Mbemiso anamde n̄kpọ ekededi, ekeme ndidi emesitie ekere m̀mê nso ufọn ke ididia. Ndi ọdiọk ndibụp m̀mê nso idi ufọn akam? Ihih. Idiọkke ndiyom ndidiọn̄ọ m̀mê ufọn odu ndibọn̄ akam. Job emi akakam edide owo Abasi ama obụp isan̄ kiet ete: “Edieke n̄kotde enye, ndi enye eyeyere mi?”—Job 9:16.

Nte ima ikokụt ke ibuotikọ ita oro isụk ikụrede do, akam idịghe n̄kpọ emi inamde sia ufọkabasi ẹnyụn̄ ẹdọhọ ẹnam, m̀mê n̄kpọ emi isinyụn̄ inamde man ikop idem inem. Ata Abasi esikop akam. Edieke ibọn̄de akam ke nnennen usụn̄ inyụn̄ iben̄ede mme n̄kpọ emi ẹkemde ye uduak esie, enye iditreke ndikop akam nnyịn. Enye akam ọdọhọ isan̄a ikpere imọ. (James 4:8) Ntre, nso ufọn ke edidia edieke ọbọn̄de akam? Se ndusụk mmọ mi.

Ndi esịt esinen̄ede etịmede fi ke ini enyenede mfịna? Utọ ini ntem ke Bible ọdọhọ ‘ikûdop ndibọn̄ akam’ ndinyụn̄ ‘mben̄e Abasi se nnyịn iyomde.’ (1 Thessalonica 5:17; Philippi 4:6) Bible ọdọhọ n̄ko ke edieke ibọn̄de akam, ke “emem Abasi emi akande kpukpru ekikere eyekpeme [nnyịn] esịt ye ekikere ke Christ Jesus.” (Philippi 4:7) Edieke itịn̄de ofụri se ifịnade nnyịn inọ Ete nnyịn ke heaven, emi ayanam esịt amana ana nnyịn sụn̄. Psalm 55:22 ọdọhọ ete: “Top mbiomo fo nọ Jehovah, ndien enye ọyọsọn̄ọ fi idem.”

Ke ofụri ererimbot, ata ediwak owo ẹkụt ke se Bible etịn̄de emi edi akpanikọ. Ke uwụtn̄kpọ, Hee Ran emi otode South Korea ọdọhọ ete: “Kpa ye oro nnyenede ikpọ mfịna, ini kiet ekededi oro mbọn̄de  akam mban̄a mfịna mi, esitie nte ẹbiomode mi mbiomo, mmesinyụn̄ n̄keme ndika iso nyọ.” Cecilia emi odụn̄de ke Philippines ọdọhọ ete: “Ndi eka nditọ, ntre esịt esitịmede mi etieti aban̄a nditọ mi ye eka mi emi udọn̄ọ mîyakke ọdiọn̄ọ mi aba. Edi akam isiyakke ntịmede esịt mbe nde. Mmọdiọn̄ọ ke Jehovah ayan̄wam mi nse mban̄a mmọ.”

Ndi odu ke ukụt m̀mê nnanenyịn? Edieke ọbọn̄de akam ọnọ ‘Abasi emi ẹsinọde owo ndọn̄esịt,’ mfịna fo ayafiak efere. Bible ọdọhọ ke enye “[esidọn̄] nnyịn esịt ke kpukpru ukụt nnyịn.” (2 Corinth 1:3, 4) Isan̄ kiet ke ini Jesus okodude ke ukụt, enye ama aka “ọkọtọn̄ọ edọn̄ ọbọn̄ akam.” Nso iketịbe? “Angel  [ama] oto ke heaven ọbiọn̄ọde enye ke iso edisọn̄ọ enye idem.” (Luke 22:41, 43) Nehemiah emi okonyụn̄ edide owo Abasi ama okụt ukụt ke ubọk mme idiọkowo emi ẹkeyomde enye etre ndinam utom Abasi. Nehemiah ama ọbọn̄ akam ọnọ Abasi ete ‘ọsọn̄ọ imọ ubọk.’ Se iketịbede ke oro ebede owụt ke Abasi ama ọbọrọ akam esie, onyụn̄ an̄wam enye okụre utom oro. (Nehemiah 6:9-16) Reginald, emi odụn̄de ke Ghana, etịn̄ nte akam esin̄wamde enye ete: “Ke ini mbọn̄de akam, akpan akpan ke ini enyịn anande mi, esinem mi ke idem sia ntịn̄ mfịna mi nnọ owo emi ekemede ndin̄wam mi onyụn̄ ọdọhọde mi n̄kûfịna idem.” Omokụt do ke Abasi ekeme ndidọn̄ nnyịn esịt ke ini ibọn̄de akam inọ enye.

Ndusụk se ibierede ekeme ndifịna nnyịn ye mbon nnyịn idem tutu nnyịn ikpa. Ntre, nso ke ikpanam man isibiere se idifọnde? Bible ọdọhọ ete: “Edieke owo mbufo ekededi ananade ọniọn̄ [akpan akpan ke ini ukụt], yak enye aka iso eben̄e Abasi, koro enye ọnọde kpukpru owo ke ntatubọk inyụn̄ isueneke owo; ndien enye ọyọnọ enye.” (James 1:5) Edieke ibọn̄de akam iben̄e Abasi ọniọn̄, enye ekeme ndida edisana spirit esie n̄n̄wam nnyịn ibiere se idifọnde. Imekeme ndikam mben̄e enye edisana spirit emi koro Jesus ọkọdọhọ ke ‘Ete nnyịn ke heaven esinọ mbon oro ẹben̄ede enye edisana spirit.’—Luke 11:13.

Enyene mme ini emi ekesinade Jesus ebiere ata akpan n̄kpọ. Ke utọ ini emi, enye ama esibọn̄ akam ọnọ Abasi ete an̄wam imọ. Ke uwụtn̄kpọ, Bible ọdọhọ ke ini Jesus okoyomde ndimek mme apostle esie 12, ke enye ama “ada ofụri okoneyo ọbọn̄ akam ọnọ Abasi.”—Luke 6:12.

Ukem nte Jesus, esinem ediwak owo mfịn ndikụt nte Abasi ọbọrọde akam mmọ onyụn̄ an̄wamde mmọ ẹbiere se ifọnde. Regina, emi odụn̄de ke Philippines, etịn̄ aban̄a nsio nsio mfịna emi enye osobode. Ebe esie ama akpa ọkpọn̄ enye ye nditọ, ẹma ẹsio enye ke utom, ndien ikememke inọ enye ndibọk nditọ esie. Nso in̄wam enye ọdiọn̄ọ se akpanamde? Enye ọdọhọ ete: “Mmesibọn̄ akam nnọ Jehovah ndien emi esin̄wam mi.” Kwabena, emi odụn̄de ke Ghana, etịn̄ ntak emi imọ ikoyomde Abasi an̄wam imọ. Enye ọdọhọ ete: “Ẹma ẹsio mi ke utom emi ẹkesikpede mi ediwak okụk.” Ke ini enye eketiede ekere aban̄a utom en̄wen emi enye akpanamde, enye ọdọhọ ete: “Mma mbọn̄ akam ediwak ini nnọ Jehovah nte an̄wam mi mbiere se idifọnde.” Enye adian do ete: “Mmenen̄ede nnịm ke Jehovah akan̄wam mi mmek utom emi edin̄wamde mi nse mban̄a idemmi nnyụn̄ n̄ka iso nnam n̄kpọ esie.” Abasi ayan̄wam fi n̄ko ebiere se ifọnde man aka iso edi ufan esie.

Imeneme ndusụk ufọn emi afo edidiade edieke ọbọn̄de akam. (Edieke oyomde ndidiọn̄ọ mme ufọn en̄wen, se ekebe emi “ Ufọn Akam.”) Edi mbemiso afo ekemede ndidia mme ufọn emi, ana ebem kan̄a iso ọdiọn̄ọ Abasi onyun̄ ọdiọn̄ọ se idide uduak esie. Ndi akpama ndinam emi? Mbọk dọhọ Mme Ntiense Jehovah ẹdikpep Bible ye afo. * Ndinam emi ekeme ndin̄wam fi asan̄a ekpere “Andikop akam.”—Psalm 65:2.