Eti Edu Uwem ‘Anam Ukpepn̄kpọ Abasi Enyene Uku’

EKPRI Maria aka n̄wed ke Kransnoyarsk, Russia. Enye enen̄ede enem uyo ikwọ tutu andikpep esịn enye enyịn̄ ke otu n̄kaikwọ ufọkn̄wed. Esisịt ini ke oro ebede, Maria ama adaha ukpono ukpono ebịne andikpep oro akanam enye ọfiọk ke imọ idikwọhọ ndusụk ikwọ. Ntak-a? Koro ndikwọ ikwọ oro ọdọn̄ọde mme ikọ ido ukpono atuaha ye mme n̄kpọ oro imọ inịmde ke akpanikọ, oro ẹkọn̄ọde ke Bible. Idem ama akpa andikpep oro, anamde enye ekere ‘m̀mê nso ikwan̄a ke ndikwọ ikwọ ntoro Abasi.’

Man owụt ntak emi imọ mîdikwọhọ ikwọ oro aban̄ade Abasi-Ita-ke-Kiet, Maria ama okụbọde Bible esie anam an̄wan̄a nte ke Abasi ye Jesus Christ idịghe Abasi kiet, ye nte ke edisana spirit edi anamutom odudu Abasi. (Matthew 26:39; John 14:28; Utom 4:31) Maria ọdọhọ ete: “Emi ikabiatke itie ebuana mi ye andikpep oro. Mme andikpep oro inyenede ke ufọkn̄wed nnyịn ẹfọn etieti. Mmọ ẹsima nnyịn itịn̄ se isịnede nnyịn ke esịt.”

Ke ofụri isua oro, mme andikpep ye nsan̄a ubet ukpepn̄kpọ Maria ẹma ẹkpono Maria etieti. Maria ọdọhọ ete: “Mme edumbet Bible ẹn̄wam mi. Ke utịt isua oro, ẹma ẹnọ mi enọ ke ntak edinam akpanikọ ye ke ndinam mme n̄kpọ ke nde ke nde. Ufọkn̄wed nnyịn ama onyụn̄ ọnọ ete ye eka mi leta, ọkọm mmọ ke ukpep oro mmọ ẹnọde mi.”

Maria akana baptism ke August 18, 2001. Enye ọdọhọ ete: “Esịt enem mi ndinam n̄kpọ nnọ utọ utịbe utịbe Abasi emi, Jehovah!” Ke ofụri ererimbot, mme uyen Ntiense Jehovah ẹdu uwem ekekem ye ikọ Titus 2:10, emi ọdọhọde ete: “[Ẹnam] ukpepn̄kpọ Abasi, Andinyan̄a nnyịn, enyene uku ke kpukpru n̄kpọ.”

[Ndise ke page 32]

Leta esịtekọm ye N̄weditoro eti edu uwem

[Ndise ke page 32]

Maria ye ete ye eka esie ke enye ama akana baptism