EKEDI ke August 1936. Eketịbe ke Okụre Ubọn̄ Swaziland. Ibịghike Robert ye George Nisbet ẹkebre ikwọ, ekem ẹbre utịn̄ikọ Brọda J. F. Rutherford ke ubomisọn̄ usuanetop. Esịt ama adat Edidem Sobhuza II. George ọdọhọ ete: “Nnyịn ikọfiọkke se ikpanamde ke ini edidem emi ọkọdọhọde ke iyom ndidep ukwak ubre usanikwọ, usanikwọ, ye laudspika ubre etop Obio Ubọn̄!”

Robert ama ọbọrọ mbọm mbọm ete ke mmọ idịghe unyam. Ntak-a? Koro owo en̄wen enyene mmọ. Edidem ama oyom ndifiọk m̀mê anie enyene.

Robert ọkọdọhọ ete, “Edidem en̄wen enyene.” Do, Edidem Sobhuza ama obụp m̀mê anie edi Edidem oro. Robert ama ọbọrọ ete: “Enye edi Jesus Christ, Edidem Obio Ubọn̄ Abasi.”

Edidem Sobhuza ama ọbọrọ ukpono ukpono ete: “Oh, enye edi akwa Edidem. Nyomke ndida baba n̄kpọ kiet emi enyenede enye.”

Robert ekewet ete: ‘Edu Akwa Ọbọn̄ emi, Edidem Sobhuza, ama akpa mi idem. Enye eketịn̄ ata edinem Ikọmbakara edi itan̄ke idem, onyụn̄ enem itie. Mma ntie ye enye ke ọfis esie ke n̄kpọ nte minit 45, ke adan̄aemi George ebrede ikwọ ke an̄wa.’

Robert aka iso ete, ‘Nte ini akakade ke usen oro, ima ika Ufọkn̄wed Ofụri Idụt Swaziland, ndien do ke ikenyene akakan ifiọkutom. Ima ikwọrọ ikọ inọ akamba etubom, ndien enye ama enen̄ede akpan̄ utọn̄. Ke ini iketịn̄de iban̄a ukwak ubre usanikwọ inyụn̄ idọhọde ke imọn̄ ibre utịn̄ikọ inọ ofụri ufọkn̄wed, esịt ama adat enye, enye onyụn̄ ọdọhọ se ikperede ndisịm nditọ ufọkn̄wed ikie ete ẹtie ke mbiet ẹkpan̄ utọn̄. Ẹma ẹsian nnyịn ke ufọkn̄wed sekọndri oro ẹsikpep irenowo utọ in̄wan̄, utom usọeto, utom ubọpn̄kpọ, Ikọmbakara, ye ibat; ẹkpep iban utom nurse, utom esịtufọk, ye nti ubọkutom eken. Eka eka Akwa Ọbọn̄ emi akasiak ufọkn̄wed oro.’

Ko ke edem ke 1933, Edidem Sobhuza ama enen̄ede akpan̄ utọn̄ ọnọ mme asiakusụn̄ emi ẹkekade Okụre Ubọn̄. Isan̄ kiet, enye ama akam osop mbon ukpeme esie emi ẹkedide mbonekọn̄ 100 man ẹkop nte ẹbrede etop Obio Ubọn̄. Enye  ama otobo mme magazine nnyịn onyụn̄ ọbọ mme n̄wed. Ikebịghike Edidem oro ama ekpere ndinyene kpukpru n̄wed nnyịn! Akan oro, enye ama etịm mmọ obon ketket kpa ye oro ukara Britain ẹkekpande mme n̄wed nnyịn ke ini udiana ekọn̄ ererimbot.

Edidem Sobhuza II ama aka iso ndiyak Mme Ntiense ẹdụk ẹdi Okụre Ubọn̄ ke Lobamba, idem okotde mme ọkwọrọ ederi ete ẹdi ẹdikop utịn̄ikọ Bible. Ke ini Helvie Mashazi, Ntiense emi otode do, okosụk enemede Matthew ibuot 23, otu mme ọkwọrọ ederi ẹma ẹyat esịt ẹdaha ẹda ẹdomo ndinyịk enye osụhọde etetie. Edi Edidem oro ama ọdọhọ Brọda Mashazi aka iso ke utịn̄ikọ esie. N̄ko-n̄ko, Edidem oro ama ọdọhọ otuowo ẹwet kpukpru ufan̄ikọ Bible oro ẹsiakde ke utịn̄ikọ oro!

Ke ẹma ẹkekop utịn̄ikọ oro eyenete emi edide asiakusụn̄ ọnọde, mme ọkwọrọ ederi inan̄ ẹma ẹdọhọ ẹte: “Nnyịn idịghe aba mme ọkwọrọ ederi, edi idi Mme Ntiense Jehovah idahaemi.” Ekem mmọ ẹma ẹbụp asiakusụn̄ oro m̀mê enye enyene mme ukem n̄wed oro Akwa Ọbọn̄ oro enyenede.

Ọtọn̄ọde ke iduọk isua 1930 tutu esịm ini emi enye akakpade ke 1982, Akwa Ọbọn̄ oro ama enen̄ede okpono Mme Ntiense Jehovah inyụn̄ iyakke ẹkọbọ mmọ ke ntak emi mîtieneke ibuana ke mme ido obio Swaziland. Mmọdo, ama odot nte Mme Ntiense ẹkenen̄erede ẹwụt esịtekọm ẹnọ enye, ẹnyụn̄ ẹnen̄ede ẹfụhọ n̄kpa esie.

Ke ntọn̄ọ ntọn̄ọ 2013, mme asuanetop Obio Ubọn̄ ke Swaziland ẹma ẹbe 3,000. Sia ibatowo ke idụt emi ebede miliọn kiet esisịt, ọwọrọ asuanetop kiet enyene ndikwọrọ ikọ nnọ owo 384. Mmọ ẹnyene se ibede mme asiakusụn̄ 260 ye esop 90, ndien owo 7,496 ẹkedụk Editi ke 2012. Ana in̄wan̄-in̄wan̄ ke n̄kọri oyokpon ke idụt oro ke ini iso. Ke akpanikọ, ẹma ẹsịn eti itiat idakisọn̄ ke ini oro ẹkekade Swaziland ke iduọk isua 1930.—Oto Itieutom Ubon N̄kani N̄kpọ Nnyịn ke South Africa.