idem ndien owo miliọn 10 esịm 20 ẹsidomo ndiwot idem. Nso un̄wam idu inọ mbon oro ẹkopde ọkpọsọn̄ mfụhọ? Ibọkusọbọ ekeme ndisụhọde mfụhọ, ndien ndinọ mbon oro ẹkopde ọkpọsọn̄ mfụhọ un̄wam eke ntụk edi akpan n̄kpọ. Akan oro, ndusụk mbon oro ẹkopde ọkpọsọn̄ mfụhọ ẹkụt ata un̄wam efen efen ke mme n̄wed Mme Ntiense Jehovah, nte leta oro otode France mi owụtde.

“Ke ndondo emi, n̄kekwe ntak n̄kpakade iso ndu uwem. Mma mbọn̄ akam nnọ Abasi nte enye ayak mi n̄kpa. Eketie mi ke idem nte mma n̄kpakpa mma. Sia n̄koyomde ndausụn̄, mma mbọn̄ akam ifịk ifịk nnọ Jehovah. Mma mbiere n̄ko ndikot 2002 Yearbook of Jehovah’s Witnesses, mma nnyụn̄ n̄kot enye n̄kụre ke usen ita. Nnyene ndinyịme nte ke n̄wed oro ama enen̄ede ọsọn̄ọ mi idem onyụn̄ ọsọn̄ọ mbuọtidem mi.

“Mma nnam ndụn̄ọde ke magazine Enyọn̄-Ukpeme ye Awake!, ndien nso n̄kpọ n̄kpaidem ke n̄kokụt ntem! Mmokot magazine emi kpukpru ini ke se ibede isua 15, edi akanam n̄kọfiọkke adan̄a nte mme ibuotikọ esie ẹsisọn̄ọde owo idem ẹnyụn̄ ẹdemerede owo udọn̄. Mmọ ẹyọhọ ye ima—kpa edu oro enen̄erede anana mfịn. Mma n̄kụt kpukpru se n̄koyomde.”

Bible ọdọhọ ete: “Jehovah emekpere mmọ eke esịt obụn̄ọde mmọ; onyụn̄ anyan̄a mmọ eke esịt ọduọde.” (Psalm 34:18) Nte eyịghe mîdụhe, Bible ekeme ndinọ kpukpru mbon oro “esịt obụn̄ọde” m̀mê “esịt ọduọde” nsịnudọn̄ ye idotenyịn ini iso. Mme Ntiense Jehovah ẹsuan mme n̄wed ẹkọn̄ọde ke Bible man ẹn̄wam mbon oro ẹyomde un̄wam ndibọ ufọn nto n̄wed odudu spirit Abasi emi akamade ndọn̄esịt mi.