Mme Mbụme Ẹtode Mme Andikot

Nso ke Mme N̄ke 24:27 ekpep nnyịn?

Andiwet Mme N̄ke ọkọnọ akparawa item, ete: “Tịm nam utom fo ke ebresien, nyụn̄ nam n̄kpọ ma ke in̄wan̄; ndien ke ini oro okụrede, bọp ufọk fo.” Nso ke n̄ke oro ẹkedade odudu spirit Abasi ẹwet mi enen̄ede etịn̄ aban̄a? Enye ọdọhọ ke akparawa ekpenyene ndinen̄ede mben̄e idem mbemiso enye ọdọ n̄wan onyụn̄ obon nditọ, ye nte ke akpana enye enen̄ede ọfiọk se owo ndidi ebe ye ete nditọ ọwọrọde.

Ini akpa, ima isidọhọ ke itie N̄wed Abasi emi ọwọrọ ke ikpanaha ebe ada ofụri ini esie an̄wana okụk, edi ke akpana enye esịn idem ese ubon esie enyịn ke n̄kan̄ eke spirit, onyụn̄ esịn udọn̄ ọnọ mmọ ẹnam n̄kpọ Abasi. Okposụkedi emi ekikere emi enende, ndien se Bible onyụn̄ ọdọhọde mme ete ẹnam edi oro, edi etie nte idịghe se itie N̄wed Abasi emi enen̄erede etịn̄ aban̄a edi oro. Ntak emi idọhọde ntre? Kop ntak iba mi.

Akpa, itien̄wed emi itịn̄ke iban̄a mbon emi ẹma ẹkenyenyene ubon, edi etịn̄ aban̄a ẹdibọp ata ata ufọk. Ikọ oro “bọp ufọk” ekeme n̄ko ndida mban̄a nditọn̄ọ ubon, oro edi, ndidọ n̄wan nnyụn̄ mbon nditọ.

Ke adianade do, itien̄wed oro ọdọhọ ke akpana ẹnam n̄kpọ ke adiana ke adiana; onyụn̄ etie nte ndidọhọ “ama anam emi ama ndien afo anam oko.” Ndi n̄ke oro ọdọhọ ke akpana owo an̄wana okụk kan̄a mbemiso anamde n̄kpọ Abasi? Baba!

Ke eyo Bible, edieke akparawa okoyomde nditọn̄ọ ubon, akana enye obụp idemesie ete: ‘Ndi mmeben̄e idem ndise mban̄a n̄wan mi ye nditọ oro idinyenede?’ Akana enye enyene ubọkutom, n̄kpọ nte utọin̄wan̄, mbemiso enye akade ọkọdọ n̄wan obon nditọ. Today’s English Version akabade itie N̄wed Abasi emi ntem: “Kûbọp ufọk unyụn̄ udọ n̄wan ubon nditọ tutu afo ọtọ in̄wan̄ fo ama, onyụn̄ ọfiọk ke eyenyene se adiade.” Ndi item emi ke enyenyene ufọn mfịn?

Enyene. Owo ekededi oro oyomde ndidọ n̄wan akpana enen̄ede eben̄e idem ndise mban̄a ubon esie. Ana enye anam utom edieke idem esie ọsọn̄de. Edi, idịghe okụk kpọt ke ẹsida ẹse ẹban̄a ubon. Ikọ Abasi ọdọhọ ke edieke owo mînọhọ ubon esie n̄kpọ eke obụk ye eke spirit, ke enye ọdiọk akan owo emi mînịmke ke akpanikọ! (1 Tim. 5:8) Ntre, akparawa emi oyomde ndidọ n̄wan mbon nditọ ekpenyene ndibụp idemesie ete: ‘Ndi mmenyene okụk ndida nse mban̄a ubon mi? Ndi nyekeme ndin̄wam ubon mi ẹtuak ibuot ẹnọ Abasi? Ndi nyekeme ndinịm ukpepn̄kpọ ubon kpukpru ini?’ Ikọ Abasi ọdọhọ ke emi edi ata akpan n̄kpọ oro anade ebe anam.—Deut. 6:6-8; Eph. 6:4.

Ntre, akparawa emi oyomde ndidọ n̄wan ekpenyene ndinen̄ede ntie n̄kere se idude ke Mme N̄ke 24:27. N̄kaiferi n̄ko ekpenyene ndibụp idemesie m̀mê imenen̄ede iben̄e idem ndidi n̄wanndọ ye eka nditọ. Mbon oro ẹdọde ndọ obufa emi ẹyomde ndinyene nditọ, ye mbon oro ẹyomde ndidọ ndọ ẹkpenyene ndibụp idemmọ ukem mbụme emi. (Luke 14:28) Ndinam item N̄wed Abasi emi ekeme ndisio ikọt Abasi ke ediwak afanikọn̄ onyụn̄ anam mmọ ẹkop inem ndọ mmọ.

[Se ẹwetde ke ikpọ abisi ke page 12]

Nso mbụme aban̄ade ndọ ke akparawa okpobụp idemesie?