Ata ediwak owo mfịn ẹdori enyịn ke Obio Ubọn̄ Abasi. Mmọ ẹkpebe Jesus emi ekekpepde mbet esie ẹbọn̄ akam ẹte: “Yak obio ubọn̄ fo edi. Yak uduak fo ada itie.”—Matthew 6:10.

Okposụkedi emi ediwak owo ẹnen̄erede ẹyom Obio Ubọn̄ Abasi, ata ediwak ufọkabasi idọn̄ke enyịn. Oro anam ewet mbụkeset emi ekerede H. G. Wells ọkọdọhọ ke Jesus ekesinen̄ede ọkwọrọ Obio Ubọn̄ heaven, edi ke ata ediwak ufọkabasi emi ẹdọhọde ke idi Christian iwakke nditịn̄ n̄kpọ mban̄a Obio Ubọn̄ Abasi.

Mme Ntiense Jehovah itiehe nte mme ufọkabasi emi. Mmọ ẹnen̄ede ẹkwọrọ Obio Ubọn̄ Abasi. Da Enyọn̄-Ukpeme emi osụk okotde mi ke uwụtn̄kpọ. Ẹsio akpan n̄wed Mme Ntiense Jehovah emi ke usem 220. Ẹsimịn̄ n̄kpọ nte idem miliọn 46 kpukpru ọfiọn̄, ndien idụhe magazine emi ẹmịn̄de awak ntem ke ofụri ererimbot. Nso idi akpan etop emi ẹsiwetde ke magazine emi? Kam sese enyịn̄ esie kan̄a: Enyọn̄-Ukpeme Ọnọ Ntọt Obio Ubọn̄ Jehovah.  *

Ntak emi Mme Ntiense Jehovah ẹnamde kpukpru emi man mme owo ẹkop etop Obio Ubọn̄ Abasi? Akpa kan̄a, nnyịn inịm ke Obio Ubọn̄ Abasi edi akpan etop emi esịnede ke Bible, ndien idụhe n̄wed emi ọfọnde nte Bible. Ọyọhọ iba, nnyịn imenen̄ede inịm ke Obio Ubọn̄ Abasi edi n̄kukụre ukara emi editrede kpukpru mfịna ubonowo.

Ke ini Jesus okodude mi ke isọn̄, Obio Ubọn̄ Abasi ekedi ata akpan n̄kpọ ke uwem esie, kpa oro ke enye ekesikwọrọ aban̄a. Mme Ntiense Jehovah ẹdomo ndikpebe enye. (Luke 4:43) Ntak emi Jesus akadade Obio Ubọn̄ Abasi nte ata akpan n̄kpọ ntre? Nso ke Obio Ubọn̄ emi ekeme ndinam nnọ fi? Mbọk kot mme ibuotikọ oro ẹtienede man okụt nte Bible ọbọrọde mme mbụme emi.