Ndifiọk Se Bible Enen̄ede Ekpep Aban̄a Heaven

MME owo ẹnen̄ede ẹyom ndika heaven. Mme Muslim, mbon Hindu, mbon Buddha, mbon ufọkabasi Christendom, ye idem mbon oro mînyeneke udọn̄ ke ido ukpono ẹnịm ke nsio nsio usụn̄ ke owo esika iso odu uwem ke ama akakpa. Mmọ ẹsiwak ndikere ke heaven edi ediye ebiet inemesịt emi mme owo mîbọhọ aba ufen, emi ẹnyụn̄ ẹfiakde ẹkediana ye “mme owo mmọ oro ẹkekpan̄ade.” Kpa ye oro, ata ediwak owo ẹsụk ẹkokụt ke ikọ emi edi akpanikọ: Kpukpru owo ẹyom ndika heaven, edi idụhe owo emi oyomde ndikpa man aka heaven. Ntak emi edide ntre?

Edieke ẹkebotde nnyịn man ikpa ika heaven, ndi mme owo ikpesitiehe-tie ibet n̄kpa nte emi esidọn̄de eyenọwọn̄ ndikpon n̄wọrọ owo, m̀mê nte emi uyen etiede-tie ebet ndidọ ndọ? Edi ata ediwak owo iyomke ndikpa.

Kpa ye oro, mme ọkwọrọ ederi ẹdọhọ ke ererimbot edi urua, ima inyam ima inyọn̄ heaven ebietidụn̄ nnyịn. Ke uwụtn̄kpọ, ẹdọhọ ke Theodore Edgar Cardinal McCarrick, akani akwa bishop Washington, D.C., ọkọdọhọ ete: “Owo ikobotke nnyịn man idu orụk uwem emi. Ẹkebot nnyịn man idụn̄ ke heaven.” Ẹdọhọ n̄ko ke akani etieibuot N̄ka Ufọkabasi Evangelical ke United States, ọkọdọhọ ete: “Abasi okobot nnyịn man inọ enye ubọn̄ inyụn̄ ika heaven . . . koro heaven edi ebietidụn̄ nnyịn.”

Mbụk emi mme owo ẹkopde esinam mmọ ẹnịm ke owo esika heaven ke ini enye akpade. George Barna, emi edide esenyịn ke itieutom emi esidụn̄ọrede mme ukpepn̄kpọ ido ukpono, ama okụt ke “se mme owo ẹsikụtde ke mme utọ n̄kpọ nte ndise senima, ikwọ, ye mme n̄wed ẹsinam mmọ ẹnịm se mmọ ẹnịmde ẹban̄a uwem oro idude idahaemi ye uwem oro ididude ima ikpa.” Ẹkedọhọ ke pastọ ufọkabasi Episcopal ke Florida ọkọdọhọ ete: “N̄kukụre n̄kpọ oro ifiọkde iban̄a heaven edi ke enye edi ebietidụn̄ Abasi.”

Edi heaven edi kiet ke otu akpan n̄kpọ oro ẹnemede ke Bible. Ikọ Abasi ọdọhọ ke heaven etie didie? Ndi Abasi okobot mme owo man ẹdụn̄ ke heaven? Edieke mme owo ẹdinen̄erede ika heaven, nso ke mmọ ẹdinam do?

[Se ẹwetde ke ikpọ abisi ke page 3]

Ntak emi ediwak owo ẹyomde ndika heaven, edi idụhe eke oyomde ndikpa man aka heaven?