N̄kokpon ke Los Angeles emi odude ke California ke United States. Mbon idiọk n̄ka ye mbon emi ẹsidade n̄kpọsọn̄ ibọk ẹma ẹwak etieti ke edem nnyịn. Ete ye eka mi ẹkenyene nditọ itiokiet, ndien ami n̄kedi ọyọhọ eyen iba.

Ikesitiene eka mi ika Ufọkabasi Evangelical. N̄kesidu uwem esịt iba ini n̄kedide akparawa. Kpukpru Sunday mma nsitiene n̄kaikwọ ufọkabasi nnyịn n̄kwọ ikwọ, edi n̄kesida mme usen eken ke urua n̄ka usọrọ, n̄n̄wọn̄ n̄kpọsọn̄ ibọk, nnyụn̄ mma iban.

N̄kedi owo ikponesịt, ntre ekpri n̄kpọ ekesiyat mi. Mma nsikama n̄kpọ ekededi emi odụkde mi ubọk n̄n̄wana en̄wan. Se n̄kekpepde ke ufọkabasi ikan̄wamke mi. N̄kesidọhọ ke “usiene enyene Abasi, edi ke ami ke enye ada osio usiene ke isọn̄.” Ke ini n̄kodude ke ufọkn̄wed sekọndri esisịt ini mbemiso 1970, ama ọdọn̄ mi nditie nte mbon n̄ka emi ẹkotde Black Panthers. N̄ka emi ẹkesin̄wana ẹyom unen mbio obio. Mma ndụk n̄ka kiet ke ufọkn̄wed emi ẹkesiyomde ẹnam n̄kpọ ọfọn ye nditọ ufọkn̄wed. Ediwak ini ima isisịn ntịme tutu ẹdọhọ ẹtre n̄wed kan̄a.

Ntịme oro ikesisịnde do ikekemke mi. Ntre, mma ntọn̄ọ nditiene mbak nditọ mbakara ibak. Ke uwụtn̄kpọ, ami ye mme ufan mi ima isika ufọk fim ikese fim, ndien ndusụk ini ẹma ẹsisio nte mbakara ẹketụhọrede ifịn emi mmọ ẹkedepde ke Africa. N̄kpọ emi ama esiyat nnyịn tutu nnyịn itọn̄ọ ndimia nditọ mbakara oro ẹkedude do. Ekem ima isiwọrọ ika ebiet emi mbakara mbakara ẹdụn̄de ikoyom mbon en̄wen imia.

Mbemiso n̄kedide isua 20, ẹma ẹdọdiọn̄ọ mi ye eyeneka mi nte mbon ntịme. Ndien mme bodisi ẹma ẹtọn̄ọ ndiyom nnyịn. Ekpri eyeneka mi kiet ekedi owo idiọk n̄ka. Mma ntiene enye ndụk n̄ka emi. N̄kọdọdiọn̄ ndiọk.

Enyene ufan mi kiet emi ete ye eka esie ẹkedide Mme Ntiense Jehovah. Mmọ ẹma ẹdọhọ ntiene mmimọ n̄ka mbono esop mmọ, ndien mma nnyịme. Se n̄kokụtde do ama anam mfiọk ke Mme Ntiense Jehovah ẹdi ata isio. Kpukpru owo ẹma ẹkama Bible mmọ ẹnyụn̄ ẹtiene ẹkot ke ini ẹdọhọde ẹkot. Nditọwọn̄ ẹma ẹkam ẹtiene ẹnọ utịn̄ikọ! Idem ama akpa mi ndidiọn̄ọ ke Abasi ekere Jehovah, ama onyụn̄ enem mi ndikop ẹkotde enye ke enyịn̄. (Psalm 83:18) Mme owo ke esop oro ẹketo nsio nsio idụt, edi asari ikodụhe do.

Ke nsonso oro, n̄kamaha ndikpep Bible ye Mme Ntiense Jehovah,  edi mma mma ndisika mme mbono esop mmọ. Okoneyo usen kiet ke ini ndude ke mbono esop mmọ, mme ufan mi ẹma ẹka senima. Mmọ ẹma ẹkemia akparawa kiet do ẹwot sia enye mîkamaha ndisio jaket ikpa esie nnọ mmọ. Edem usen mmọ ẹma ẹtọn̄ọ ndinam inua mban̄a emi. Idem ke ini ẹkekpede ikpe mmọ ke esop, mmọ ẹkesụk ẹda se mmọ ẹkenamde emi mfefere mfefere. Ẹma ẹbiere nsinsi n̄kpọkọbi ẹnọ ediwak mmọ. Idịghe se ẹtetịn̄, esịt ama enem mi etieti nte mmen̄kodụhe ye mmọ okoneyo usen oro. Mma mbiere ndikpụhọde nnyụn̄ ntọn̄ọ n̄kpep Bible.

Se n̄kokụtde ke otu Mme Ntiense Jehovah ama akpa mi idem etieti sia mma n̄kụt asari toto ke edet iba. Ke uwụtn̄kpọ, ke ini Ntiense emi edide mbakara okoyomde ndika isan̄, enye ama ọdọhọ ubon emi ẹdide mbubịt owo ẹse nditọ imọ enyịn tutu imọ inyọn̄ idi. N̄ko, ubon emi ẹdide mbakara ẹma ẹnyịme eyen obubịt owo kiet odụn̄ ye mmọ sia enye mîkenyeneke ebiet ndidụn̄. Emi ama anam n̄kụt ke Mme Ntiense Jehovah ẹnam ikọ Jesus emi ke John 13:35: “Edieke mbufo ẹnyenede ima ke otu idem mbufo, kpukpru owo ẹyeda emi ẹfiọk ẹte mbufo ẹdi mbet mi.” Mma n̄kụt ke mmenyene ata nditọete ndien!

Nte n̄kekpepde Bible, mma ndikụt ke ana n̄kpụhọde nte nsikerede n̄kpọ man n̄keme nditie emem emem; mma nnyụn̄ n̄kụt ke idụhe se ifọnde ntem. (Rome 12:2) Mma n̄kpụhọde sụn̄sụn̄. Ke January 1974, mma nna baptism nnyụn̄ n̄kabade ndi Ntiense Jehovah.

Idem ke mma n̄kana baptism, n̄kosụk n̄n̄wan̄wana ndisimụm idem n̄kama ke ini esịt ayatde mi. Ke uwụtn̄kpọ, isan̄ kiet ke ini n̄kosụk n̄kwọrọde ikọ ke ufọk ke ufọk, mma nda n̄kụt inọ osiode radio ke moto mi. Mma mbịne enye, ndien ke ini enye okụtde ke mmọn̄ mmụm imọ, enye ama ayak radio oro enịm efehe. Ke ini n̄ketịn̄de se iketịbede nnọ nditọete oro ikọkwọrọde ikọ ntre, ebiowo kiet ke otu oro ama obụp mi ete: “Stephen, ekpedi ama omụm inọ oro, nso ke akpakanam enye?” Mbụme oro ama odụk mi ọkpọ onyụn̄ anam mbiere ndinam se n̄kekeme man ntie emem emem.

Ke October 1974, mma n̄kabade ndi ọkwọrọikọ ofụri ini, nsida hour 100 kpukpru ọfiọn̄ n̄kpep mme owo Bible. Nte ini akade, ẹma ẹdọhọ n̄kanam utom ke ibuot itieutom ofụri ererimbot Mme Ntiense Jehovah ke Brooklyn ke New York. Ke 1978, mma mfiak nnyọn̄ Los Angeles man n̄kese eka mi enyịn sia enye ọkọdọdọn̄ọ. Ke isua iba ebede, mma ndọ Aarhonda, edima an̄wan mi. Enye ama etiene mi ese eka mi enyịn tutu enye akpa. Nte ini akade, ami ye n̄wan mi ima ika Ufọkn̄wed Gilead, ndien ẹma ẹnọ nnyịn ikọkwọrọ ikọ ke Panama. Nnyịn isụk idu do tutu esịm emi.

Tọn̄ọ n̄kana baptism, mmosobo ediwak n̄kpọ emi akpanamde nduọ obom. Edi mmekpep ndisimụm idem n̄kama mîdịghe ndaha n̄kpọn̄ mbon oro ẹdomode ndiyat mi esịt. Ediwak owo, esịnede n̄wan mi, ẹtoro mi ke nte nsidomode ndimụm idem n̄kama ke mme ini ntem. Ami ke idemmi n̄kpekereke ke mmekeme ndikpụhọde ntem! Edi idịghe odudu idemmi ke nda nnam emi. Emi akam owụt ke Bible enyene odudu ndikpụhọde owo.—Mme Hebrew 4:12.

Bible anam ndiọn̄ọ se n̄kpadade uwem mi nnam onyụn̄ ekpep mi nditie emem emem. Nsan̄ake mmia mme owo aba. Utu ke oro, nsan̄a n̄kpep mmọ Ikọ Abasi. Mma n̄kam n̄kpep Bible ye eyen ufọkn̄wed nnyịn emi ekedide asua mi. Ke enye ama akana baptism, mma ndụn̄ ufọk kiet ye enye. Isụk idedi ufan tutu esịm emi. Ke otu mbon oro ami ye n̄wan mi ikpepde Bible, se ibede owo 80 ẹkabade ẹdi Mme Ntiense Jehovah.

Mmenen̄ede n̄kọm Jehovah ke nte enye anamde ndu eti uwem nnyụn̄ n̄kop inemesịt ke otu ikọt esie emi ẹdide nditọete mi.