IBUOTIKỌ IKPAEDEM: NTAK EMI IBỌDE UFEN NTEM-E? INI EWE KE UFEN EMI EDITRE?
Ata Ediwak Owo Ẹkpan̄a ke Unana Ntak!
Noelle edi ekpri ediye eyen emi mme owo ẹmade etieti. Enye esima ndiwet n̄kpọ. Mbubreyo usen kiet, enye ama asan̄a odụk esa mmọ akadian̄ade odụk obube mmọn̄. Urua iba kpọt akayak enye ndisịm isua inan̄ ke ini enye akakpade.
Ke December 14, 2012, ẹma ẹtop nditọwọn̄ 20 ye ikpọ owo 6 ẹwot ke ufọkn̄wed Connecticut ke U.S.A. Nditọwọn̄ oro ẹkedi isua itiokiet m̀mê itiaba. Ndusụk mmọ ẹkekere: Charlotte, Daniel, Olivia, Josephine. Ke ini ẹkenịmde edinam n̄kpa nditọ oro, Obama, adaibuot ukara America ama okot nditọwọn̄ oro enyịn̄ onyụn̄ ọdọhọ ete: “Ana utọ n̄kpọ mmọn̄eyet emi etre.”
Bano ekedi isua 18 ke ini enye ye ete ye eka ye nditọeka esie ẹkekpọn̄de Iraq ẹka Norway ke 1996. Mme ufan esie ẹkesikot enye Un̄wana. Ke ndiọkiso, owo kiet ama otop enye ye owo 76 owot ke July 22, 2011. Owo emi okowotde mmọ ọkọdọhọ ete, ‘Ubaha n̄kpokowotde n̄kan oro.’
Utọ idiọk mbụk emi ọyọyọhọ ererimbot. Kere nte unọmọ, ibak, ekọn̄, afai, oto-obot afanikọn̄, ye mme n̄kpọ mmọn̄eyet eken ẹsibiakde mme owo onyụn̄ anam mmọ ẹfụhọ. Ata ediwak owo ẹkpan̄a ke unana ntak.
Ndusụk owo ẹdọhọ ke Abasi edi ntak, ke enye ikereke iban̄a nnyịn. Mbon eken ẹkere ke enye okụt ofụri ufen emi ibọde mi edi imaha ndinam n̄kpọ mban̄a. Ndusụk owo ẹkere ke owo kiet kiet enyene ini emi n̄kpọ ntre ediwọrọde enye. Idụhe se mme owo mîtịn̄ke. Edi m̀mọ̀n̄ ke ikeme ndikop ikọ oro ọdọn̄de owo esịt? Ibuotikọ oro etienede oyowụt se Bible etịn̄de aban̄a ufen emi ibọde mi ye nte enye editrede.
