Jehovah Abasi edi Andinọ uwem. (Psalm 36:9) Ndi ukereke ke Abasi emi edide Andinọ uwem ekeme n̄ko ndinam mme akpan̄kpa ẹfiak ẹdidu uwem? Bible ọdọhọ ke se enye edinamde edi oro ke ini iso. (Kot Utom 24:15) Edi ntak emi enye edinamde emi?

Ke ini Abasi okobotde owo, enye okoyom owo odu uwem ke nsinsi ke isọn̄ emi. (Genesis 1:31; 2:15-17) Se enye osụk oyomde edi oro. Esibiak enye etieti ndikụt nte nnyịn ibọde uwem inyụn̄ ikpade.—Kot Job 14:1, 14, 15.

Ndi Abasi okobot mme owo man ẹdụn̄ ke heaven? Ihih. Enye okobot mme angel ẹdụn̄ ke heaven onyụn̄ obot mme owo man ẹdụn̄ ke isọn̄. (Genesis 1:28; Job 38:4, 7) Kere ban̄a mbon emi Jesus akanamde ẹset. Enye akanam mmọ ẹset ẹdidu uwem mi ke isọn̄. Kpasụk ntre, ata ediwak mbon oro ẹdinamde ẹset ẹdiset ididu uwem mi ke isọn̄.—Kot John 5:28, 29; 11:44.

Edi, Abasi enyene ibat ibat owo emi enye edinamde ẹset ẹkedu uwem ke heaven. Abasi ayanam mmọ ẹkabade ẹdi spirit. (Luke 12:32; 1 Corinth 15:49, 50) Mmọ ẹdidi ndidem ke heaven ye Jesus ẹyenyụn̄ ẹtie do ẹkara isọn̄ emi.—Kot Ediyarade 5:9, 10.