Mme Andikot N̄wed Nnyịn Ẹbụp Ẹte . . .

Ndi Kpukpru Owo Ẹnyene Ukem Ifet Ndifiọk Nnyụn̄ Mma Abasi?

▪ Ke ini ẹkebụpde Jesus m̀mê ewe edi n̄kponn̄kan ewụhọ, enye ọkọdọhọ ete: “Afo enyene ndima Jehovah Abasi fo ke ofụri esịt fo ye ke ofụri ukpọn̄ fo ye ke ofụri ekikere fo.” (Matthew 22: 37) Edi mbemiso mme owo ẹkemede ndima Abasi, ana mmọ ẹnyene nnennen ifiọk ẹban̄a enye. (John 17:3; Colossae 1:9, 10) Ndi kpukpru owo ẹyenyene ifet ndinyene ifiọk emi?

Bible edi akpan n̄kpọ oro anamde nnyịn ifiọk Abasi. (2 Timothy 3:16) Ediwak owo ẹdụn̄ ke mme obio oro ẹkemede ndisọp nnyene Bible. Ekeme ndidi ẹsidọhọ mme owo emi ndien ndien ke ẹmọn̄ ẹkpep Bible ye mmọ man mmọ ẹnyene nnennen ifiọk Abasi. (Matthew 28:19) Ndima ete ye eka emi ẹdide mme Christian—emi ẹnọde nditọ mmọ ifet kpukpru usen ndikpep mban̄a Abasi—ẹbọk ndusụk mmọ.—Deuteronomy 6:6, 7; Ephesus 6:4.

Edi idaha mbon en̄wen ifọnke ntre. Ndusụk owo ẹto ubon oro ẹsifiomode mmọ, emi ete ye eka mînyeneke ndammana ima inọ nditọ mmọ. (2 Timothy 3:1-5) Ekeme ndisọn̄ mbon oro ẹkebọkde ke mme utọ ubon oro ndida Abasi nte edima Ete eke heaven. Ediwak owo ikenen̄ekede ika n̄wed, ndien emi anam mmọ ikemeke ndikot Bible. Ndien mme ukpepn̄kpọ nsunsu ido ukpono ẹkịm mbon en̄wen enyịn, mîdịghe mmọ ẹdu ke ubon, obio, m̀mê idụt oro mînyịmeke mmọ ẹkpep akpanikọ Bible. (2 Corinth 4:4) Ndi idaha mme owo emi iyakke mmọ ẹnyene ifet ndikpep mban̄a Abasi nnyụn̄ mma enye?

Jesus ama etịn̄ ke mfịna ndusụk owo ẹyenam ọsọn̄ mmọ ndima nnyụn̄ n̄kop uyo Abasi. (Matthew 19:23, 24) Edi Jesus ama eti mme mbet esie ke okposụkedi oro ndusụk mfịna ẹtiede nte ẹsọn̄ ẹkan owo, ke “Abasi [ekeme] ndinam kpukpru n̄kpọ.”—Matthew 19:25, 26.

Kere ban̄a mme n̄kpọ emi: Jehovah Abasi okụt ete ke Ikọ esie, kpa Bible, edi n̄wed oro ẹsuande ẹkan ke ofụri emana. Bible ama etịn̄ ke ẹyekwọrọ eti mbụk Abasi ye eke uduak esie kaban̄a isọn̄ ke “ofụri isọn̄.” (Matthew 24:14) Mfịn, Mme Ntiense Jehovah ẹkwọrọ eti mbụk oro ke se ibede idụt 230 ẹnyụn̄ ẹmịn̄ n̄wed un̄wam ukpep Bible ke n̄kpọ nte usem 500. Idem mbon oro mînyeneke Bible ẹsụk ẹkeme ndikpep ekese mban̄a ata Abasi ebe ke ndise mme n̄kpọ emi enye obotde.—Rome 1:20.

Ke adianade do, Ikọ Abasi ọdọhọ ete: “Jehovah odụn̄ọde kpukpru esịt owo, onyụn̄ etịm ọfiọk kpukpru se ekikere obotde: afo ama oyom enye, oyokụt enye.” (1 Chronicles 28:9) Ntre, okposụkedi emi Jehovah mîn̄wọn̄ọke ndinọ kpukpru owo ata ukem ifet, enye okụt ete ke ẹnọ kpukpru mbon oro ẹnyenede esịt akpanikọ ifet. Enye ayakam anam ẹnọ mbon oro akananam mînyeneke ifet ndikpep n̄kpọ mban̄a enye ifet ebe ke ndinam mmọ ẹset ẹdidu uwem ke edinen obufa ererimbot.—Utom 24:15.